Mark 12 - Santali Common Language New Testament

Darkha bagwanren casakoakʼ golpo

¹ Ona tayom Jisu do golpoko hotete cetʼakoe ehopʼena. Uni doe metatʼkoa, “Mitʼ hoṛ do mitʼṭen darkha bagwane benaoketʼte ona beṛhaeteye eṭetʼ ạcurkada. Ar darkha rasa benao lạgitʼ lelen kunḍe laketʼte mitʼṭen usul oṛakʼe benaokeda. Ona tayom casako ṭhen bạisạu oṭokate uni do eṭakʼ disạmteye calaoena.

² Ado jo belekʼ okte hoyen khan ona jo reakʼ bhag hatao lạgitʼ casako ṭhen mitʼṭen gutiye kolkedea.

³ Menkhan casako do uni guti hõ sapʼkedeteko dalkedea ar eken tiko kolgotʼkadea.

⁴ Unre kisạ̃ṛ do eṭakʼ ar mitʼṭen gutiye kolkedea. Khan casako do uni guti hõ bohokʼreko dalkedea ar uni tulucʼ ạḍi bạṛicʼko beoharkeda.

⁵ Enrehõ uni do eṭakʼ ar mitʼṭene kolkedea. Ar casako do uniko gocʼkedea. Tayomte uni kisạ̃ṛ do arhõ eṭakʼkoe kolketʼkoa, menkhan onko modre adom doko dalketʼkoa ar eṭakʼko doko gocʼketʼkoa.

⁶ “Ado onḍe kole lạgitʼ kisạ̃ṛren do eken mitʼ goṭengeye sarecʼena. Uni do acʼren dulạṛiạ hoponge. Ar mucạtʼre acʼren hopongeye kolkedea; are hudisana; ‘onko do nahakʼ ińren hoponko manotea.’

⁷ Menkhan onko casako do ako akoreko menana, ‘nuige owaris doe hoyokʼa. Dela bon gojea, enḍekhan aboge onaren mạlik bon hoyokʼa.’

⁸ Onko do hopontetʼ sapʼkedeteko gocʼkedea ar darkha bagwan bahrereko giḍikadea.

⁹ “Enḍekhan mase lạipe, darkha bagwanren mạlik do cetʼe cekaea? Uni doe hijukʼa ar casakoe gocʼkoa ar darkha bagwan do eṭakʼkoe jimạ oṭoakoa.

¹⁰ Ape do cetʼ sonot sostorre bape paṛhao akada? ‘Raj mistiriko okaṭakʼ dhiriko bad giḍi oṭoletʼ onage konac reakʼ asol dhiri hoyena;

¹¹ noa do Probhu khonakʼge hoyena, ar aboakʼ mẽtʼ samaṅre do ạḍi hahaṛawakʼge?’ ”

¹² Unre sostor baḍaeko do Jisu sabeko menana, enteko bujhạukeda, ako birudrege ona golpo doe lạiyeda. Menkhan onko do hoṛko botoratʼkote Jisu bạgiadeteko calaoena.

Khajna emokʼ reakʼ

¹³ Onko sostor baḍaeko do Jisu acʼakʼ kathate jhạliye lạgitʼ Phạrusiko ar Herod secʼrenkoko kolketʼkoa.

¹⁴ Onko do Jisu ṭhen hecʼkateko menkeda, “E Guru, alele baḍaea, mitʼṭen sạri hoṛ kanam. Ar hoṛ cetʼko hudisme ar bako hudisme, ona do bam moneakʼ kana, ente am do okoeakʼ mẽtʼãhã hõ bam beṅgetʼakʼ kana. Ar sạri sạrige Isorakʼ hor reaṅem cetʼako kana. Ado lạialeme, Moseakʼ ạn lekate Romren maharaj khajna emae do ganokʼa se baṅ?

¹⁵ Ar uni do khajnale emaea se baṅ?” Jisu do onkoakʼ phạsiạratetʼ baḍaeketʼteye metatʼkoa, “Cedakʼpe biḍạuedeń kana? Den mitʼṭen Dinar ạguạńpe.”

¹⁶ Ado mitʼṭen Dinarko aguade khan Jisu do onkoe kuliketʼkoa, “Noare chap akan muṭhạn ar ńutum do okoeakʼ kana?” Metadeako, “Romren maharajakʼ kana”

¹⁷ Jisui metatʼkoa, “Okaṭakʼ maharajakʼ kan ona do maharajge emaepe, ar okaṭakʼ Isorakʼkan ona do Isorge emaepe.” Jisuakʼ noa katha ańjomkateko hahaṛayena.

Jiwetʼ beredokʼ reaṅ

¹⁸ Ado Sạdukiko modren adomko do Jisu ṭhenko hecʼena. Sạdukiko ṭhen do gocʼkoakʼ jiwetʼ beredokʼ reakʼ do cetʼge bạnukʼa.

¹⁹ Onate onko do Jisuko kulikedea, “E Guru, Mose do abo lạgitʼ noae ol oṭoakada, ‘jãhãe hoṛ begor gidrạwante bạhuttetʼe gocʼ bạgi oṭoae khan enḍekhan bokottetʼ do uniye baplayete dadattetʼren bõse teṅgokoma.’

²⁰ Eae boehako tahẽkana, ar pạhilicʼ do baplakate begor gidrạwantegeye gocʼena.

²¹ Khan dosaricʼ do hilit erae baplakedea, menkhan uni hõ begor gidrạwantegeye gocʼena, ar tesaricʼ hõ onka lekageye gocʼena.

²² Ar nonkage eae boehako modre, okoeren hõ gidrạ do bako hoelena. Ado mucạtʼre uni maejiu hõe gocʼena.

²³ Enḍekhan gocʼkoko jiwetʼ beredokʼre uni do okoeṭakʼren bạhui hoyokʼa? Ente eae hoṛge coṅ uni mako baplalede.”

²⁴ Jisui roṛ ruạṛatʼkoa, “Bhuledape, ente ape do sostor hõ bape baḍaea ar Isorakʼ daṛe reakʼakʼko hõ baṅ.

²⁵ Gocʼkoko jiwetʼ beredokʼre bạhu hõ bako bạhu joṅa ar jãwãe hõ bako jãwãeyokʼa; onko do serma goḍet lekako hoyokʼa.

²⁶ Menkhan gocʼko jiwetʼ beredokʼ reaṅ Moseakʼ puthire ol akan jolokʼkan jhạwạ reakʼ katha do cetʼ bape paṛhao akada, Isor do Moseye metadea, ‘ińge Abrahamren Isor,

²⁷ Isạhakren Isor ar Jakobren Isor?’ Isor do gocʼkoren Isor doe baṅkana, menkhan jiwetʼkoren Isorge. Ape do ạḍipe bhuleda.”

Sanam khon maraṅ hukum

²⁸ Ado sostor baḍaeko modren mitʼ hoṛ do onḍe hecʼkate reṭe peṭekʼ kane ańjomketʼkoa. Ar Jisu bes okocʼteye roṛ ruạṛetʼkan ńelkedeteye kulikedea, “Sanam khon pạhilakʼ hukum do okaṭakʼ kana?”

²⁹ Jisui roṛ ruạṛkeda, “Sanam khon pạhilakʼ hukum do hoyokʼ kana, ‘E Israelko, ańjompe, aboren Probhu Isor doe mitʼ goṭengea.

³⁰ Onate apeakʼ goṭa ontorte, goṭa jiwite, goṭa monte ar goṭa daṛete aperen Probhu Isor dulạṛepe.’

³¹ Ar dosarakʼ hukum do noa kana, ‘am aḍe paseren hoṛ apnar leka dulạṛem.’ Noakin banar hukum khon maraṅ hukum do ar cetʼge bạnukʼa.”

³² Unre sostor baḍayicʼ doe menkeda, “E Guru, bhage katha kangea. Am do sạrigem menakada, Isor doe mitʼ goṭengea ar uni chaḍa eṭakʼ Isor do bạnukʼkoa.

³³ Ar goṭa ontorte, goṭa bujte ar goṭa daṛete uni dulạṛe ar am aḍe paseren hoṛ apnar leka dulạṛe do janwar ar eṭakʼ joto lekan dãṛẽko khon hõ sorosgea.”

³⁴ Jisu do sostor baḍaeyicʼ bes budan hoṛ leka roṛ ruạṛetʼkanteye metadea, “Am do Isorakʼ raj khon pharakre do bạnukʼmea.” Ar un khon Jisu jãhãnakʼ kuliye do okoe hõ bako dilleda.

Dhorom guruko ṭhen Jisuakʼ kukli

^35-36 Ado Jisu mundilreye cetʼakokan tahẽkan jokhecʼe kuliketʼkoa, “Sostor baḍaeko do cekateko meneda, Mạsi do Dạudren hopon kanae mente? Dạud ma acʼge coṅ sonot Jiu hoteteye menakatʼ, ‘Probhu do ińren Probhui metadea, tin dhạbicʼ iń do amren bạiriko amakʼ jaṅga latarre bạń dohoko, unhạbicʼ ińakʼ jojomsa aṛere durupʼme.’

³⁷ Dạud acʼge coṅ uni ma Probhui metaekan enḍekhan cekate Mạsi do uniren hopone hoedaṛekokʼa?” Ar aema hoṛ do kusi monte Jisuakʼ kathako ańjometʼ tahẽkana.

³⁸ Jisu do cetʼako tulucʼe metatʼkoa, “Sostor baḍaeko khon sontor akae tahenpe. Onko do tilpạṅ talpaṅ aṅgropko horoga ar hạṭiạ bajarkore johar ocokʼko kusiyakʼa.

³⁹ Onko do sunạgogre laha duṛupʼakʼko ar bhojkore asol asol jaegageko kusiyakʼa.

⁴⁰ Ar hoṛko ṭhen ńelocokʼ lạgitʼ jeleń jeleńko koejoṅa, menkhan eṭakʼ secʼ do rạnḍi maejiukoakʼ oṛakʼ-duạrko jom ujạṛetʼtakoa. Nonkan hoṛ do bạ̃ṛti sạjạiko ńama.”

Rạnḍi maejiuakʼ dan

⁴¹ Ona tayom Jisu do mundil reakʼ dan sunduk pheḍre duṛupʼkate ṭaka-poesa emokʼkoe ạri bạndhiyetʼko tahẽkana. Ar kisạ̃ṛ hoṛko do ḍher ṭaka-poesako dankeda.

⁴² Ar mitʼṭen reṅgecʼ rạnḍi maejiu do hecʼkate eken barea huḍiń poesae dohokeda.

⁴³ Unre Jisu do acʼren celako hohoatʼkoteye metatʼkoa, “Sạrigeń metapekana, nui reṅgecʼ rạnḍi maejiu do sundukre sanam hoṛko khon ḍhere danakada.

⁴⁴ Ente onko hoṛ do akoakʼ asecʼ tasecʼ dhon khonko dohoakada, menkhan nui maejiu do acʼakʼ okulạnakʼ khon jauḍicʼ bańcao tahen lạgitʼ tahẽkantae, ona jotogeye dohokeda.”