Jakob 5 - Santali Common Language New Testament

Kisạ̃ṛko lạgitʼ cehaona

¹ E kisạ̃ṛko ańjompe. Apere okaṭakʼ kosṭo hijukʼkan ona lạgitʼ rakʼ homorpe ar hae haeyokʼpe.

² Apeakʼ dhon-durib do sea akantapea ar apeakʼ kicricʼko doko jạrnḍi akada.

³ Apeakʼ sona ar rupạre joṅ dhorao akana, ar ona joṅ dhoraoge ape birudre gohae ema ar seṅgel leka apeakʼ jele jomtapea. Ape do sesa sisi dinkore dhon-duribpe sońj akawana.

⁴ Apeakʼ khetre okoe kạmiyạko phosolko samṭao akatʼtape onko do kuṛại bape emakatʼkoa; ar ńelpe, ona kuṛại do ńitokʼ ãṭ aṛaṅteye dusiyetʼpea. Sanam daṛean Probhuakʼ luturre onko kạmiyạkoakʼ rakʼ do seṭerakana.

⁵ Noa dhạrtire ạḍi nirạite dinpe ṭalaoeda ar bin sambṛaokʼtepe ten ocoakana. Gujukʼ din lạgitʼpe logno akana.

⁶ Ape do dhorom hoṛkope dusi akatʼkoa arpe gocʼ akatʼkoa, ar onko do bako tạkicʼ daramletʼpea.

Sombhuri tahen reaṅ

⁷ Onate E boehako, tin hạbicʼ Probhu bae hijukʼ unhạbicʼ jiwi hataṛkate jotowakʼ sahaope. Cetʼleka casa do khet reakʼ damanakʼ phosol lạgitʼe ńel horetʼkan ar pạhil ar mucạtʼ dakʼ lạgitʼe sombhuriyetʼ, ona mape ńeletʼkange?

⁸ Ape hõ onkage sombhuripe ar ontorre teṅgo ṭak akae tahenpe, ente Probhu do ạḍi usạrageye hijukʼ kana.

⁹ E boehako, Isor jemon apeakʼ dosko aloe sabtape onate ape apere dos alope lade joṅa. Ńelpe, bicạricʼ do duạr sorreye hecʼakana.

¹⁰ E boehako, okoe nạbiko Probhu secʼ khon kathako roṛakatʼ, ar kosṭo oktere cetʼlekako sombhuri akatʼ tahẽkana ona katha do hudiskate ńelpe.

¹¹ Okoe sombhurikateko sahao akatʼ onko do bhạgankole metako kana. Ape do Jobe sumbrạuletʼ reakʼ kathape ańjomakada ar Probhuakʼ kạmi reakʼ mucạtʼ jo do bhagegea mente ona hõpe ńelakada. Probhuakʼ daya ar mãyã reakʼ mucạtʼ do bạnukʼa.

¹² E ińren boehako, iń do asokaete noa kathań metapekana, ape do serma, ar ot se eṭakʼ jãhãnakʼ ńutumte alope kiriạkʼa. Ona khon bickom, “Hẽ khan hẽ, ar baṅ khan baṅ,” hoyokʼtape ma, jemon bicạrre alope paṛaokʼ.

Biswạsteakʼ koejoṅ

¹³ Ape modre cetʼ jãhãe duke jomeda? Uni doe koejoṅ ma. Jãhãe sukre menaea?

¹⁴ Uni doe sarhao sereń ma. Jãhãe ruạreye paṛao akana? Uni do manḍerren mukhiyạkoe hoho jarwakoma. Onko do Probhu ńutumte uniakʼ bohokʼre sunumko ojokʼaete uniko koeyae ma.

¹⁵ Ar pạtiạuteakʼ koejoṅ do uni ruạkʼkan hoṛe bogeyea; Probhuge uni doe bogeyea. Ar uniye kại akatʼ khan Isor do uniye ikạyea.

¹⁶ Onate ape apere kạiko aṅgocpe ar ape ape lạgitʼ koejoṅpe, jemonpe bogekʼ. Isorakʼ sana leka okoeye calakʼkan uni do koejoṅ reakʼ daṛe menakʼtaete onae hoe ocoea.

¹⁷ Eliạ do abo lekage mitʼṭen manwae tahẽkana. Ar nehõr salakʼe koekeda jemon dakʼ hõ alo dag, ar pe bochor tala disạmre bae dakʼleda.

¹⁸ Uni do arhõe koekeda; unre serma do dakʼe emena ar ot do phosole omon ocokeda.

¹⁹ E ińren boehako, ape modre jãhãe sạriakʼ khone chingạulen khan ar ape modren jãhãe uniye ạcur ruạṛle khan,

²⁰ enḍekhan noa katha baḍaekakʼpe, jãhãe mitʼṭen kại hoṛ bhul hor khone ruạṛ ạguiye uni do gujukʼ khone bańcaoea ar ạḍi utạr kạiye dapaltaea.