Luk 4 - Santali Common Language New Testament

Probhu Jisu kạire ńurhạye reakʼ kurumuṭu

¹ Jisu do sonot Jiuteye perecʼen khan, Jordan gaḍa khone calaoena. Ar sonot Jiu reakʼ ạyurte pongel din hạbicʼ hahaṅkar jaegakoreye tahẽyena.

² Unre Soetan do Jisu laloce udukʼaete kạire ńurhạye reakʼe kurumuṭukeda. Ar niạ pongel din Jisu do cetʼge bae jomleda; ar onako din purạuen khan uni do reṅgecʼkedea.

³ Unre Soetan do Jisui metadea, “Isorren Hopon kan khanem, enḍekhan noa dhiri piṭhạ hoe ocoeme.”

⁴ Jisu do uniye roṛ ruạṛadea, “Sonot sostorre ol akana, ‘piṭhạ motote manwa do jiwetʼ bako tahena.’ ”

⁵ Ona tayom Soetan do Jisu mitʼṭen usul jaegateye idikedea ar mitʼ ripitʼte dhạrti reakʼ sanam rajosṭi udukʼ adeteye metadea,

⁶ “Noako joto reakʼ ektiạri ar ṭhonokiń emama, ente noako joto do ińre jimạ akana. Ar jãhãege sanań unige onań em daṛeaea.

⁷ Ńitokʼ judi ińem ḍobokʼạń ar Probhu mentem aṅgociń, enḍekhan noako joto do amakʼge hoyokʼa.”

⁸ Jisu do uniye roṛ ruạṛadea, “Sonot sostorre ol menakʼa, ‘am do amren Isor ḍobokʼae me, ar eken uni eskarge sewawaeme.’ ”

⁹ Unre Soetan do Jisu Jerusalemteye idikedea ar mundil reakʼ coṭ cuṛạre teṅgokedeteye metadea, “Isorren Hoponkan khanem nonḍe khon latarte donme,

¹⁰ ente sonot sostorre olakana, uni do acʼren goḍetko am reaṅe hukumakoa ar onko do amko rukhiyạmea.

¹¹ Onko do titeko sepeńmea jemon dhirire jaṅga alo bajaokʼtam.”

¹² Jisu do uniye metadea, “Sonot sostorre roṛ akana, ‘Probhu amren Isor do alom biḍạuea.’ ”

¹³ Ado joto lekan laloce udukʼ mucạtʼketʼ khan Soetan do thoṛa okte lạgitʼ Jisu bạgiyadeteye calaoena.

Nasaretre Probhu Jisuakʼ sikhạuna

¹⁴ Jisu do sonot Jiu reakʼ daṛeteye perecʼen khan Gạlil Prodesteye ruạṛ calaoena. Ar uniakʼ sombat do ona ṭoṭha reakʼ goṭa ṭạnḍire pasnao idiyena.

¹⁵ Uni do onḍenakʼ sunạgogkore cetʼakoe ehopʼena. Ar sanamkoge uni sabasiaeko ehopʼena.

¹⁶ Inạ tayom Jisu do Nasaretteye hecʼena. Ar nonḍege uni doe haralena. Uni do acʼakʼ niạm leka jirạukʼ mãhãre sunạgogreye boloyena, ar sostor paṛhao lạgitʼe teṅgoyena.

¹⁷ Ado Jesaea nạbiakʼ puthiko caladea. Ar guṛhạ akan puthiye oṭakʼketʼ khan ona jaegae ńamkeda one olakan,

¹⁸ “Probhuren Jiu doe decʼ akawạdińa, ente uni do ińe ojokʼ akadińạ jemon reṅgecʼ orecʼko bhage sombat iń porcarako. Ar bondi akanko ṭhen chaḍaoko reakʼ katha, kãṛã hoṛko ṭhen ńeńel reakʼ katha baḍae ocoko lạgitʼ uni doe kolakadińạ. Ar khed ocokʼkanko hõ, chaḍaoko lạgitʼe kolkedeńa.

¹⁹ Ona chaḍa Probhui kusiyakʼ bochor lại saḍe lạgitʼe kolakadińa,.”

²⁰ Ona tayom uni do puthi guṛhạ ruạṛkate sapʼdapʼicʼ cal ruạṛadeteye duṛupʼena. Ar sunạgogren sanam hoṛkoakʼ nońjor do unire paṛaoena.

²¹ Unre Jisui metatʼkoa, “Sonot sostor reakʼ katha teheńpe ańjomketʼ são sãote ona do purạuena.”

²² Ar sanam hoṛ do uniko sabasiadea ar uniakʼ moca khon oḍokokʼkan mońj mońj katha ańjomteko hahaṛayena. Onkoko menkeda, “Nui do cetʼ Josephren hopon doe baṅkana?”

²³ Jisui metatʼkoa, “Ape do noa hõpe mitạńa, ‘E raranicʼ amge baṛe bogekokʼme.’ Arhõpe mitạńa, ‘Kapharnạhumre okako kạmi reakʼ kathakole ańjomakatʼ, ńitokʼ nijakʼ atorehõ udugme.’ ”

²⁴ Uni do arhõe menkeda, “Sạrigeń metapekana, okoe nạbi hõ acʼakʼ nij atoren hoṛ do bako monewaea.

²⁵ Eliại tahẽkan oktere pe bochor turui cando bae dakʼleda ar goṭa disạmre maraṅ akal hoelena, unre Israel disạmre ạḍi utạr rạnḍi maejiuko tahẽkana.

²⁶ Menkhan onko okoe ṭhen hõ Eliạ do bae kol ocolena, eken Sidon ṭoṭha reakʼ Sareptaren rạnḍi maejiu ṭhene kol ocolena.

²⁷ Elisa nạbi oktere Israel disạmre aema murhucʼ jom rog hoṛko tahẽkana, menkhan onko okoehõ bako boge ocolena, Eken Siriạ disạmren Naman motogeye boge ocoyena.”

²⁸ Noako katha ańjomkate sunạgogren sanam hoṛko do edrete pit caṛhaoatʼkoa.

²⁹ Onko do beretʼente ato bahrete Jisuko oḍok ạgukedea ar buru latarte ṭhelao ńurhạye lạgitʼ coṭ cuṛateko idikedea.

³⁰ Menkhan uni do hoṛko talateye sen tapʼ calaoena.

Ạḍi utạr hoṛko bogeyena

³¹ Ado Gạlil Prodes reakʼ Kapharnạhum nagrahateye calaoena ar jirạukʼ mãhãre hoṛkoe cetʼ atʼakoa.

³² Ar hoṛko do uniakʼ cecetʼakʼteko hahaṛa cabayena, ente uni do ektiạri menakʼtae hoṛ lekae cetʼakokan tahẽkana.

³³ Ona sunạgogre bhut capaṛ akawade mitʼṭen hoṛe tahẽkana. Uni do kikiạuateye menkeda,

³⁴ “E Nasaretren Jisu, ale tulucʼ amakʼ do cetʼ? Nosṭole lạgitʼem hecʼakana? Baḍaegeạń okoe kanam; am do Isorren uni sonoticʼ kanam.”

³⁵ Jisu do bạṛjicʼ jiu dhomkao kedeteye metadea, “Thirkokʼme, ar uni khon oḍok calakʼme.” Unre bạṛicʼ jiu do onko talare uniye bhindạṛkedea ar jãhãnakʼ begor hạnete uni khone oḍok calaoena.

³⁶ Noa iạte jotoge hahaṛayente ako akore menjoṅko ehopʼena, “Noa baṅ oka lekan katha kan! Ektiạri ar daṛe salakʼ bạṛicʼ jiukoe hukumako kanre onko doko oḍok calakʼkana!”

³⁷ Ar ona ṭoṭha reakʼ joto jaegare Jisuakʼ katha do pasnao idiyena.

³⁸ Inạ tayom Jisu do sunạgog bạgikate Simonakʼ oṛakʼteye calaoena. Unre Simonren hanhartetʼ do ruạteye jạbun akan tahẽkan. Ar uni bogeye lạgitʼ Jisuko nehõradea.

³⁹ Unre Jisu do Simon hanhartetʼ pheḍre teṅgoyente ruạe dhomkaoketʼtaea. Ar inạtege ruạ do chuṭạuentaea, ar beretʼkate uni do jomakʼ sapʼsorakoe ehopʼena.

⁴⁰ Ado bere hạsurokʼkan tahẽkanre aema lekan rugiko Jisu ṭhenko ạguketʼkoa. Onko do ạḍi lekan rogteko jạbun akan tahẽkana. Ar Jisu do onko mitʼke mitʼ capoketʼkoteye bogeketʼkoa.

⁴¹ Unre ạḍi utạr hoṛko khon bạṛicʼ jiuko hõko oḍok calaoena. Onko bạṛicʼ jiuko do kikiạuate memenko ehopʼena, “Am dom Isorren Hopon kana.” Onko do Mạsi kanae menteko baḍae akade tahẽkana. Ona iạte uni do onkoakʼ mocae bondketʼtakoa.

⁴² Ado ạḍi setakʼre oḍok senkate Jisu do mitʼṭen nisun jaegateye calaoena. Ar hoṛko do uniko sendra ńamkede khan ako ṭhen khon aloe calakʼ menteko doho dohokadea.

⁴³ Unre Jisui metatʼkoa, “Iń do arhõ aema jaegakore Isorakʼ raj reakʼ bhage sombat porcar hoyokʼ tińạ, ente noa lạgitʼge Isor doe kolakadińạ.”

⁴⁴ Ona tayom uni do Jihudạ disạm reakʼ eṭakʼ eṭakʼ sunạgogkore porcare ehopʼena.