Jakob 3 - Santali Common Language New Testament

Alaṅ dobnao reaṅ

¹ E boehako, ape modre sanamkoge guru do alope hoyokʼa, entepe baḍaegea, abo do guru iạte eṭakʼko khon arhõ kajak bicạr hoyokʼtabona.

² Abo do sanamkoge ạḍi lekate bon behokeda. Jãhãe katha hotete bae behoketʼ khan enḍekhan uni doe dhoromgea; ar uni do goṭa hoṛmoe sambṛao daṛeakʼa.

³ Sadomkoakʼ mocare jhinbo lagaole khan, jãhãrege sana bon onḍege bon idi daṛeakoa.

⁴ Arhõ ńelpe, jahaj do maraṅgere hõ ar kajak hoete ṭhelao idikʼkanre hõ calaoicʼ do eken mitʼṭen huḍiń paṭwarte jãhãsecʼge monae ontegeye idi daṛeakʼ kana.

⁵ Alaṅ hõ onkage; hoṛmo reakʼ mitʼṭen huḍiń utạrakʼ hạṭińkanre hõ ona do ạḍi maraṅ maraṅ kathakoe roṛa. Arhõ huḍiń huḍiń seṅgelte mitʼṭen napṛakʼ bire ḍahao marao daṛeakʼa!

⁶ Onkage alaṅ hõ ṭhik seṅgel leka. Aboakʼ hoṛmore tinạkʼ hạṭińko menakʼ ona modre alaṅ do mitʼṭen bedhorom dhạrti lekana. Norok seṅgelre lokʼte ona do goṭa hoṛmoe nosṭoyeda ar jion reakʼ horre seṅgele salgaoeda.

⁷ Manwa do joto lekan janwarko, cẽṛẽko, leńokʼ ṭunḍạńko ar dakʼren jiwiyankoe koboj daṛeakoa arko kobojetʼkogea,

⁸ menkhan alaṅ do okoe hõ bae koboj daṛeakʼa. Ona do baṅ sambṛaokʼa, bạṛicʼ ar botor bisanakʼte perecʼgea.

⁹ Noa alaṅte aboren Probhu, metakʼme Isor Baba bon sarhaoede kana, arhõ noa alaṅte uniakʼ muṭhạnte benao akan hoṛ bon sarapako kana.

¹⁰ Aboakʼ inạ moca khonge sarhao ar sarap oḍokokʼ kana. E ińren boehako, nonka hoyokʼ do baṅ bhagea.

¹¹ Inạ mitʼ jaega khon ạtu oḍok hijukʼkan dakʼre do cetʼ heṛem ar haṛhatʼ dakʼ tahena?

¹² E boehako, loa darere jạitun jo do cetʼ jo daṛeakʼgea? Se darkha nạ̃ṛĩre cetʼ loa jo do jokʼgea? Onkage raham dakʼre heṛem dakʼ do baṅ ńamokʼa.

Bar lekan akel

¹³ Ape modre akel ar budan hoṛ doe okoe kana? Uni do acʼakʼ bhage cạl-colonte akel khon oḍokokʼkan mạ̃hirtetʼ reakʼ kạmiye udugma.

¹⁴ Menkhan apeakʼ ontor do hiskạte haṛhatʼ ar dola duli menakʼ khan enḍekhan akel reakʼ do alope sarhaokʼa, ar sạriakʼ do alope ạuṛiaga.

¹⁵ Nonkan akel serma khon do baṅ pheḍ hijukʼa, bickom ona reakʼ jopoṛao do dhạrti reakʼ bạṛicʼ sana ar bạṛicʼ jiuko sãotege;

¹⁶ ente okare hiskạ ar dola duli tahen onḍege gulmal ar joto lekan bedhoromakʼko hõ tahena.

¹⁷ Menkhan oka akel serma khon hijukʼkan ona do pạhilre khạṭi, ar ona tayom do sulukte perecʼgea; onare sahao daṛe ar mạ̃hirtetʼ tahena; ona do daya ar bhage kạmire perecʼtetʼge, bin digdhạ ar bin phạsiarawakʼge.

¹⁸ Okoe sulukokʼ lạgitʼko kurumuṭukan onko do sulukte itạko ereda ar ona reakʼ jo do hoyokʼ kana dhorom jionge.