Mark 16 - Santali Common Language New Testament

Jisui jiwetʼ beretʼen

¹ Ado Jirạukʼ mãhã paromen khan Magdalaren Mạriạm, Jokob eṅgat Mạriạm, ar Salomiteko do mạ̃ṛĩre ojokʼakʼ lạgitʼ mońj so mosolako kiriń ạgukeda.

² Ar hapta reakʼ pạhil din setakʼ jokhecʼ, cando rakabokʼ sãote onko do topa ṭhenko calaoena.

³ Unre ako akoreko menjoṅkan tahẽkana, “Topa duạr khon dhiri do okoeye ocokʼ abona?”

⁴ Menkhan onko do beṅgetʼ rakapʼkateko ńelkeda, dhiri do maraṅge tahẽkanre hõ, ona do ocokʼ akana.

⁵ Ado topa bhitriteko boloyen khan jojomsa aṛere ponḍ kicricʼ horokʼ akatʼ mitʼṭen juạn hoṛ duṛupʼ akanko ńelkedea, ar onate ạḍitetʼko tharbasaoena.

⁶ Uni juạn hoṛe metatʼkoa, “Alope tharbasaokʼa. Ape do Nasaretren Jisu, okoe doko kruslede, unipe sendra baṛayede kana? Nonḍe do bạnuea, uni doe jiwetʼ beretʼ akana. Ar nõkʼõe ńelpe ona jaega, one okareko doholede.

⁷ Ape do senkate uniren celako ar Patras hõ noa katha lạiaepe je, onko lahate uni do Gạlilteye calakʼkana. Ar cetʼlekae menletʼ onkage onko do onḍeko ńamea.”

⁸ Onko maejiu do cetʼhõ bako bujhạu daṛeakʼte thar tharaokʼ tulucʼ topa dander khon oḍokkateko dạṛkeda. Onko do nunạkʼko botorena je, botorte okoe hõ cetʼge bako lạiatʼkoa.

Probhu Jisu celako ṭhene ńelocoyen

⁹ Ado hapta reakʼ pạhil hilokʼ ạḍire Jisu do gocʼko khone jiwetʼ beretʼen khan pạhilre Magdalaren Mạriạm ṭhene ńel ocoyena. Uni Mạriạm khonge eae goṭen bạṛicʼ jiue oḍokʼ giḍiletʼko tahẽkana.

¹⁰ Mạriạm do Jisui ńelkede khan senkate uni sãotenkoe khoboratʼkoa. Unre onko do bhabnateko rakʼ homor joṅkan tahẽkana.

¹¹ Jisui jiwetʼ beretʼ akan ar Mạriạm ṭhene ńel ocoakan reakʼ katha ańjomkate onko do bako pạtiạulena.

¹² Ona tayom uniren barea cela do ato secʼkin taṛam idiyetʼkan tahẽkanre Jisu do eṭakʼ rupte unkin ṭhene ńel ocoyena.

¹³ Unkin do ruạr senkate sarecʼko ona khobor kin lạiatʼkoa, menkhan unkinakʼ katha hõ eṭakʼ celako do bako pạtiạuada.

¹⁴ Inạ tayom Jisu do acʼren gelmitʼ celako ṭhene ńel ocoyena. Unre onko doko jojomkan tahẽkana. Ar onkoakʼ bepạtiạu ar keṭecʼ mon iạte uni doe nisrạuketʼkoa, ente gocʼko khone jiwetʼ beretʼen tayom okoeko ńellede onkoakʼ katha bako pạtiạuatʼ tahẽkana.

¹⁵ Jisui metatʼkoa, “Ape do dhạrti reakʼ sanam jaegate calakʼpe ar sanam hoṛko ṭhen Isorakʼ bhage sombat porcarpe.

¹⁶ Ar jãhãegeye pạtiạukʼ are bạptis ocokʼ unige kại khon bańcaoe ńama; menkhan okoe bae pạtiạukʼ uni do sạjạiyokʼ lạgitʼe bicạr ocokʼa.

¹⁷ Okoeko pạtiạukʼ onkore do noako cinhạ ńelogokʼa, onko do iń ńutumte bạṛicʼ jiukoko oḍok giḍikoa, ar nawa nawa pạrsite kathako roṛa,

¹⁸ onko do tite bińko sapʼkoa, ar gujukʼakʼ jãhãnakʼgeko jom ńulere hõ ohoko hạnlena, ar rugikoko capokoa arko bogekʼa.”

Probhu Jisu sermateye rakapʼen

¹⁹ Ado joto kathae galmaraoatʼko tayom, Probhu Jisu do sermateye rakapʼ ocoyena. Ar uni do onḍe Isorakʼ jojomsa aṛereye duṛupʼena.

²⁰ Ar celako do senkate sanam jaegare porcarko ehopʼena. Ar Probhu do onko talate kạmiye ehopʼena ar hahaṛa kạmi reakʼ daṛeteye pormankeda, onko okako porcaretʼkan ona do sạrikana mente.