Johan sodor 2 - Santali Common Language New Testament

Ephesus reakʼ manḍer ṭhen

¹ “Ephesus nagraha reakʼ manḍerren goḍet ṭhen noa katha do olme: ‘‘Okoe acʼakʼ jojomtire eae goṭen ipil sapʼkate sona reakʼ eae goṭecʼ diuhe dohowakʼ talareye ạcur baṛaekan uni do noae meneda.

² Iń do amakʼ kạmi, mehnot ar sobori doń baḍaegea. Baḍaegeạń am do bạṛicʼ hoṛko bam ńel sahao daṛeakoa, ar okoe do apostolko baṅkanre hõ apnarte apostolko ńumugokʼkan onko dom biḍạu aṭkar akatʼkoa ar phạsiạra kanako mente hõm sạbud akatʼkoa.

³ Amakʼ do sobori menakʼtamgea ar iń lạgitʼ hõ ạḍi kosṭom sahao akada, ar bam laṅga akana.

⁴ Enrehõ am birudre noa katha roṛ reakʼ menakʼtińạ, ente lahate iń lạgitʼ cetʼ leka dulạṛ tahẽkantam ona dom atʼakada.

⁵ Hudiskate ńelme, am do tinạkʼ usul khon tinạkʼ latartem pheḍakana. Noa khon mon ạcurtam ar lahate okakom kạmikan tahẽkan onare ruạṛme. Ar mon bam ạcurletam khan enḍekhan am ṭhen hecʼkate amakʼ diuhe dohowakʼ do ona jaega khoniń ocoga.

⁶ Menkhan mitʼṭen gun menakʼtama ona do, Nikolạitiko okaṭakʼko cekayetʼkan ona dom hirkhạwakʼ kana, ar iń hõń hirkhạwakʼ kana.

⁷ ‘‘Ańjom lạgitʼ lutur menakʼtayicʼ doe ańjomma, sonot Jiu manḍerrenko cetʼe metako kana mente! Jitạukʼicʼ do Isorakʼ Parades reakʼ jion dare reakʼ joń jom ocoyea.

Smurnạ reakʼ manḍer ṭhen

⁸ ‘‘Smurnạ naṅgrha reakʼ manḍerren goḍet ṭhen noa katha olme: ‘‘Okoe doe etohopʼ are mucạtʼicʼkan, ar okoe doe gocʼlen are jiwetʼ beretʼen, uni do noa kathae meneda.

⁹ Amakʼ kosṭo ar reṅgecʼ reakʼ kathań baḍaegea, menkhan enhõ am dom kisạ̃ṛgea. Apnarte Jihudiko ńumugokʼkanre hõ okoe do Jihudiko baṅkan, bickom Soetan dolren kanko, onko do am birudre okako roṛetʼkan ona doń baḍaegea.

¹⁰ Am do okako dukem jom lạgidokʼkan onate thoṛa hõ alom botorokʼa. Ańjomme, Soetan do ape modren adomko biḍạupe lạgitʼ hajotreye bhoraopea, ar gel din hạbicʼ ape do kosṭope joma. Am do gujukʼ hạbicʼ pạtiạr akae tahenme, enḍekhan jitạukʼ reakʼ mala leka jioniń emama.

¹¹ Ańjom lạgitʼ lutur menakʼtae hoṛ doe ańjomma, sonot Jiu manḍerrenko cetʼe metako kana mente. ‘‘Jitạukʼicʼ do dosar gujukʼte ohogeye hạnlena.

Pergamom reakʼ manḍer ṭhen

¹² “Pergamom nagraha reakʼ manḍerren goḍet ṭhen noa katha olme. Okaṭakʼ laser tarwaṛe banar secʼ dhar menakʼ ona ạidạrige noa kathae meneda:

¹³ Am do okarem tahenkan ona doń baḍaegea; onḍe do Soetanakʼ siṅghạson menakʼa. Enhõ am do ińre pạtiạr menama ar iń cetanre amakʼ pạtiạu do bam baṅ akada. Okare Soetane tahenkan onḍe ińren pạtiạricʼ goha Antipas do ape samaṅreye khũn ocolenre hõ am do amakʼ pạtiạu bam baṅlakʼa.

¹⁴ Menkhan enhõ am birudre ińakʼ roṛ reakʼ thoṛa menakʼtińạ. Onḍe am ṭhen nonkan hoṛko menakʼkoa okoe do Balamakʼ sikhnạt lekateko calakʼkan. Balak raj do Balame cetʼade tahẽkana jemon uni do boṅga samaṅakʼkoe jom ocoko ar laṭghaṭ kạmikote Israelko kại secʼe idiko.

¹⁵ Ona chaḍa Nikoliạtikoakʼ cecetʼakʼ lekako calakʼkan nonkan adom adomko hõ am ṭhen menakʼkoa.

¹⁶ Onate noa khon mon ạcurtam. Ar mon bam ạcurtam khan enḍekhan iń do usạrage am ṭheniń hijukʼkana ar ińakʼ moca reakʼ tarwaṛete onko birudreń lạṛhạiya.

¹⁷ Ańjom lạgitʼ lutur menakʼtae hoṛ doe ańjomma, sonot Jiu do manḍerrenko cetʼe metako kana. Ar okoeye jitạukʼ uni do okoakatʼ manna khon thoṛa manna ar mitʼṭen ponḍ dhiriń emaea. Ona dhiri cetanre mitʼṭen nawa ńutum ol tahena one okoehõ ona do bako baḍaekan, eken okoe onae ńam unigeye baḍaea.

Thuạtirạ reakʼ manḍer ṭhen

¹⁸ “Thuạtirạ nagraha reakʼ manḍerren goḍet ṭhen noa katha olme, Isorren Hopon, one okoeakʼ mẽtʼ do seṅgel lepʼ leka ar jaṅga do jhak jhakaokʼkan pitạl leka uni do noa kathae meneda:

¹⁹ Iń do amakʼ kạmi, amakʼ dulạṛ, amakʼ biswạs, amakʼ sapʼ dapʼ ar amakʼ sobori reakʼ kathań baḍaegea. Am do lahate okakom kạmikan tahẽkan, ona khon hõ ńitokʼ do arhõ bạ̃ṛtim kạmikan ona hõń baḍaegea.

²⁰ Enhõ am birudre ińakʼ noa katha roṛ reakʼ menakʼtińạ. Am do Jesebel ńutuman uni maejiuakʼ bedhoromem sahao akatʼa. Nui Jesebel do acʼte nạbiye ńumogokʼ kana. Ar acʼakʼ cecetʼakʼte uni do ińren gutikoe bulạuetʼkoa, jemon onko do laṭghaṭko kạmi ar boṅga ṭhen samaṅakʼko jom.

²¹ Loṭghuṭi khon mon ạcurtae lạgitʼ iń do ạtiń emade tahẽkana, menkhan uni do mon bae ạcurletʼtaea.

²² Onate iń do aṭetʼreń jaṛao ocoyea, ar okoe uni tulucʼko loṭghuṭiyetʼkan onko hõ loṭghuṭi khon mon bako ạcurletako khan enḍekhan ạḍi bạṛicʼ sasetreń khadlekoa.

²³ Ar uniren gidrạko hõń gocʼ giḍikakoa. Onate sanam manḍerrenko baḍae daṛeakʼa je, ińkangeạń manwakoakʼ mon ar ontor ḍunḍhạuicʼ do. Ar apeakʼ kạmiko leka mitʼke mitʼ hoṛ do joń emapea.

²⁴ E Thuạtirạren sarecʼ hoṛko, okoe ona sikhnạt leka bape calakʼkan ar Soetanakʼ oka khạnḍri cecetʼakʼko metakʼkan ona bape baḍae akatʼ, apeń metapekana: Ape cetanre ar eṭakʼ bojha do bạń ladeapea.

²⁵ Eken apeakʼ okaṭakʼ menakʼ, ona do iń ạuriń hijukʼ hạbicʼ kajakte sapʼ dohokakʼpe.

²⁶ Baba cetʼleka sanam jạtko cetanre ektiạriye emakawạdiń, onkage okoeye jitạukʼ ar mucạtʼ hạbicʼ ińakʼ sana lekae kạmi idi uni hõ ona ektiạriń emaea.

²⁷ Uni do mẽṛhẽtʼ ṭheṅgate onkoe ḍanṭaokoa ar hasa reakʼ bhajan lekae rạputʼgiḍikoa.

²⁸ Ar okoeye jitạukʼa unige iń do bhurkạ ipil hõń emaea.

²⁹ Ańjom lạgitʼ lutur menakʼtae hoṛ doe ańjomma, sonot Jiu do manḍerrenko cetʼe metakokana mente.