Mark 4 - Santali Common Language New Testament

Mitʼṭen casa hoṛakʼ golpo

¹ Jisu do arhõ Gạlil doreão aṛere hoṛko cetʼakoe ehopʼena. Ar acʼ beṛhaete ạḍi utạr hoṛko bhiṛkeda; onate uni do doreãore mitʼṭen lạukạre decʼenteye duṛupʼena ar gadel hoṛ do ghuṭureko teṅgo tahẽyena.

² Uni do golpokote ạḍi okocʼakʼko reaṅ cetʼatʼkoe ehopʼena. Uni doe metatʼkoa,

³ “Mitʼṭen casa hoṛ do itạ erokʼ lạgitʼe oḍok calaoena.

⁴ Ado erokʼ jokhecʼ adomakʼ itạ do hor aṛere ńurena, ar cẽṛẽko hecʼkate onako halaṅ jomkeda.

⁵ Ar adomakʼ itạ do dhiri hasare ńurena. Menkhan onḍe dạriạ hasa baṅ tahẽkana. Ar dạriạ hasa baṅ tahẽkante itạ do usạrate janam rakapʼena.

⁶ Ado siń candoe rakapʼen khan onako do tolmocʼ cabayena ar mońjte baṅ rehetʼlente rohoṛ kạrcupʼena.

⁷ Adomakʼ itạ do jạnumko talare ńurena. Ar jạnumko hara idiyen khan onae jhurkeda, ar onate baṅ gele belelena.

⁸ Menkhan thoṛa itạ do bhage hasare ńurente janamkate harayena ar gele beleyena, adom do pegel doboṛ, adom do turui gel doboṛ, ar adom do mitʼ sae doboṛ phosole hoeocokeda.”

⁹ Ado mucạtʼreye menkeda, “Ańjom lạgitʼ lutur menakʼtae hoṛ doe ańjom ma.”

Phen lại reakʼ monsubạ

¹⁰ Ado bhiṛ komaoen khan acʼren gelbar celako ar beṛhaeten hoṛko do ona golpo reakʼ bhedko kulikedea.

¹¹ Jisui metatʼkoa, “Ape do Isorakʼ raj reakʼ sạri okoakʼkope baḍae ocoakana, menkhan eṭakʼko ṭhen do golpo talate lạiạgokʼ kana,

¹² sonot sostor reakʼ katha leka, ‘ńeńel doko ńeńelgea menkhan bako oroma, ańjom doko ańjomgea, menkhan bako bujhạua. Jemon aloko ạcurokʼ ar alo ikạkʼtako.’ ”

Casa hoṛakʼ golpo reakʼ bhed

¹³ Ona tayom Jisui metatʼkoa, “Noa golpo reakʼ mane do cetʼ bape bujhạuleda? Enḍekhan eṭakʼ golpoko reakʼ mane do cekatepe bujhạua?

¹⁴ Casa hoṛ oka itại erketʼ ona itạ do Isorakʼ katha kana.

¹⁵ Ar hor aṛere ńuren itạte do nonkanko reaṅge roṛ akana okoe do ona kathako ańjomketʼ, menkhan Soetan hecʼkate unrege onkoakʼ ontorre erakan kathakoe halaṅ ạtkira.

¹⁶ Ar dhiri hasare ńuren itạte do onko reaṅge roṛ akana okoe do ona katha ańjomkate, unrege rạskạ kateko ataṅetʼkan,

¹⁷ menkhan onkore mońjte rehetʼ baṅ bạisạukʼ kante eken thoṛa din lạgitʼko ṭarhao tahen kana. Ente ona katha khạtirte tinre santao ar khedreko paṛaokʼ kana unre onko doko pạcokʼ kana.

¹⁸ Jạnumko talare erlen itạte do onko reaṅge roṛ akana okoe do ona kathako ańjomketʼ,

¹⁹ menkhan gharońj reakʼ dạndi, ar dhon reakʼ mãyã ar emanteakʼ laloc hecʼakokante onko do onako ten loṭomkakʼ kana;

²⁰ ar onate onkore jãhãn jo do baṅ jokʼ kana. Ar bhage hasare ńuren itạte do onko reaṅge roṛ akana okoe do ona katha ańjomkateko ataṅetʼkan arko jokʼ kan. Okoe do pegel doboṛ, okoe do turui gel doboṛ, ar okoe do mitʼ sae doboṛ.”

Marsal reaṅ

²¹ Jisu do arhõe metatʼkoa, “Jãhãege diuhe jeretʼkate cetʼ khạclạkʼ se cạuki latarreko dohoegea? Ona do cetʼ diuhe dohowakʼ cetanre bako dohoea?

²² Jãhãnakʼge danaṅ tahen ona do sodorokʼ lạgitʼge danaṅ tahena; arhõ jãhãnakʼge poṭom tahen ona do oṭag lạgitʼge poṭom tahena.

²³ Ańjom lạgitʼ lutur menakʼtae hoṛ doe ańjom ma.”

²⁴ Ona tayom Jisui metatʼkoa, “Okaṭakʼpe ańjometʼkan ona reaṅ luturakʼpe. Oka sosoṅakʼtepe soṅa, inạtege ape hõ soṅapea; arko em juṭucʼapea.

²⁵ Okoeakʼ menakʼtae uni do arhõe emocokʼa, menkhan okoeakʼ oka menakʼtae ona hõe recʼ ocokʼa.”

Phosol reakʼ golpo

²⁶ Jisu do arhõe metatʼkoa, “Isorakʼ raj do nonka lekana: one mitʼṭen hoṛ do otre itạye erketʼ.

²⁷ Uni do siń ar ńindạ gitijokʼ ar beredotʼte okteye khemaokeda. Ar inạ oktere itạ do janamkate harayena, menkhan cekate hoyena uni do bae baḍaelakʼa.

²⁸ Hasa do acʼtege phosole janam ocokeda, pạhil do gạchi, ona tayom gele ar gelere do danage.

²⁹ Ado phosol beleyen khan uni do datrome calaokeda, ente phosol samṭao okte do hoyena.”

Tuṛi jaṅ reakʼ golpo

³⁰ Ona tayom Jisui metatʼkoa, “Isorakʼ raj do cetʼ sãote bon jurikea? Oka lekan phen hotete ona doń bujhạu ocoea?

³¹ Ona raj do mitʼṭen tuṛi jaṅ lekana. One oka do joto itạko khon huḍiń utạrge.

³² Menkhan haralen khan do joto aṛakʼ sakamko khon napṛakʼge hoyokʼa, ar nunạkʼ maraṅ maraṅ ḍạrko hoyokʼa je, coṭren cẽṛẽko hõ ona reakʼ ḍạrkore tukạko benao joṅa.”

³³ Nonkage Jisu do arhõ ạḍi utạr golpokote Isorakʼ kathakoe galmarao akokan tahẽkana. Ar tinạkʼ ganko bujhạu daṛeakʼkan tahẽkan inạkʼgeye lại akokan tahẽkana.

³⁴ Golpo chaḍa uni do bae cetʼakokan tahẽkana, menkhan tinre celako do acʼ sãote eskarko tahena unre jotowakʼe bhoṅako kan tahẽkana.

Birbão hoeye thirocoyetʼ

³⁵ Enhilokʼ ạyupʼen khan Jisu do acʼren celakoe metatʼkoa, “Dela, doreão hanasate bon parom calakʼa.”

³⁶ Unre celako do gadel hoṛko bạgiatʼkote Jisu okaṭakʼ lạukạreye tahẽkan ona lạukạtege uniko idi torakedea. Menkhan onḍe do arhõ eṭakʼ lạukạko tahẽkana.

³⁷ Ado lạukạ calakʼkan tahẽkanre mitʼṭen maraṅ birbão hecʼgotʼena ar ḍheoko nunạkʼ ãṭ chilkạu bolokʼkan tahẽkana je, lạukạ do dakʼte perejokʼ ehopʼena.

³⁸ Unre Jisu do lạukạ reakʼ tayom secʼre bạlisre bohokʼateye jạpitʼ akatʼ tahẽkana. Khange celako do beretʼ kedeteko metadea, “E Guru, abo bon gujukʼkan do cetʼ bam hetawakʼ kana?”

³⁹ Jisu doe beretʼena ar birbãoe dhomkaoketʼte doreãoe metatʼa, “Thirokʼme, hapekʼme,” Onate hoe do thirena ar jotowakʼ ḍel ḍel nijhumena.

⁴⁰ Ado celakoe metatʼkoa, “Cedakʼpe botorokʼ kana? Cekate biswạs do bạnukʼtapea?”

⁴¹ Noate celako do ạḍi bạṛicʼko botorena ar ako ako talare memenko ehopʼena, “Nui doe okoe kante hoe hõ hoe ar doreão hõ doreãokin bataoetʼtaea?”