Johan sodor 12 - Santali Common Language New Testament

Maejiu ar Biń reaṅ

¹ Tayomte sermare mitʼṭen maraṅ cinhạ ńelena; mitʼṭen maejiu, one okoe do siń candoteye oyo akan ar uniakʼ jaṅga latare do ńindạ candoe tahẽkan. Uniakʼ bohokʼre do gelbar goṭecʼ ipilte gathao akatʼ mitʼṭen mukuṭ tahẽkana.

² Uni do bhạrti hoṛmoe tahẽkana ar hasoteye kikiạukʼkan tahẽkana.

³ Ona tayom sermare armitʼṭen cinhạ ńelena; seṅgel leka maraṅ okocʼ mitʼṭen arakʼ bińge. Uniakʼ do eae goṭecʼ bohokʼ ar gel goṭecʼ dereń ar bohokʼre eae goṭecʼ mukuṭ tahẽkana.

⁴ Uni do acʼakʼ canḍbolte sermaren pe hạṭiń reakʼ mitʼ hạṭiń ipilkoe or ạguketʼkote dhạrtiteye lebda giḍikatʼkoa. Ar okoe maejiuren gidrại hoy lạgidokʼkan tahẽkan uni samaṅre biń doe teṅgoyena jemom gidrại janam lekhangeye utʼgotʼkae.

⁵ Ar maejiuren do mitʼṭen koṛa gidrại hoyena. Uni gidrạge mẽṛhẽtʼ reakʼ ṭheṅgate sanam jạtrenkoe ḍanṭaokoa. Uni Hopon do Isor ar uniakʼ siṅghạson ṭhene rakapʼ idi ocoyena,

⁶ uni maejiu do hahaṅkarteye dạṛkeda. Isor do ona hahaṅkar jaegare uni lạgitʼ mitʼṭen jaegae ṭhik dohoakatʼ tahẽkana, jemon mitʼ hajar barsae turui gel din onḍeye ạsul ocokʼ.

⁷ Ona tayom sermare lạṛhại hoyena. Mikạel ar uniren goḍetko do uni biń tulucʼko lạṛhạiyena ar uni bińren goḍetko hõ.

⁸ Biń do bae daṛelena ar sermare onko do ar bako tahẽ ocowatʼkoa.

⁹ Unre uni maraṅ okocʼ biń ar uniren soṅgeten goḍetko do dhạrtiteko lebda ńur ocoyena. Nui biń doe hoyokʼ kana uni mare bińge okoe do Diabol Soetanko metaekan. Uni do dhạrtiren sanam hoṛko bhul horteye idiyetʼkoa.

¹⁰ Ona tayom iń do serma khon ãṭ aṛaṅte mitʼ hoṛ roroṛkaniń ańjomkedea, “Ńitokʼ do babańcao, daṛe ar aboren Isorakʼ rajosṭi ar uniren ojokʼicʼakʼ ektiạri hoeakana, ente okoe aboren boehakoe dusiyetʼko tahẽkan uni do serma khone lebda ńur ocoakana. Aboren Isor samaṅre siń ńindạ uni do onkoakʼ doskoe udukʼetʼ tahẽkana.

¹¹ Bheḍa Hoponakʼ mãyãm ar apnarakʼ gohate onko do uniko bhagao akadea. Onko do apnar dulạṛ baṅkate akoakʼ jiwi emokʼge rạjiko tahẽkana.

¹² “Onate E serma, hulạsokʼme; ar ape okoe do onḍepe tahenkan, hulạsokʼpe. Menkhan dhạrti ar jalapuri abenre do hae hae, ente Soetan do aben cetanreye pheḍ hecʼakana. Soetan do raṅgaoteye phulạu akana, enteye baḍaea uniakʼ do ḍher somoe bạnukʼtaea.”

¹³ Ado uni biń tinreye ńelkeda je, acʼ do dhạrtiteye lebda ńur ocoakana unre okoe maejiuren koṛa gidrại hoelentae uni tayomreye lagaoena.

¹⁴ Unre uni maejiu do maraṅ okocʼ mitʼṭen pajhaṛakʼ barea phạ̃krạ̃kʼe emocoyena jemon hahaṅkarte acʼakʼ jaegateye uḍạu calao daṛeakʼ. Ar onḍe uni do bińakʼ mẽtʼãhã samaṅ khon danaṅre pe bochor tala hạbicʼe ạsul ocokʼa.

¹⁵ Unre uni biń do maejiue ạtu gotʼkae lạgitʼ acʼakʼ moca khon gaḍa dakʼ leka dakʼe ạtu oḍok ocokeda,

¹⁶ menkhan dhạrti do uni maejiue goṛowadea. Ar uni biń do moca khon oka dakʼe oḍok ocoketʼ ona do dhạrti acʼakʼ mocae jhicʼketʼteye ańjetʼgotʼkada.

^17-18 Unre biń do uni maejiu cetanre ạḍi bạṛicʼe raṅgaoena. Ar uni maejiuakʼ bõsren sarecʼ hoṛko, metakʼme okoe do Isorakʼ hukumko manaoetʼkan ar Jisuakʼ sikhnạtko sapʼ dohoyetʼ onko birudre lạṛhại lạgitʼe oḍok calaoena ar jalapuri aṛereye teṅgo tahẽyena.