Jakob 2 - Santali Common Language New Testament

Sanamko somante beṅgetʼako

¹ E ińren boehako, aboren ṭhonokte perecʼ Probhu Jisu Mạsirepe pạtiạu akan khan sanamko somante beṅgetʼ akope.

² Mitʼṭen hoṛ do sona reakʼ mundạm ar mońj kicricʼ horokʼkate apeakʼ sunạgogteye hecʼena; onkage ar mitʼṭen reṅgecʼ hoṛ hõ mạilạ kiricʼ horokʼkateye hecʼena.

³ Unre ape do mońj kicricʼ horokʼ akatʼ hoṛ bạ̃ṛti manot emaetepe metae, “Am do noa bhage jaegare duṛupʼme,” ar uni reṅgecʼ hoṛ dope metae, “Onḍe teṅgo hataṛokʼme,” se “Nonḍe jaṅga pheḍre duṛupʼme,”

⁴ Enḍekhan apnar talare cetʼ kạṭicʼ ar lạṭu reakʼ bape sirjạueda ar bạṛicʼ monsubạte bape bicạreda?

⁵ E ińren dulạṛiạ boehako, ańjomtińpe. Dhạrti secʼte okoeko reṅgecʼge, onkoge cetʼ Isor do biswạsre kisạ̃ṛokʼ lạgitʼ bae bachao akatʼkoa? Okoe Isorko dulạṛedekan onko do uni okaṭakʼ rajosṭi udukʼako lạgitʼe gokʼatʼko tahẽkan ona rajosṭiren bhạgiạdarko hoyokʼ lạgitʼ cetʼ noko reṅgecʼ hoṛko bae bachao akatʼkoa?

⁶ Menkhan onko reṅgecʼ hoṛkoge ape dope bemanot akatʼkoa. Kĩsạ̃ṛ hoṛkoge cetʼ bako kosṭoyetʼpea ar adalotte bako or idiyetʼpea?

⁷ Okoeakʼ ńutum lekatepe hoho ocokʼkan kĩsạ̃ṛko do cetʼ ona manot ńutum bako opomanwakʼkana?

⁸ Sonot sostorre olakana, “Am aḍepaseren hoṛ apnar leka dulạṛem.” Ape do Mạsiakʼ rajosṭi reakʼ ạn sạṛigepe manaoetʼ khan enḍekhanpe bhageyetʼgea.

⁹ Menkhan jotoko somante bape beṅgetʼakokan khan enḍekhanpe kạiyeda. Ar noa ạnge unre ạn bebataoko menteye dusipea.

¹⁰ Okoe hoṛ ạn-ạri pańjakatere hõ eken mitʼṭen babotreye kại uni do joto ạn-ạrikogeye bebataoetʼ kana.

¹¹ Okoeye menakatʼ, “Alom loṭghuṭia,” Unige arhõe meneda, “Alom khũna.” Enḍekhan ape do loṭghuṭi baṅkatepe khũn khan enḍekhan ạn bebataoko do cetʼ bape hoyokʼ kana?

¹² Okaṭakʼ ạn do manwa sạdhine danako kan ar ona ạn hotete okoekoakʼ bicạr hoyokʼ, onko lekage katha roṛpe ar beoharpe;

¹³ ente okoe bae daya akan, bicạrre uni hõ daya do bae ńama. Bicạr cetanre daya doe jitạukʼa.

Kạmi hotete biswạs udug reaṅ

¹⁴ E ińren boehako, jãhãeye men uniakʼ do biswạs menakʼtaea menkhan kạmire ona bae udug enḍekhan ona reakʼ do cetʼ porho menakʼa? Ona biswạs do cetʼ kại khone bańcao daṛeaea?

¹⁵ Ape modre jãhãe boeha se miserawakʼ oṛakʼre jomakʼ, ar horokʼ lạgitʼ kicricʼ hõ bạnukʼtae,

¹⁶ ar jãhãe uniye metae, “Amakʼ bhage hoyokʼma, jom ńũkate mońjte tahenme,” Menkhan jạṛuṛakʼ jãhãnakʼge bape bebostawae enḍekhan onate uniakʼ do cetʼ jãhãn porho hoyokʼtaea?

¹⁷ Ṭhik onkage, okaṭakʼ biswạs sãote kạmi reakʼ jopoṛao bạnukʼ ona biswạs do gocʼgea.

¹⁸ Jãhãeko mendaṛekea, “Am do biswạs menakʼtama ar ińakʼ do kạmiko menakʼtińạ.” Kạmiko begorte amakʼ biswạs udukʼạńme ar iń do kạmi hotete ińakʼ biswạiń udukʼama.

¹⁹ Am do mitʼ Isorrem pạtiạu akana? Bhagegea! Menkhan bạṛicʼ jiuko hõ coṅ ona mako pạtiạukʼkan ar botorteko dhak dhakaokʼkan.

²⁰ E lelha! Kạmi begor biswạs je gocʼge ona reakʼ cetʼ cinhạm khojkana?

²¹ Aboren hapṛam Abraham do acʼren hopon Isạhak pinḍreye dãṛẽyede tahẽkanre ona kạmi lạgitʼ cetʼ uni do dhorom mente bae aṅgoclena?

²² Am mam ńeletʼkangea je, biswạs ar kạmi unre uni do mitʼ dhaoteye kạmileda ar uniakʼ ona kạmige biswạsre perecʼtetʼe danadea.

²³ Nonkate sonot sostor reakʼ katha do purạulena, “Abraham do Isorakʼ kathae biswạsada ar onate Isor do dhorom menteye aṅgockedea.” Onate uni do Isorren dulạṛiạ menteye hoho ocolena.

²⁴ Enḍekhanpe ńeleda, eken biswạstege Isor do manwa dhorom menteye aṅgocea ona do baṅ, menkhan biswạs ar kạmi noa banar iạtege Isor do manwa dhorom menteye aṅgocedea.

²⁵ Rahab kusmbi do cekate dhorom menteye lekha ocolena? Uni do Jihudiren paṭhaonakine okoketʼ kinạ ar eṭakʼ horteye kolgotʼkatʼkinạ, ar noa kạmi iạte dhorom menteye aṅgocena.

²⁶ Jiwi begor hoṛmo cetʼleka gocʼge onkage kạmi begor biswạs hõ gocʼgea.