Johan sodor 13 - Santali Common Language New Testament

Jalapuri khone oḍok hijukʼkan janwar reaṅ

¹ Noa tayom iń do mitʼṭen janwar jalapuri khon rakapʼ hijukʼ kaniń ńelkedea. Uniakʼ do gel goṭecʼ dereń ar eae goṭecʼ bohokʼ tahẽkantaea. Ona dereńko cetanre gel goṭecʼ mukuṭ tahẽkana ar bohokʼko cetanre Isor bemanote reakʼ aema ńutum ol tahẽkana.

² Uni janwar do ńelokʼte citạ tạrupʼ lekae tahẽkana ar jaṅgako do banawakʼ leka ar moca do dhạcri kulakʼ moca leka tahẽkantaea. Ar biń do acʼakʼ daṛe, siṅghạson ar maraṅ ektiạri uni janware emadea.

³ Uniakʼ bohokʼko modre mitʼ goṭen do gujukʼ dạkhil ghạl akantae tahẽkana, menkhan ona ghạl do bogeyentaea. Onate dhạrtiren sanam hoṛko hahaṛakʼ tulucʼ uni janwarko pańja idikedea.

⁴ Biń do uni janwar ektiạriye emade tahẽkante hoṛko do uni biń Isor lekako sewawadea ar janwar hõ onkage sewawadeteko menkeda, “Nũi janwar leka cele menakʼkoa? Ar okoe baṅ uni sãoteye lạṛhại daṛeke?”

⁵ Uni janwar do sarhaokʼ lạgitʼ ar Isor bemanote lạgitʼ daṛeye emocoyena. Ar pongel bar cando hạbicʼ acʼakʼ ektiạri jemone khaṭao daṛeakʼ ona lạgitʼ hukume em ocoyena.

⁶ Unre uni janwar do Isor birudre, uniakʼ ńutum reakʼ ar uniakʼ tahen jaega birudre ar sermare tahenkanko birudre ạḍi bemanot kathako roroṛe ehopʼena.

⁷ Isorren hoṛko lạṛhạikate bhagaoko reakʼ ektiạriye emocoyena ar mitʼke mitʼ bõsren, disạmren, pạrsiren ar jạtren hoṛko cetanre hõ ektiạriye emocoyena.

⁸ Okoe doko noa dhạrtirenkan, metakʼme dhạrti rehetʼ khon gocʼ ocolen Bheḍa Hoponakʼ jion puthire okoekoakʼ ńutum ol bạnukʼtako onko sanamko do Isor leka uniko sewawaea.

⁹ Ańjom lạgitʼ lutur menakʼtayicʼ do sostor reakʼ noako kathae ańjomma.

¹⁰ Okoe kạidi hoyokʼ reakʼ katha menakʼtae uni do kạidiye hoyokʼa. Okoe tarwaṛeteye gogocʼ uni do tarwaṛetegeye khũn ocokʼa. Onate Isorren hoṛko do sombhuri ar pạtiạu reakʼ jạruṛ menakʼtakoa.

Dhạrti khone rakapʼ hijukʼkan janwar

¹¹ Noa tayom iń do ot khon ar mitʼṭen janwar rakapʼ hijukʼkaniń ńelkedea. Uniakʼ do bheḍa leka barea dereń tahẽkantaea, menkhan uni do biń leka kathae roṛetʼkan tahẽkana.

¹² Nui janwar do pạhilicʼ janwar reakʼ joto ektiạri calaoe ehopʼena; ar okoe doko noa dhạrtiren kan onko hotete uni pạhilicʼ janwar, metakʼme okoeakʼ ghạl boge akantae uni do Isor menteko sewawadea.

¹³ Uni do maraṅ maraṅ hahaṛa kạmikoe ehopʼkeda, ar hoṛko samaṅre serma khon dhạrtite seṅgele pheḍ ạgukeda.

¹⁴ Ar okako hahaṛa kạmi lạgitʼ ektiạriye emocolen onako kạmikate hoṛko bhul horte idikoe ehopʼkeda. Ar Pạhilicʼ janwar okoe do tarwaṛeteye ghạl ocolenre hõ jiwetʼe tahẽkan, uni dosaricʼ janwar do hoṛkoe metatʼkoa jemon onko do uniakʼ muṭhạnko benaotae.

¹⁵ Ar uni do ona muṭhạnre jiwi emokʼ reakʼ daṛe hõe emocoyena, jemon muṭhạn do kathae roṛ daṛeakʼ ar okoe ona muṭhạn bako sewawakʼ onko doko gocʼ ocokʼa.

¹⁶ Uni do kạṭicʼ lạṭu, reṅgecʼ kisạ̃ṛ, sạdhinko ar golamko, sanamko jojom tire baṅkhan moloṅre mitʼṭen cinhại hatao ocoketʼkoa.

¹⁷ Onate ona cinhạ metakʼme uniakʼ ńutum se cinhạ chaḍa okoe hõ cetʼge bako kiriń ạkriń daṛeada. Ona cinhạ do hoyokʼ kana uni janwarakʼ ńutum se uniakʼ ńutum reakʼ lekha.

¹⁸ Noako bujhạu do bud reakʼ jạruṛ menakʼa. Okoeakʼ bud menakʼ uni do janwarakʼ lekhae hisạbma, ente ona do mitʼṭen manwawakʼ ńutum reakʼ lekha kana. Ar ona lekha do hoyokʼ kana turui sae turui gel turui.