Luk 21 - Santali Common Language New Testament

Rạnḍi maejiuakʼ dan

¹ Niạ tayom Jisu do kisạ̃ṛ hoṛko mundil reakʼ dan sundukre akoakʼ dan dohokane ńelketʼkoa.

² Ar mitʼṭen reṅgecʼ rạnḍi maejiu hõ hecʼkate barea huḍiń poesa dohoe ńelkedea.

³ Unre Jisu do acʼren celakoe metatʼkoa, “Sạrigeń metapekana, nui reṅgecʼ rạnḍi maejiu do eṭakʼ sanamko khon bạ̃ṛtiye dohoakada,

⁴ ente eṭakʼko do akoakʼ sareṛokʼakʼ dhon khonko dohoakada, menkhan nui maejiu doe reṅgecʼ gerehõ bańcao tahen lạgitʼ oka tahẽkantae ona jotogeye emkeda”

Jug reakʼ mucạtʼ dinko

⁵ Celako modren adomko do mundil reaṅko galmaraokan tahẽkana. Onko doko menetʼ tahẽkana, mońj mońj dhiri ar dan reakʼ jiniskote dolan do cetʼleka sajao akana. Unre Jisui metatʼkoa,

⁶ “Ape ma noakope ńeletʼkan, menkhan nonkan din hijukʼa, unre dhiri cetan dhiri do baṅ tahena; jotoge rạputʼ giḍi ocokʼa.”

⁷ Celako do Jisuko kulikedea, “E Guru, tis noako do hoyokʼa ar okaṭakʼ cinhạ ńeltele bujhạu daṛeakʼa, noako hoyokʼ reakʼ okte do seṭer akana mente?”

⁸ Jisui roṛ ruạṛatʼkoa, “Ńelpe, okoe hõ jemon aloko bulạupe, ente ḍher hoṛge iń ńutumte hecʼkateko metapea, ‘iń kangeạń’ ar ‘okte do sorakana.’ Onko do alope pańjakoa.

⁹ Ape do lạṛhại ar gulmalkope ańjomlere alope botorokʼa, ente pạhilre noako do hoyokʼgea; menkhan unrehõ mucạtʼ do baṅ hoe hodokʼa.”

¹⁰ Ona tayom Jisui metatʼkoa, “Mitʼ jạt do eṭakʼ jạt birudre, ar mitʼ rajosṭi do eṭakʼ rajosṭi birudreko lạṛhạiya.

¹¹ Ạḍi ãṭ dhạrti laṛao hoyokʼa ar jaega jaegakore akal ar mahamạriko hoyokʼa. Ona chaḍa sermare nonkan ghoṭnako hoyokʼa ar cinhạko ńelokʼa, oka do ạḍi botorge.

¹² “Noako hoyokʼ lahare hoṛko do apeko sapʼpea arko santaopea. Ar bicạrpe lạgitʼ sunạgogreko idipea ar hajotreko bhoraopea. Iń iạte rapajko ar disạm cakʼlaoko samaṅreko idipea,

¹³ onate iń reaṅ goha emokʼ reakʼ ạt hoyokʼtapea.

¹⁴ Ńitge monre niṭ joṅpe, ar roṛ dogokʼ lạgitʼ do alope sapṛaokʼa,

¹⁵ ente iń do nonkan katha ar nonkan akeliń emapea, onape roṛ ruạṛakore aperen bạiriko do cetʼ hõ bako roṛ daṛeakʼa, ar ona hõ bako baṅ daṛeakʼa.

¹⁶ Aperen gogo-baba, boeha, gate ar peṛa pạrbhạko do apeko sapʼocopea. Ar ape modre adomko doko gocʼ ocokoa.

¹⁷ Iń iạte joto hoṛko hirkhạwapea,

¹⁸ menkhan apeakʼ do mitʼṭen upʼ hõ baṅ loksanokʼ tapea.

¹⁹ Ape do ṭarhao akaepe tahente sạri jionpe labjoṅa.

²⁰ “Tinre Jerusalem do palṭonko hotete esetʼ ạcurakatʼpe ńela unre bujhạupe je, Jerusalem dhaṅ dhaserokʼ din do sorakana.

²¹ Unre okoe Jihudạreko tahen onko do buruteko ńirjoṅma. Ar okoe nagrahareko tahen onko do nagraha bahreteko oḍok calakʼma. Ar okoe atoreko tahen, onko do nagrahate aloko hijukʼma,

²² ente noako din do sạjạyokʼ din hoyokʼa, ar onate sonot sostorre oka ol menakʼ ona do purạukʼa.

²³ Unre bhạrti hoṛmo akanko ar okoe gidrạko nunuakokan onkore do hae hae! Unre dhạrtire do maraṅ dorloe hoyokʼa ar Jihudiko cetanre Isorakʼ sạjại pheḍ hijukʼa.

²⁴ Onko do tarwaṛeteko gocʼ ocokʼa ar sanam jạtko talare bondi akan leka chir chạturko tahena. Ar por jạtkoakʼ okte ạuri purạukʼ hạbicʼ Jerusalem do onkoakʼ jaṅgate lebetʼ gańjaokʼa.

²⁵ “Unre siń cando, ńindạ cando ar ipilkore ạḍi lekan cinhạko ńelokʼa. Dhạrtiren sanam jạtko do kosṭoko ńama ar jalapuri reakʼ hudhud saḍe ar ḍheoko iạte onko do jiwi oṭaṅokʼ takoa.

²⁶ Ar dhạrtire darakanakʼko reakʼ botorte hoṛko doko keklesedokʼa, ente siń cando, ńindạ cando ar ipilko do ar bako ṭarhao tahena.

²⁷ Unre Manwa Hopon do ạḍi daṛe ar ṭhonokante rimilre hijukʼkanko ńelea.

²⁸ Noa ghoṭnako hoyokʼre ape do sojhete teṅgokʼpe ar bohokʼ rakabtape, ente apeakʼ chaḍaokʼ do sorakana.”

²⁹ Ona tayom Jisu do acʼren celako cetʼako lạgitʼ noa phene lạiatʼkoa, “Loa dare ar eṭakʼ dareko beṅgetʼakʼpe.

³⁰ Sakam sagenlen khanpe bujhạu daṛeakʼ kana, hoe lolo din do sorakana.

³¹ Onkage noako hoyokʼpe ńellere bujhạupe, Isorakʼ raj do sorakana.

³² Sạrigeń metapekana, noako hoelenre hõ niạ jugren thoṛa hoṛ do jiwetʼko tahena.

³³ Ot ar serma do cabakʼa, menkhan ińakʼ kathako do jaejug hạbicʼ tahena.

³⁴ “Sontor akae tahenpe, jemon apeakʼ mon do rij roṅ, ńũ bulokʼ ar gharońj reakʼ dạndite ten alo tahentape.

³⁵ Ar baṅkhan cetʼleka pạsi ackage bond godokʼ onkage ona din hõ ackage apere hecʼpaṛaokʼa, ar onka leka dhạrtiren sanam hoṛko cetanre hõ hecʼ paṛaokʼa.

³⁶ Onate jagwar tahenpe ar koejoṅpe jemon jãhãnakʼge hecʼape onakope parom idite Manwa Hopon samaṅrepe teṅgo daṛeakʼ.”

³⁷ Onako dinre Jisu do dinạmge mundilreye cetʼakokan tahẽkana, menkhan ńindạ do bahrete senkate Joitun burureye tahenkan tahẽkana.

³⁸ Ar sanam hoṛ uniakʼ katha ańjomtae lạgitʼ setakʼ khonge mundilteko hijukʼkan tahẽkana.