Johan sodor 5 - Santali Common Language New Testament

Guṛhe puthi ar Bheḍa Hopon

¹ Okoe ona siṅghạson cetanreye duṛupʼ akan tahẽkan uniakʼ jojomtire mitʼṭen puthiń ńelkeda. Puthi reakʼ bahre ar bhitrire do ol tahẽkana ar eae goṭecʼ mohorte chapakatʼ tahẽkana.

² Tayomte mitʼṭen daṛeanicʼ serma goḍet do ạ̃ṭ aṛaṅte noa katha roroṛkaniń ańjomkedea, “Noa mohor chapko raṛakate puthi oṭag lạgitʼ lekmanicʼ doe okoe kana?”

³ Menkhan sermare se dhạrtire se ot latarren okoege noa puthi do bako oṭakʼ daṛeada, ar bhitri hõ bako ńel daṛeada.

⁴ Unre iń do ạḍi ãṭ iń rakʼkeda, ente nonkan okoege bako ńamlena okoe do ona puthi oṭag se ńel lạgitʼko lek kan.

⁵ Tayomte murubiko modren mitʼ hoṛe metadińạ, “Alom raga. Jihudạ bõsren dhạcri kul, one okoe doe Dạud bõsren kan, uni doe jitạu akana. Unige ona eae goṭecʼ mohor chapko raṛakate puthiye oṭakʼ daṛeakʼa.”

⁶ Ponea jiwiyanko ar murubiko talare okaṭakʼ siṅghạson tahẽkan, ona cetanre mitʼṭen Bheḍa Hopon teṅgo akaniń ńelkedea. Ińiń hudisetʼ tahẽkana pasecʼ uni Bheḍa Hopon doe gocʼ ocolen tahẽkana. Uni Bheḍa Hoponakʼ do eae goṭecʼ dereń ar eae goṭecʼ mẽtʼ tahẽkana. Ar Isorren eae goṭen Jiu okoe do dhạrti reakʼ sanam jaegateko kol ocokʼkan ona mẽtʼko do onko eae goṭen Jiu kanako.

⁷ Tayomte uni Bheḍa Hopon do hecʼkate siṅghạsonre okoeye duṛupʼ akan tahẽkan uniakʼ jojomti khon puthiye hataokeda.

⁸ Ar puthiye hataoketʼ khan onko ponea jiwiyanko ar bargel pon murubiko do Bheḍa Hopon samaṅreko ombakʼena. Onko mimitʼkoakʼ tire do mimitʼ goṭecʼ peṛesaṅ ar mimitʼ goṭecʼ dhupte perecʼ sona reakʼ bạṭi tahẽkana. Ona dhupte perecʼ bạṭiko do Isorren hoṛkoakʼ koejoṅ kana.

⁹ Onko do noa nawa sereńko sereńetʼkan tahẽkana: “Amge ona puthi hataokate mohor chapako raṛae reakʼ lek kanam, ente am dom gocʼ ocolena. Amge amakʼ mãyãmte mimitʼ bõsko, pạrsiko, disạmrenko ar jạtko mod khon Isor lạgitʼ hoṛkom kiriń akatʼkoa.

¹⁰ Am do onko hotete mitʼṭen rajosṭim benao akada ar aboren Isorakʼ sewae lạgitʼ naekekom hoe ocoketʼkoa. Dhạrtire onkoge rajosṭiko calaoa.”

¹¹ Tayomteń ńelkeda; ona singhạson ar jiwiyanko ar murubiko beṛhaete aema serma goḍetkoakʼ aṛaṅ iń ańjomkeda. Onko serma goḍetko do lekhare hajar hajar, ar ojut ojutko tahẽkana.

¹² Onko do ãṭ aṛaṅte noa kathako menetʼkan tahẽkana: “Okoeṭakʼ Bheḍa Hopone gocʼ ocolen, unige ektiạri, dhon, akel, daṛe, manot, ṭhonok ar sarhao ńam lek kanae.”

¹³ Ona tayom sermare, dhạrtire, ot latarre ar jalapurire tinạkʼ jiwiyan menakʼko, ar onare jãhãnakʼge menakʼ jotokoge noa katha roroṛkaniń ańjomketʼkoa: “Singhạsonre okoeye duṛupʼ akan Uniakʼ ar uni Bheḍa Hoponakʼ sarhao man ar ṭhonok ar daṛe do jaejug hạbicʼ tahenma.”

¹⁴ Onko ponea jiwiyankoko menkeda, “Amen.” Ona tayom onko murubiko do ombakʼkateko sewakeda.