Mark 15 - Santali Common Language New Testament

Pilạt samaṅre Jisu

¹ Maraṅ naekeko do ạḍi setakʼre, murubiko, sostor baḍaeko ar maraṅ bạisiren hoṛko soṅgekate mitʼṭenko solhakeda. Ona tayom Jisuko tol idikedete Romren disạm cakʼlaoicʼ Pilạt ṭhenko jimạkadea.

² Pilạt do Jisui kulikedea, “Am do cetʼ Jihudikoren raj kanam?” Jisui roṛ ruạṛkeda, “Am do ṭhikgem menakada.”

³ Maraṅ naekeko do Jisu aemako dusikedea.

⁴ Onate Pilạt do arhõ Jisui kulikedea, “Am do cetʼ bam roṛ ruạṛa? Ńelme, tinạkʼko dusiyetʼmea.”

⁵ Menkhan Jisu do cetʼge bae roṛ ruạṛleda. Onate Pilạt doe hahaṛayena.

⁶ Sen-parom porobre Pilạt do hoṛkoakʼ khoj leka mitʼṭen kạidiye aṛakʼedekan tahẽkana.

⁷ Unre Barabbako metae mitʼṭen hoṛ do hajotreye tahẽkana. Uni do hul jokhecʼ hulletʼkan hoṛko soṅgete tahẽkateye khũnletʼ tahẽkana.

⁸ Ar gadel hoṛ do Pilạt ṭhen hecʼkateko metadea, “Am do jaoge okam ceka ạguakatʼ ńit hõ onkaeme baṛe.”

⁹ Pilạte metatʼkoa, “Jihudikoren rajiń aṛakʼapepe khojkana?”

¹⁰ Enteye baḍaekan tahẽkana, maraṅ naekeko do hiskạte acʼakʼ tire Jisuko soprot akadea.

¹¹ Menkhan maraṅ naekeko do disạm hoṛko uskạuketʼkoa jemon onko do Jisu bodolte Barabbako khoje.

¹² Pilạt do arhõe kuliketʼkoa, “Enḍekhan Jihudikoren rajpe metaekan uni doń cekaea?”

¹³ Onko do ãṭ aṛaṅte hohoateko menkeda, “Uni do krus kaeme.”

¹⁴ Pilạte metatʼkoa, “Cedakʼ, cetʼe dosakatʼte?” Menkhan hoṛko do artetʼ ãṭ aṛaṅte hohoate memenko ehopʼena, “Uni do krus kaeme.”

¹⁵ Ar Pilạt do hoṛko kusi ocoko lạgitʼ Barabbageye aṛakʼatʼkoa, ar Jisu do cạbuke reakʼe hukumketʼte kruskae lạgitʼe aṛakʼatʼkoa.

Palṭonko Jisuko siṛogaekan

¹⁶ Ona tayom palṭonko do disạm cakʼlaoicʼakʼ dolan bhitrite Jisuko idikedea. Onḍe do eṭakʼ palṭonko hõko jarwa mitʼketʼkoa.

¹⁷ Onko do beguni roṅakʼ kicricʼteko oyokedea, ar jạnumanakʼ nạ̃ṛĩ reakʼ mukuṭ galaṅkate bohokʼreko horokʼadea.

¹⁸ Ona tayom metaeko ehopʼena, “Johar, Jihudikoren raj, jitạu hoyokʼtam ma!”

¹⁹ Onko do mitʼṭen ṭheṅgate bohokʼreko dal dalaekan arko thoaekan tahẽkana, ar ikhṛumkateko ḍobokʼaekan tahẽkana.

²⁰ Adoko siṛog baṛawade khan beguni roṅakʼ kicricʼko totʼketʼtaete acʼakʼ kicricʼko horokʼadea ar kruskae lạgitʼko idikedea.

Krus cetanre Probhu Jisu

²¹ Ado ona jokhecʼ Kurene nagraharen Simon ńutuman mitʼṭen hoṛ do ato secʼ khon ona horteye calakʼkan tahẽkana. Uni do Aleksander ar Ruphustekinren apate tahẽkana. Palṭonko do Jisuakʼ krus gokʼiditae lạgitʼko sapʼ paṭetʼkedea.

²² Onko do Golgatha, torjomate do khạpriko metakʼ mitʼṭen jaegateko idikedea.

²³ Ar gondhoros mesalakatʼ sirkạ ńũae lạgitʼko emadea, menkhan uni do bae ńũleda.

²⁴ Inạ tayom onko do Jisuko kruskedea. Ar palṭonko do uniakʼ kicricʼ hạṭińjoṅa menteko gulibãṭkeda.

²⁵ Onko do setakʼ are baja okte Jisuko kruskedea.

²⁶ Ar uni birudre dusi reakʼ (dos-nama) re ol tahẽkana, “Jihudikoren raj.”

²⁷ Onko do Jisu sãote barea ḍạku hõko krusketʼkina, mitʼṭen do uniakʼ leṅga secʼre ar eṭagicʼ do uniakʼ jojomti secʼre.

²⁸ Onate sonot sostor reakʼ katha noa katha purạuena: “Uni do beạiniko tulucʼe lekhayena.”

²⁹ Ar horte parom calakʼkanko do bohokʼ ruku rukuate Jisu siṛogaeteko metadea, “Eya mundil dhaṅ dhasericʼ ar pe dinte benao ruạṛicʼ!

³⁰ Ma ńitokʼ krus khon pheḍ hijukʼte bańcaokʼme!”

³¹ Onkage maraṅ naekeko ar sostor baḍaeko hõ siṛogaete ako ako talare memenko ehopʼena, “Uni do eṭakʼkoe bańcaoketʼkoa, menkhan acʼ do bae bańcao daṛeakʼ kana.

³² Uni do Mạsi, Israelkoren raj! Ńitokʼ krus khone pheḍ hijukʼma; jemon ona ńelte ale hõle pạtiạukʼ.” Jisu sãote krus akankin hõ onkage kin siṛogadea.

Probhu Jisuakʼ gujukʼ

³³ Ado gelbar baja khon pe baja hạbicʼ goṭa disạm do ńũtena.

³⁴ Ar pe baja okte Jisu do ãṭ aṛaṅte hohoateye menkeda, “Eloi, Eloi Lama Sabakhthani,” metakʼme “E ińren Isor, E ińren Isor, cedakʼem bạgi giḍiạdińa?”

³⁵ Ar sorre teṅgoakanko modren adom hoṛ do noa ańjomkateko menkeda, “Ańjompe, uni do Eliại hohoae kana.”

³⁶ Unre mitʼ hoṛ do ńir senkate sirkạre mitʼṭen spońje topokeda ar ṭheṅgare gutukate Jisu ńũae lạgitʼe cepecʼadea. Uni doe menkeda, “Hape ńellege bon Eliạ do uni bańcaoe hijukʼa se baṅ.”

³⁷ Ona tayom Jisu do ãṭ aṛaṅteye hohoketʼ khan jiwi oḍokentaea.

³⁸ Unre mundil reakʼ orwal do coṭ khon pheḍ hạbicʼ oṛecʼente bar hạṭińena.

³⁹ Ar samaṅreye teṅgo akan tahẽkan palṭon do Jisu nonka gujukʼkane ńelkedeteye menkeda, “Sạrige uni do Isorren Hopone tahẽkana.”

⁴⁰ Ar maejiuko hõ sạṅgińre teṅgokateko ạri bạndhiyetʼ tahẽkana. Onko modre Magdalaren Mạriạm, huḍiń Jakob ar Josestekinren eṅgat Mạriạm ar Salomitekoko tahẽkana.

⁴¹ Jisu Gạlilreye tahẽkanre noko maejiu do uni sãoteko calakʼkan tahẽkana arko sapʼsoraekan tahẽkana. Ar Jerusalem khonko hecʼlen tahẽkan maejiuko hõ onḍeko tahẽkana.

Probhu Jisuakʼ topa

⁴² Enhilokʼ do sapṛaokʼ din, metakʼme jirạukʼ mãhã laha din tahẽkana.

⁴³ Ado ạyupʼ hijukʼkan tahẽkan jokhecʼ Arimạthiạren Joseph do Pilạt ṭhen senkate Jisuakʼ mạ̃ṛĩye koekeda. Uni do maraṅ bạisiren mitʼṭen manotan hoṛe tahẽkana ar acʼhõ Isorakʼ raj reakʼe ńel hohorkan tahẽkana.

⁴⁴ Pilạt do Jisu usạreteye gocʼente aḍiye hahaṛayena. Ar sạrigeye gocʼ akana se baṅ, onate subedar hohoadeteye kulikedea.

⁴⁵ Ado subedar ṭhene baḍaeketʼ khan mạ̃ṛĩ do Josephe emadea.

⁴⁶ Joseph do kicricʼe kiriń ạguketʼte Jisuakʼ mạ̃ṛĩye pheḍkeda ar kicricʼteye bedhaokeda, ar cạṭạinire kholao akatʼ mitʼṭen topareye dohokada. Ona tayom mitʼṭen dhiri guḍrạu ạgukate topa duạre esetʼ oṭokada.

⁴⁷ Jisuakʼ mạ̃ṛĩ okare dohoyen, ona do Magdaloniren Mạriạm ar Joses eṅgat Mạriạmtekin hõkin ńelkeda.