Mathae 19 - Santali Common Language New Testament

Bạhu bạgiye reaṅ sikhạuna

¹ Noako kathae roṛ mucạtʼketʼ khan Gạlil khon uṭhạuente Jisu do Jordan gaḍa paromkate Jihudạ reakʼ simạkoteye calaoena.

² Ar ạḍi utạr hoṛ do uniko pańja idikedea ar onko do onḍeye bogeketʼkoa.

³ Unre adom Phạrusiko Jisu biḍạue lạgitʼ uni ṭhen hecʼkateko menkeda, “Moseakʼ ạn lekate jãhãe hoṛ acʼren bạhu jãhãn karonte bạgiye do ganokʼtaea se baṅ?

⁴ Jisui roṛ ruạṛatʼkoa, “Bape paṛhao akada, Sisirjạuicʼ do pạhilre herel ar maejiue sirjạuketʼkinạ are menkeda,

⁵ ‘ona iạte herel do eṅgat-apat bạgikate acʼren bạhu tulucʼ mitʼ akane tahena ar unkin do mitʼ hoṛmokin hoyokʼa?’

⁶ Ar barea dokin baṅkana, menkhan mitʼ hoṛmo kanakin. Onate Isor okae joṛao mitʼ akatʼ manwa ona aloe topagma.”

⁷ Unre Phạrusikoko metadea, “Cedakʼ enḍekhan Mose do bapag dolel olaete bạhu bạgiye reakʼ hukume emakana?”

⁸ Jisui metatʼkoa, “Apeakʼ keṭecʼ mon iạte Mose do bạhu bạgiye reakʼe aṛakʼakawatʼpea Menkhan pạhil khon nonka do baṅ tahẽkana.

⁹ Ińiń metapekana, jãhãege laṭghaṭ chaḍa eṭakʼ karonte acʼren bạhui bạgiye ar eṭakʼgicʼe baplaye uni doe loṭghuṭiya.”

¹⁰ Unre celako do uniko metadea, “Jãwãe ar bạhu talare nonkage hoyokʼ khan, baplakʼge baṅ bhagea.”

¹¹ Jisui metatʼkoa, “Sanam hoṛ noa katha do ohoko manao daṛelea; menkhan okoeko em ocoakan eken onkogeko daṛeakʼa.

¹² Ente adom do eṅgat kukhi khon mạ̃yạ̃ṛigeko janam akana, onate onko do bako baplakʼ kana. Ar adom do hoṛgeko mạ̃yạ̃ṛi ocoyetʼkoa, onate onko hõ bako baplakʼkana, arhõ adomko do serma rajre bolokʼ iạte baṅ baplakʼko muruk akada. Onate okoeye manao daṛeakʼ uni doe manaoma.”

Probhu Jisu ar kạṭicʼ gidrạko

¹³ Unre kạṭicʼ gidrạ Jisu ṭhenko ạguketʼkoa jemon uni do onkoe capoko are koeako. Menkhan celako do onkoko dhomkaoketʼkoa.

¹⁴ Jisu do onkoe metatʼkoa, “Kạṭicʼ gidrạko iń ṭhen hecʼ ocoakope, alope manakoa, ente serma raj do nonkankoakʼ kangea.”

¹⁵ Ado kạṭicʼ gidrạko bohokʼre capokateye bhoratʼkoa, ar onḍe khone calaoena.

Mitʼṭen kisạ̃ṛ juạn

¹⁶ Ar ńelpe, mitʼṭen juạn koṛa do hecʼkate Jisui metadea, “E Guru, jaejug jion ńam lạgitʼ bhageakʼ cetʼko cekae hoyokʼtińạ?”

¹⁷ Jisu do uniye metadea, “Bhageakʼ reaṅ do cedakʼem kuliyediń kana? Ente mitʼ goṭengeae bhageicʼ do. Am do jaejug jionte bolokʼem menetʼ khan enḍekhan uniakʼ sanam hukumko dohoeme.”

¹⁸ Uni juạn koṛa doe menkeda, “Okako hukum?” Jisui menkeda, “Alom khũna, alom laṭghaṭa, alom kombṛoea, eṛe goha alom ema,

¹⁹ eṅgam-ạpum ganaokinme ar am aḍepaseren hoṛ apnar leka dulạṛem.”

²⁰ Uni juạn koṛa doe menkeda, “Noako joto doń manao ạguakada, ado ar cetʼko cekae hoyokʼtińạ?

²¹ Jisui menkeda, “Am do khạṭi utạrokʼem menetʼ khan enḍekhan senkate amakʼ sanam sompotti ạkhrińkate reṅgecʼ orecʼko danakome. Onate sermaere dhon hoyokʼtama. Ar ona tayom do hecʼkate ińren cela hoyokʼme.”

²² Noa katha ańjomkate kisạ̃ṛ juạn do ạḍi bhabnakateye calaoena, ente uni do ạḍi utạr dhon tahẽkantaea.

²³ Unre Jisu do acʼren celakoe metatʼkoa, “Sạrigeń metapekana, kisạ̃ṛ hoṛko lạgitʼ serma rajte bolokʼ do muskilgea.

²⁴ Arhõń metapekana, kisạ̃ṛ hoṛ serma rajte bolokʼ khon sui bhugạkʼte ũṭe bolo tabokʼge algawa.”

²⁵ Noa katha ańjomkate celako do hahaṛayenteko menkeda, “Enḍekhan kại khon bańcao do okoeye ńam daṛekea?”

²⁶ Jisu do celako beṅgetʼatʼkoteye metatʼkoa, “Manwako hotete do baṅ hoedaṛeakʼa, menkhan Isor hotete do sanamakʼge hoedaṛeakʼa.”

²⁷ Unre Patras do uniye metadea, “Ńelme, sanamakʼ bạgikate amren celale hoeakana; ale do cetʼle ńama?”

²⁸ Jisui metatʼkoa, “Sạrigeń metapekana, okoe ińren celape hoeakan, nawa janamokʼre Manwa Hopon tinre acʼakʼ ṭhonok reakʼ siṅghạsonreye duṛupʼa unre ape hõ gelbar siṅghạsonre duṛupʼkate Israelren gelbar khũṭkope bicạrkoa.

²⁹ Ar iń iạte okoe do acʼakʼ oṛakʼ-duạr, se eṅgat-apat, se boeha-miserako, se gidrạko se ot-baṛgekoe bạgi oṭoakatʼ, uni do mitʼ sae doboṛ bạ̃ṛtiye ńama ar jaejug jion hõe ạidạri joṅa.

³⁰ Menkhan lahatenko aema doko tayomokʼa, ar tayomtenko doko lahakʼa.”