Luk 10 - Santali Common Language New Testament

Eaegel celakoe koletʼko

¹ Ona tayom Probhu Jisu do arhõ eae gel celako porcar kạmi kolko lạgitʼe bachaoketʼkoa. Ar acʼ do okako ato ar jaegakote calakʼ lạgitʼe goṭa akatʼ tahẽkan, onako jaega calakʼ lahare uni do babar hoṛkateye kolkatʼkoa.

² Are metatʼkoa, “Sạrige phosol do ḍhergea, menkhan kạmiyạko doko thoṛagea. Onate phosolren mạlik nehõraepe, jemon uni do acʼakʼ phosol samṭao lạgitʼ hoṛe kolko.

³ Do calakʼpe; iń do hunḍạrko talare bhiḍi hoponko lekań koletʼpea.

⁴ Ṭaka reakʼ thạilạkʼ, khuti se panahi hõ soṅgete alope idijoṅa, ar horkore okoe hõ alope joharakoa.

⁵ Ar jãhã oṛakʼregepe bolokʼ pạhil do menpe, ‘noa gharońjrenko sulukapema.’

⁶ Ar suluke kusiakʼkan jãhãe hoṛ onḍe menae khan enḍekhan apeakʼ suluk do unire tahena, menkhan jãhãe onkanko bạnukʼko khan enḍekhan apeakʼ suluk do aperege ruạṛ hijukʼa.

⁷ Ona oṛakʼrege tahenpe ar okako emape onage jompe, ente okoeye kạmikan uni do acʼakʼ kuṛại ńam lek kanae. Ar mitʼ oṛakʼ bạgikate eṭakʼ oṛakʼte alope calakʼa.

⁸ “Jãhã atotepe bolokʼre ar onḍenko hoṛko ataṅlepere onko okako jom ocope onage jompe.

⁹ Ar ona atoren ruạkʼ hasokʼkan hoṛko bogekope ar lạiakope, ‘Isorakʼ raj do ape ṭhen sorakana.’

¹⁰ Menkhan jãhã atotepe senlenre ar onḍenko hoṛ bako ataṅpe enḍekhan ona ato reakʼ kulhikore senkate noa katha menpe,

¹¹ ‘ape ato reakʼ jaṅgare laṭkao akawatʼle dhuṛi do ape birudrele koṭa giḍi oṭokakʼ kana. Enrehõ baḍaekakʼpe, Isorakʼ raj do sorakana.’

¹² Ińiń metapekana, bicạr dinre ona ato reakʼ khon Sodom nagraha reakʼge boroṅ ḍher sahaokokʼa.

¹³ “Hae am do E Khorasin! Hae am do E Bethsaeda! Okako hahaṛa kạmi aben talare hoeakan, ona do Tur ar Sidon nagrahare hoelen khan, enḍekhan ḍher din laharege onko do gõṛẽ kicricʼ horokʼkate ar torocʼre duṛupʼkate kại khon monko ạcurketakoa.

¹⁴ Sạrige, bicạr dinre abenakʼ khon Tur ar Sidon reakʼge boroṅ ḍher sahaokʼa.

¹⁵ Ar am E Kapharnạhum, am do cetʼ serma hạbicʼ usul ocokʼem meneda? Tishõ baṅa, bickom am do patal puritem giḍi ocokʼa.”

¹⁶ Jisu do arhõ celakoe metatʼkoa, “Okoe apeakʼ kathako ańjometʼkan onko do ińakʼ kathageko ańjomeda. Okoe apeko nihạ̃tetʼpe onko do ińgeko nihạ̃tedeń kana. Ar okoe ińko nihạ̃tedeńkan onko do kol akadińicʼgeko nihạ̃tedekana.”

¹⁷ Ado onko eae gel cela rạskạte ruạṛ hecʼkateko metadea, “E Probhu, amakʼ ńutumle ńumetʼ khange bhutko hõ aleakʼ kathako ańjometʼ kana.”

¹⁸ Jisui metatʼkoa, “Soetan do serma khon bijli leka ńurokʼkaniń ńel akadea.

¹⁹ Ńelpe, iń do biń ar kidińko cetanre lebedokʼ reakʼ daṛe, ar aperen bạiri Soetanakʼ sanam lekan daṛe cetanre hõ ektiạriń emakatʼpea. Onate jãhãnakʼtege ohope hạnlena.

²⁰ Menkhan bhutko apeakʼ kathako ańjometʼkante alope rạskạkʼa, bickom sermare apeakʼ ńutum ol caṛhao akan iạte hulạsokʼpe.”

²¹ Unre Jisu do sonot Jiu reakʼ rạskạte hulạsenteye menkeda, “E Baba, am do serma ar dhạrtiren Probhu kanam. Sarhaoetʼme kạnạń, ente am do noako reaṅ ạkilan ar budanko khonem oko dohoakada menkhan albudạha lekanko ṭhen dom sodor akada. Hẽ Baba, amakʼ sanalekage noa do hoeakana.

²² ‘‘Ińren Baba do ińakʼ tire sanamakʼe jimạ akada. Baba chaḍa okoe hõ bako baḍaea Hopon doe okoe kana, arhõ Hopon chaḍa okoe hõ bako baḍaea Baba doe okoe kana mente. Ona chaḍa Hopon okoe ṭhen Baba sodoreye menetʼkan eken unigeye baḍaea.’’

²³ Uni do celako secʼe ạcurente hape hapeteye metatʼkoa, “Bhạgangea onako mẽtʼ do, one okakope ńeletʼkan ar ona ńel ńametʼkanko hõ.

²⁴ Ińiń metapekana, okakope ńeletʼkan, ona do ạḍi utạr nạbi ar rapajko ńeńelko menletʼre hõ bako ńelletʼa; ar okakope ańjometʼkan, ona ańjom sanaletʼkore hõ bako ańjomlakʼa.”

Mãyãwan Samariạ hoṛakʼ golpo

²⁵ Mitʼṭen dhorom guru do Jisu ṭhene hecʼena. Ar biḍạue lạgitʼe menkeda, “E Guru, iń do cetʼ iń cekalere jaejug jioniń ńam daṛekea?

²⁶ Jisu do uniye metadea, “Moseakʼ ạnre cetʼko ol menakʼa? Onḍe do cetʼem paṛhao akada?”

²⁷ Uni dhorom gurui roṛ ruạṛkeda, “Probhu amren Isor do amakʼ goṭa ontorte, amakʼ goṭa jiwite, amakʼ goṭa daṛete ar amakʼ goṭa monte dulạṛem, ar am aḍe paseren hoṛ apnar leka dulạṛem.”

²⁸ Jisu do uniye metadea, “Am do ṭhikgem roṛ ruạṛ akada. Arem onka idiyetʼkan khan enḍekhan jionem ńama.”

²⁹ Uni dhorom guru do dhorome ṭarhaokʼa mente Jisui kulikedea, “Okoe kanae iń aḍepaseren hoṛ do?”

³⁰ Jisui roṛ ruạṛadea, “Mitʼṭen hoṛ do Jerusalem khon Jerikho nagrahateye calakʼkan tahẽkan jokhecʼ ḍạku talareye paṛaoena. Unre onko do uni hoṛakʼ kicricʼko totʼketʼtaea ar dal admạrwạkateko bạgi oṭowadea.

³¹ Khan bhạg leka mitʼṭen naeke do ona horteye calakʼkan tahẽkana. Menkhan uni hoṛe ńelkede khan naeke doe sa paromena.

³² Ṭhik onkage ar mitʼṭen Lewi hoṛ hõ ona jaegareye hecʼena ar uni hõ hoṛe ńelkede khane sa paromena.

³³ Ona tayom Samariạren mitʼṭen hoṛ hõ ona horteye calakʼkan tahẽkanre uni hoṛ ṭhene hecʼ sorena. Ar uni hoṛ ńelte mãyã hecʼadea.

³⁴ Ar uni ṭhen senkate dal ghaokore sunum ar darkha rasae dulatʼteye bedhaokatʼtaea. Ona tayom acʼren gadhareye ladekedete mitʼṭen sạrạite idikedeteye jotonkedea.

³⁵ Ado dosar hilokʼ bar Dinar oḍokʼkate sạrạiren mạlik emadeteye metadea, ‘nui hoṛ jotonem. Ar noa khon bạ̃ṛti khoroclen khan, iń do ruạṛokʼreń emkatama.’ ”

³⁶ Mucạtʼre Jisui menkeda, “Am do ńitokʼ cetʼem hudiskea? Noko pene hoṛ modre okoeṭakʼ do ḍạku tireye paṛaolen hoṛren aḍepaserene hoyena?”

³⁷ Uni dhorom gurui menkeda, “Uni mãyãwạdiyicʼ hoṛge.” Jisu do uniye metadea, “Enḍekhan am hõ calaokate onkaeme.”

Martha ar Mạriạm

³⁸ Niạ tayom Jisu ar acʼren celakoko dãṛãnkan tahẽkanre mitʼṭecʼ atoteko boloyena. Ar Martha ńutuman mitʼṭen maejiu do rạskạte acʼakʼ oṛakʼte Jisui ataṅ aderkedea.

³⁹ Martharen do Mạriạm ńutuman mitʼṭen boeha kuṛiye tahẽkantaea. Uni do Probhuakʼ jaṅga pheḍre duṛupʼkate kathae ańjomkan tahẽkana.

⁴⁰ Menkhan Martha do jom ńu tear lạgitʼe udhuṛ dhupuṛ baṛaekan tahẽkana. Onate uni do hecʼkateye menkeda, “E Probhu, boehań kuṛi sapʼsosore bae goṛowạńkan do cetʼ bam moneakʼ kana? Ado ma metaeme, jemon kạmireye goṛowạń.”

⁴¹ Unre Jisu do Marthae metadea, “Martha, E Martha, am do ạḍi okocʼ reaṅem dạndikʼ kana, arem uduṛ dhupuṛ baṛae kana,

⁴² menkhan mitʼṭenge jạruṛakʼ do menakʼa. Ente Mạriạm do bhage bakhrageye bachao akawana. Ona do uni ṭhen khon baṅ rejogokʼa.”