Johan 7 - Santali Common Language New Testament

Boehakoakʼ bepạtiạu

¹ Noa tayom Jisu do Gạlilregeye dãṛãnkan tahẽkana. Ar Jihudi mukhiạko gojeko menetʼ tahẽkante uni do Jihudạ disạmre dãṛãne bạgikeda.

² Unre Jihudikoakʼ chạuni-porob do sor hecʼakan tahẽkana.

³ Onate uniren boehakoko metadea, “Noa jaega bạgiyakʼte Jihudạ disạmte calakʼme, jemon okakom kạmikan ona do amren celakoko ńel daṛeakʼ.

⁴ Jãhãe acʼte sodorokʼe menjoṅ khan uni do oko okote cetʼge bae kạmiya. Ado noakom kạmikante am do hoṛko samaṅre udugokʼme.”

⁵ Ar acʼren boehako hõ Jisu do bako pạtiạuaekan tahẽkana.

⁶ Onate Jisu do onkoe metatʼkoa, “Ińakʼ okte do ńit hõ ạuriạtińạ, menkhan ape do jaoge menakʼtapea.

⁷ Dhạrtiren hoṛko ape do bako kurudapea menkhan iń doko kurudạńgea, ente onko reaṅ noa gohań emeda je, onkoakʼ joto kạmi do bạṛicʼgetakoa.

⁸ Do, apege porobte calakʼpe. Ińakʼ okte do ńit hõ baṅ purạu akante bạń sen hataṛokʼ kana.”

⁹ Noako katha menkate Jisu do Gạlilregeye tahẽyena.

¹⁰ Ado acʼren boehako porobteko senen khan acʼ hõ onḍeye calaoena, menkhan sodorte do baṅ bickom oko okotege.

¹¹ Ar porobre Jihudi mukhiạko do Jisu ńam baṛayeko ehopʼena arko menkeda, “Uni hoṛ do okare menaea?”

¹² Ar hoṛko hõ bhiṛ talare Jisu reaṅko phasar phusuretʼ tahẽkana. Adomko doko menkeda, “Uni do bhage hoṛ kanae.” Arhõ adomko doko menkeda, “Baṅ, uni do hoṛkoe bulạuetʼkoa.”

¹³ Menkhan Jihudi mukhiạko botorte okoe hõ uni reaṅ sodorte do cetʼge bako roṛetʼ tahẽkana.

Chạuni-porobre Probhu Jisuakʼ sikhạuna

¹⁴ Ado porob adha ạdhiyen khan Jisu do mundilre bolokate cetʼakoe ehopʼena. Noate Jihudi mukhiạko do hahaṛayenteko menkeda,

¹⁵ “Nui hoṛ do jãhãn sikhnạt bae ńamakatʼre hõ cekate noako reaṅ doe baḍaekana?”

¹⁶ Jisu do onkoe metatʼkoa, “Oka cecetʼakʼ iń emokʼkan ona do ińakʼ do baṅkana, menkhan okoeye kolakadiń, uniakʼ kangea.

¹⁷ Jãhãe uniakʼ sanaleka senokʼe menjoṅ khan enḍekhane bujhạu daṛeakʼa noa cecetʼakʼ do Isor secʼ khonakʼ kana se iń nij khoniń roṛeda.

¹⁸ Okoe nij khon kathae roṛ uni do acʼakʼ sabasigeye ńam baṛaea, menkhan okoe kolakadiyicʼ reakʼ sabasiye ńam baṛayetʼkan uni doe sạrigea ar unire jãhãn eṛeakʼ do bạnukʼa.

¹⁹ Mose do cetʼ ạn-ạriko bae emakatʼpea? Menkhan ape modre okoe hõ onako ạn do bape manaoeda. Enḍekhan cedakʼ gojeń lạgitʼ dope kurumuṭuyeda?”

²⁰ Onkoko roṛ ruạṛadea, “Amre do bhut menaea; okoe am gocʼme lạgitʼ doe kurumuṭu kana?”

²¹ Jisui metatʼkoa, “Iń do mitʼṭen iń kạmi akatʼte sanamkope hahaṛakʼ kana.

²² Mose do khatnakʼ reakʼ ạne emakatʼpea, ar jirạukʼ mãhãre hõ ape dope khatnayetʼkoa. Menkhan noa niạm do Mose khonakʼ do baṅkana, mare hapṛamko ṭhen khonge hecʼ ạguakana.

²³ Moseakʼ ạn alo rạpud lạgitʼ jirạukʼ mãhãre gidrạkope khatnayetʼko khan, enḍekhan jirạukʼ mãhãre mitʼṭen hoṛiń bogekedete cedakʼpe edreạń kana?

²⁴ Mẽtʼãhã ńelte do alope bicạra bickom hok reakʼge bicạrpe.”

²⁵ Unre Jerusalemren adom adom hoṛko menkeda, “Mukhiyạko gojeko menetʼkan hoṛ do cetʼ nui kangeae?

²⁶ Menkhan uni ma khulạsate kathae roroṛkan, ar mukhiạko hõ coṅ cetʼge bako metaekan. Enḍekhan onko do cetʼ sạrigeko baḍae oromkedea, nui doe Mạsi kana mente?

²⁷ Tobe abo mabon baḍaege nui do oka khone hecʼakana mente. Menkhan Mạsiye hecʼlenre okoe hõ bako baḍaeyea uni do oka khone hecʼakana.”

²⁸ Ona tayom Jisu do mundilreye cetʼakokan tahẽkanre ãṭ aṛaṅteye menkeda, “Ape do iń hõpe baḍae akadińạ, ar oka khoniń hecʼ akana ona hõpe baḍaegea. Ente ińte do bạń hecʼakana, menkhan sạri Isorgeye kolakadińa.

²⁹ Uni do bape baḍae akadea menkhan iń doń baḍae akadea, ente iń do uni ṭhen khongeń hecʼakana ar unige iń doe kolakadińạ.”

³⁰ Noa iạte onko hoṛ do Jisu sabeko menetʼ tahẽkana, menkhan un hạbicʼ hõ okte baṅ hoeakantae tahẽkante okoe hõ bako joṭetʼledea.

³¹ Menkhan ḍher hoṛge Jisure pạtiạuenteko menkeda, “Nui do aema hahaṛawakʼkoe kạmi kana. Mạsiye hecʼlenre noako khon hõ bạ̃ṛti hahaṛawakʼko cetʼ bae kạmiya?”

³² Hoṛko Jisu reaṅko phasar phusuretʼkan ona do Phạrusikoko ańjomkeda. Unre maraṅ naekeko ar Phạrusiko do Jisu sabe lạgitʼ peadakoko kolketʼkoa.

³³ Jisui metatʼkoa, “Ape talare ḍher din do bạnuńa. Ona tayom okoeye kolakadiń uni ṭheniń ruạṛ calakʼa.

³⁴ Arpe ńam baṛayińạ menkhan bape ńameńa, ar okareyiń tahen onḍe hõ ohogepe sen daṛelena.”

³⁵ Jisuakʼ noa kathate Jihudi mukhiạko do ako talareko menkeda, “Nui hoṛ do okateye calakʼte babon ńam daṛeaea? Baṅ do Junạniko talare chir chạtur akan Jihudiko ṭhen senkate Junạnikoe cetʼako?

³⁶ Enteye meneda, ‘ńam baṛańape menkhan bape ńameńa, ar iń okareń tahen onḍe do ohope sen daṛelena,’ noa katha reakʼ mane do cetʼkana?”

³⁷ Ado porob reakʼ mucạtʼ din do mitʼṭen asol din tahẽkana. Enhilokʼ Jisu doe teṅgoyente ãṭ aṛaṅteye menkeda, “Jãhãe hoṛ tetaṅede khan uni do iń ṭhene hijukʼma ar dakʼe ńũ idijoṅma.

³⁸ Ińre pạtiạukʼkạnicʼ do sonot sostor reakʼ katha leka uniakʼ ontor khon jiwetʼ dakʼ reakʼ gaḍa ạtu oḍokokʼa.”

³⁹ Noa do uni Jiu reaṅe roṛkeda, one okoe acʼre pạtiạukʼte sonot Jiuko ńame. Unre sonot Jiu do bae emakan tahẽkana, ente un hạbicʼ Jisu hõ bae ṭhonok ocoakan tahẽkana.

Hoṛko talare katha baṅ jurikʼkan

⁴⁰ Ado noako katha ańjomkate gadel hoṛko modre adomko doko menkeda, “Sạrige nui doe uni nạbi kana.”

⁴¹ Ar eṭakʼko doko menkeda, “Nui kangeae Mạsi do.” Menkhan adomko doko menkeda, “Mạsi do cetʼ Gạlil khone hijukʼa?

⁴² Sonot sostorre cetʼ bae meneda, Dạud bõs ar Dạude tahẽkan Betlehem khonge Mạsi doe janamokʼa mente?”

⁴³ Nonkate Jisu iạte hoṛko talare bhinạ bhini hoyena.

⁴⁴ Onko modre adomko do Jisu sabeko menetʼ tahẽkana menkhan okoe hõ unire hat bako lagaoleda.

⁴⁵ Ar okoe peadakoko kol ocolen onko do maraṅ naeke ar Phạrusiko ṭhenko ruạṛ hecʼen khanko kuli ocoyena, “Uni do cedakʼ bape ạguledea?”

⁴⁶ Adoko menkeda, “Uni hoṛ cetʼ lekae roṛetʼkan onka do okoe hõ tisge bako roṛakada.”

⁴⁷ Noate Phạrusiko do onko peadakoko metatʼkoa, “Ape hõpe bulạu ocoyena se cetʼ?

⁴⁸ Mukhiyạko se Phạrusiko modren okoe hõ coṅ unirema bacoko pạtiạu akan.

⁴⁹ Menkhan noko hoṛko, noko do Moseakʼ ạn-ạriko hõ bako baḍaea; nokore do sarap paṛao akana.”

⁵⁰ Nikodemus, okoe do lahare Jisu ṭhene senlen, uni do Phạrusiko modren mitʼ hoṛe tahẽkana.

⁵¹ Uni doe metatʼkoa, “Jãhãe hoṛakʼ moca katha begor ańjomte ar cetʼe ceka kana begor baḍaete sạjại emae do cetʼ aboakʼ ạnre menakʼgea?”

^52-53 Phạrusiko do Nikodemusko roṛ ruạṛadea, “Am hõ cetʼ Gạlilren hoṛ kanam? Sonot sostor ḍunḍhạukate ńelme, Gạlilre jãhãe nạbi janamokʼ reakʼ katha do bạnukʼa.”