Luk 2 - Santali Common Language New Testament

Probhu Jisu Mạsiakʼ janam

¹ Ona jokhecʼ maharaj Agustus Kạisạr do acʼakʼ rajosṭiren sanam hoṛko ńutum ol ocoetako lạgitʼe hukumkeda.

² Siriạren disạm cakʼlaoicʼ Kurinio oktere niạge pạhil dhao ńutum ol ocoe hoelena.

³ Ar joto hoṛ ńutum ol ocoetako lạgitʼ apan ạpin atote calakʼko ehopʼena.

⁴ Joseph do Dạud bõsren hoṛe tahẽkana. Ar Jihudạ reakʼ Betlehem do Dạud rajakʼ janam ato tahẽkana.

⁵ Onate Joseph hõ ńutum ol ocoetae lạgitʼ Gạlil reakʼ Nasaret khon Betlehem atoteye calaoena. Ar Mạriạm hõ uni sãote onḍeye senena.

⁶ Uni do Joseph tulucʼ baplakʼ reakʼ ṭhik akantae tahẽkana. Ar ona oktere Mạriạm do bhạrti hoṛmoe tahẽkana ar Betlehemre tahenrege gidrạ janame reakʼ okte hoyentaea.

⁷ Ar onḍege uni do acʼren pạhil koṛa gidrại janamkedea, ar gendrecʼteye bedhaokedete nandwarreye giticʼkadea, ente unkin lạgitʼ okarehõ tahen jaega baṅ tahẽkana.

Serma goḍet ar gupiko

⁸ Ona ṭoṭhare ńindạ jokhecʼ bhiḍi gupiko do bathan ṭạnḍire akoren pal bhiḍikoko horhoyetʼkokan tahẽkana.

⁹ Unre ackage Probhuren mitʼṭen serma goḍet do onko samaṅreye teṅgoyena. Ar uniakʼ ṭhonok do onko beṛhaete bamberena. Onate gupiko do ạḍiko botorena.

¹⁰ Serma goḍet do onkoe metatʼkoa, “Alope botorokʼa, ente ape ṭhen ạḍi rạskạ reakʼ sombat iń ạguakada. Noa rạskạ do sanam hoṛko lạgitʼ kana.

¹¹ Teheń Dạud nagrahare aperen babańcaoicʼe janamakana. Uni doe Probhu Mạsi kana.

¹² Ape lạgitʼ cinhạ do nõkʼõe, ape do kicricʼte bedhao akade ar nandwarre giticʼ akan mitʼṭen bale gidrạpe ńamea.”

¹³ Ar ackage uni serma goḍet soṅgete arhõ aema goḍetko ńelena. Onko do Isor sarhaoate memenko ehopʼena,

¹⁴ “Sermare Isorakʼ ṭhonok dhạrtire suluk, manwakore kusi.”

¹⁵ Ado serma goḍetko onko ṭhen khonko calaoen khan gupiko do ako akoreko menjoṅana, “Delabon, Betlehemte bon calakʼ ar Probhu okaṭakʼe baḍae ocoketʼ bon ona reakʼ bon ńel ạguya.”

¹⁶ Ar onko do usạrateko calaoen khan Mạriạm, Joseph ar nandwarre giticʼ akan uni bale gidrạko sendra ńamkedea.

¹⁷ Ar gidrạ reaṅ okalekako baḍae ocolen, onkage onko do bale gidrạ ńelkateko lại baṛakeda.

¹⁸ Gupikoakʼ katha ańjomkate sanamkogeko hahaṛayena;

¹⁹ menkhan Mạriạm do jotowakʼ monreye rebetʼ dohokeda, okoe hõ bae lạiatʼkoa; uni do ona reaṅ monre hudisokʼe ehopʼena.

²⁰ Serma goḍetko gupiko ṭhen okako lạiletʼ onkage bhiḍi gupiko do jotowakʼko ńelketʼ khan Isor sarhaoe ar sabasiae tulucʼko ruạṛ calaoena.

²¹ Ado irạl mãhã purạuen khan Jihudikoakʼ niạm lekate uniakʼ ńutum do Jisuko dohoketʼtaea. Noa ńutum do eṅgatakʼ kukhire ạuriye hijukʼre serma goḍete emlen tahẽkana.

Mundilre bale Jisu

²² Ado Moseakʼ ạn lekate onkoakʼ chut meṭaokʼ reakʼ okte seṭeren khan, Joseph ar Mạriạm do Probhu samaṅre hạjiri lạgitʼ Jerusalemtekin idikedea,

²³ ente Probhuakʼ ạnre ol menakʼa, “Pạhil janamicʼ koṛa gidrạ do Probhuren menteye ńumogokʼa.”

²⁴ Ona chaḍa “Mitʼ joṛ potam se barea parwa hopon” dãṛẽkin reakʼ katha cetʼleka Probhuakʼ ạnre ol menakʼ onkage unkin do dãṛẽ emokʼkin calaoena.

²⁵ Unre Jerusalemre Simon ńutuman mitʼṭen dhorom ar Isor bhokti hoṛe tahẽkana. Uni do Israelkoakʼ jiwi raṛecʼe ńel hohorkan tahẽkana.

²⁶ Sonot Jiu unireye tahẽkana are sodorade tahẽkana, gujukʼ lahare uni do Probhuren Mạsiye ńelea.

²⁷ Simon do sonot Jiu reakʼ uskurte enhilokʼ Jihudikoakʼ mundilteye hecʼena. Ar Moseakʼ ạn lekate cetʼko cekae jạruṛ ona lạgitʼge Jisuren eṅgat-apat do bale Jisu onḍekin ạgukedea.

²⁸ Unre Simon do uniye hoborkedea ar Isor gunmanao joharaeteye menkeda.

²⁹ “E Probhu, amakʼ katha leka amren guti do ńitokʼ suluktem bidạkạń kana,

^30-31 ente manwako kại khon bańcaoko lạgitʼ sanam hoṛkoakʼ mẽtʼãhã samaṅre oka bondobosem emakatʼ, iń do onań ńelana.

³² Eṭakʼ jạtko ṭhen noa do hor udukʼako reakʼ marsal kana, ar amren Israel jạtko ṭhen noa do ṭhonokanakʼ kangea.”

³³ Simon gidrạ reakʼakʼ okakoe roṛketʼ onate gidrạren eṅgat-apat dokin hahaṛayena.

³⁴ Inạ tayom Simon do onkoe bhoratʼkote Jisuren eṅgat Mạriạme metadea, “Isor do noae teṅgo akada, nui bale gidrạ iạte Israelko modre aema hoṛ doko ńurokʼa, arhõ aema doko rakapʼ ocokʼa. Nui do nonkan mitʼṭen cinhại hoyokʼa, uni birudre ḍher hoṛge kathako roṛa.

³⁵ Onate onkoakʼ mon reakʼ hudis bundisko sodorokʼa. Ona chaḍa tarwaṛete amakʼ ontor do sobokʼ tabokʼ tama.”

³⁶ Un jokhecʼ Hanna ńutuman mitʼṭen maejiu hõ nạbiye tahẽkana. Uni do Aser bõsren Phạnuel hoponerae tahẽkana. Ar uni hõ aema umer hoeakantae tahẽkana.

³⁷ Uni do eae bochor jãwãetetʼ sãote tahẽkate irạlgel pon bochor hạbicʼ rạnḍigeye tahẽkana. Uni do mundil bạgikate okate hõ bae senokʼkan tahẽkana bickom upạs ar koejoṅ tulucʼ siń ńindạ Isore sewawaekan tahẽkana.

³⁸ Uni hõ unre hecʼkate Isore gun manao joharadea, ar Jerusalem reakʼ chaḍaokʼko ńel hohorkan sanam hoṛko uni gidrạ reaṅ lạiakoe ehopʼena.

³⁹ Probhuakʼ ạn lekate sanamakʼkin purạuketʼ khan Joseph ar Mạriạm do ạkinakʼ ato Gạlil reakʼ Nasaret tekin ruạṛ calaoena.

⁴⁰ Ar bale Jisu doe hara idiyena are daṛe idiyena akelte perejokʼ tulucʼ. Ar uni cetanre do Isorakʼ daya tahẽkana.

Jisu Gidrạ mundilre

⁴¹ Sen-parom porob jokhecʼ Jisuren eṅgat ar apat do jao bochor Jerusalemtekin calakʼkan tahẽkana.

⁴² Jisuakʼ umạr gelbar bochor hoentae khan niạm lekage onko do porobteko calaoena.

⁴³ Porob mucạtʼen khan oṛakʼko ruạṛkan tahẽkanre Jisu do Jerusalemregeye tahẽyena. Menkhan uniren eṅgat-apat do bạkin baḍaeletʼa.

⁴⁴ Uni do sãoten hoṛko tulucʼ menaea mente hudiskate mitʼ din horkin calaoena. Tayomte ạkinren peṛako ar ńepel oprom hoṛko talare Jisu sendrayekin ehopʼena.

⁴⁵ Menkhan baṅkin ńamledete arhõ sendra sendrate Jerusalemtekin ruạṛ calaoena.

⁴⁶ Ado pe din tayom unkin do mundilrekin ńamkedea. Uni do guruko talare duṛupʼkate onkoakʼ kathae ańjomkan ar onkoe kuliyetʼko tahẽkana.

⁴⁷ Ar okoeko Jisuakʼ kathako ańjometʼkan tahẽkan, onko sanamko uniakʼ akel ńelte ar uniakʼ roṛ ruạṛ ańjomteko ṭhak utạrokʼkan tahẽkana.

⁴⁸ Ar uniren eṅgat-apat do uni ńelkatekin hahaṛayena. Eṅgattetʼ do uniye metadea, “E Beṭa, cedakʼem nonkaketʼ bona? Am baba ar iń do ạndukʼ mạndukʼliń sendra baṛayetʼmea.”

⁴⁹ Jisui metatʼkinạ, “Cedakʼ ben sendra baṛayediń kana? Aben do cetʼ baben baḍaea, ạpuńakʼ oṛakʼre tahen hoyokʼtińa mente?”

⁵⁰ Jisu okae menketʼ ona do acʼren eṅgat-apat bạkin bujhạu daṛeada.

⁵¹ Inạ tayom uni do unkin sãote Nasaret atoteye ruạṛ calaoena ar unkinakʼ tabereye tahẽyena. Menkhan eṅgattetʼ do noako reaṅ monreye rebetʼ dohokada.

⁵² Ar Jisu do akelte, umerte ar Isor ar manwakoakʼ dulạṛteye hara idiyena.