Johan sodor 18 - Santali Common Language New Testament

Babel nagraha dhaṅ dheserokʼ reaṅ

¹ Inạ tayom ar mitʼṭen goḍet serma khon pheḍ hijukʼ kaniń ńelkedea. Uni do maraṅ ektiạri tahẽkantaea ar dhạrti do uniakʼ ṭhonokte marsalena.

² Uni do ãṭ aṛaṅte hohowateye menkeda, “Lạnduṛena, ona maraṅ nagraha Babel do lạnduṛena, ona do ńitokʼ bạṛicʼ jiukoakʼ tahen reakʼ jaega hoeakana ar mitʼke mitʼ bạṛicʼ jiuakʼ dander ar beshapha ar hirkhạwan cẽṛẽkoakʼ khańca hoeakana,

³ ente uni do acʼakʼ loṭghuṭi reakʼ botoranakʼ bubulakʼ sanam jạtrenkoe ńũ ocoakatʼkoa. Dhạrtiren rapajko do uni tulucʼko loṭghuṭi akada, ar dhạrtiren bạnij bepariko hõ uniakʼ bin sambṛaokʼ reakʼ iricʼ cikijokʼ daṛeteko kisạ̃ṛ akana.”

⁴ Ona tayom iń do serma khon ar mitʼ hoṛ roroṛ kaniń ańjomkedea, “E ińren hoṛko, ape do Babel khon oḍok hijukʼpe jemon uniakʼ kại reakʼ bhạgiạdarko alope hoyokʼ, ar okako sạjại unire ńurokʼ ona okaṭakʼge jemon alo paṛaoape.

⁵ Uniakʼ kại do serma hạbicʼ usul akana ar uniakʼ bạṛicʼ kạmiko reakʼ katha do Isore disạ akatʼtaea.

⁶ Ar eṭakʼko tulucʼ cetʼ lekae beoharakatʼ onkage acʼ sãote hõ beoharpe; uniakʼ kạmiko leka purạ puri kuṛại emaepe. Okaṭakʼ bạṭire uni do eṭakʼko lạgitʼ bạṛicʼakʼe mesaletʼ tahẽkan, onare uniakʼ purạ sạjại mesalkate jom ocoyepe.

⁷ Uni do acʼakʼ reaṅ tinạkʼ bạ̃ṛtiye sabasilen, ar tinạkʼ bạ̃ṛtiye umtạ umtilen, ṭhik unạkʼge saset ar duk emaepe, ente monreye hudiseda, iń ma rạniń hoeakan, ar rạnḍi doń baṅkana; ar oka lekatege bạń dukokʼa.

⁸ Onate unire joto sạjại mitʼ dintege paṛaokʼa; onako do hoyokʼ kana moron, duk ar mohamạri. Seṅgelte uni doe rapakʼ giḍi ocokʼa, ente okoe uniakʼe bicạrtae uni Probhu Isor doe daṛeanicʼ kana.”

⁹ Ar dhạrtiren okoeko raj uni tulucʼko loṭghuṭi akatʼ arko umtạ umtilen onko do uni rapage jokhecʼ dhũạ ńelteko raga ar uni lạgitʼko dukokʼa.

¹⁰ Onko do uniakʼ saset ńelte botorte sạṅgińre teṅgokateko mena, “Hae Babel, hae! Ona maraṅ nagraha, ar daṛeanakʼ nagraha do, ente mitʼ ghạṛite amakʼ sạjại do seṭerena!”

¹¹ Dhạrtiren bạnij bepariko hõ uni lạgitʼko raga arko dukokʼa, ente onkoakʼ jinisko do ar okoege bako hataoa.

¹² Onkoakʼ onako jinis modre sona, rupạ, damanakʼ dhiri ar muti mạnik, mĩhĩ musnạ kicricʼ, kurse baha roṅakʼ kicricʼ, lumạṅ kicricʼ ar jeṅgetʼ arakʼ kicʼricʼ; aema lekan mońj so kaṭko ar hạti ḍaṭate tearakʼ aema jinisko; damanakʼ kaṭ reakʼ tearakʼ jinisko, pitạl, mẽṛhẽtʼ ar mormor dhirite tear jinisko;

¹³ darcini jut so mosola, dhup, mahkaokʼ sunum, kunduru, darkha rasa, jạitun reakʼ sunum, holoṅ ar guhum; ḍaṅgrako, bhiḍiko, sadomko ar gạḍiko ar golamkoge.

¹⁴ Onko bạnij beparikoko mena, “Okaṭakʼ jo am do lab joṅem menletʼ tahẽkan ona do am ṭhen khon sạṅgiń akana; amakʼ joto dhon-durib ar sajaotetʼ do nosṭo akana. Ar hoṛko do tisge ona bako ńama.”

¹⁵ Okoe noako jinis bạnij beparkateko kisạ̃ṛlen onko bepariko do uniakʼ saset ńelte botorte sạṅgińreko teṅgo tahena.

¹⁶ Onko do bhabna ar rakʼ rakʼateko mena, “Hae, hae! Mĩhĩ musnạ kicricʼ ar beguni roṅakʼ ar jeṅgetʼ arakʼ kicricʼte bande akan ar sona, damanakʼ dhiri ar mạnikte abhran akan ona maraṅ nagraha do!

¹⁷ Ente mitʼ ghạṛitege amakʼ joto dhon-durib do nosṭo cabayena!” Ar mitʼke mitʼ jahaj calaoko, ar jahajte dãṛãn hoṛko, ar lạuṛiạko, ar jalapurire okoe doko bạnij beparetʼkan onko sanamko do sạṅgińreko teṅgo tahẽyena.

¹⁸ Ar uni rapage reakʼ dhũạ ńelte onko do ãṭ aṛaṅteko menkeda, “Okaṭakʼ nagraha do noa maraṅ nagraha lekana?”

¹⁹ Onko do akoakʼ bohokʼre dhuṛiko er joṅa ar rakʼ rakʼteko mena, “Hae, hae, ona maraṅ nagraha do! Ar jalapurire okoekoakʼ jahaj menakʼtako onko do uniakʼ dhon-duribtegeko kisạ̃ṛlena; ar ńelpe mitʼ ghuṛitege ona do ḍahao maraoena!”

²⁰ Unre uni serma goḍet doe menkeda, “E serma, ona nagraha ḍahao maraoen iạte rạskạkʼme. E Isorren hoṛko, apostolko ar nạbiko hulạsokʼpe. Ape birudre uni okae cekaletʼ ona lạgitʼ Isor do uniye bicạr akadea.”

²¹ Tayomte mitʼṭen daṛeanicʼ serma goḍet do maraṅ jante dhiri lekanakʼ mitʼṭen dhiri jalapurire lebda giḍikateye menkeda, “Nonkage ona maraṅ nagraha Babel do lebda giḍi ocokʼa. Ona do ar tishõ baṅ ńamokʼa.

²² Okoe peṛesaṅko banam, arko sereń ar tiriạ ar siṅgạko oroṅ onkoakʼ saḍe do ar tishõ amre baṅ ańjomokʼa. Amre tishõ gạkhuṛ kạrigol do ar bako ńamokʼa. Ar amre jante reakʼ saḍe do ar tisge baṅ ańjomokʼa.

²³ Amre diuhe reakʼ marsal do tishõ baṅ jolokʼa. Jãwãe beṭa ar bạhu kuṛiyakʼ aṛaṅ amre ar tishõ baṅ ańjomokʼa. Amren bạnij bepariko do dhạrtire joto khon napṛakʼko tahẽkana, ar sanam jạtrenko do amakʼ jạduteko bulạulena.

²⁴ Nạbiko, Isorren hoṛko ar okoeko hoṛ do noa dhạrtireko gocʼ ocolen onkoakʼ mãyãm do noa Babelrege ńamakana.”