Ibriko 8 - Santali Common Language New Testament

Jisuge nawa bondobosren maraṅ naeke

¹ Abo oka bon menetʼkan ona reakʼ asol katha do noa kana je, aboren do nonkan mitʼṭen maraṅ naeke menaea one uni do sermare maraṅ Isorakʼ siṅghạson reakʼ jojomsa aṛereye duṛupʼakan.

² Uni do maraṅ sonot jaegare, metakʼme asol sewa tạmbure Isore sewawae kana. Ona sewa tạmbu do manwa bako beretʼakada, Probhugeye beretʼakada.

³ Mimitʼ maraṅ naekeko do janwar dãṛẽ ar eṭakʼ eṭakʼ jinisko samaṅ lạgitʼko bahal ocokʼkana, onate nui maraṅ naekeakʼ hõ jãhãn dãṛẽ samaṅ reakʼ jạruṛ menakʼtaea.

⁴ Menkhan ńit noa dhạrtireye tahẽlen khan uni do maraṅ naeke ohoe hoedaṛelena, ente nonḍe do ạn-ạri lekate dãṛẽ samaṅ lạgitʼ naeke ma menakʼkoge.

⁵ Naeke lekate onkoakʼ noa kạmi do serma kạmi reakʼ mitʼṭen nạmuna ar umul leka. Onate Mose tinre sewa tạmbui benao lạgidokʼkan tahẽkana unre Isor do noa menteye sontorledea, “Sinại buru coṭre okaṭakʼ nạmunań udukʼatʼme tahẽkan ṭhik onkage jemon jotowakʼkom benao.”

⁶ Menkhan ńitokʼ bon ńeletʼkana, Jisu oka naeke reakʼ kạmiye ńamakatʼ ona do onko naekekoakʼ kạmi khon hõ bạ̃ṛti sorosgea, cetʼleka uni do bondoboste denebanar secʼe hoeakan ona bondobos do lahateakʼ khon hõ sorosgea, ente noa bondobos do arhõ bhage gokʼakʼkore ṭẽhaḍokʼ kana.

⁷ Pạhil teakʼ bondobos niphuṭge tahẽlen khan honaṅ dosar bondobos reakʼ jãhãn jạruṛge oho hoelena.

⁸ Menkhan Isor do acʼren hoṛkoakʼ dos udukʼako lạgitʼ sonot sostorreye menakada: Probhui meneda, “Okte hijukʼ kana, iń do Israel ar Jihudạ hoṛko lạgitʼ mitʼṭen nawa bondobosiń dohoea.

⁹ Misor disạm khon onkoren hapṛamko ti sapʼkateń oḍok ạguko jokhecʼ onko lạgitʼ oka bondobos iń doholetʼ tahẽkan, ona leka noa nawa bondobos do baṅ hoyokʼa. Ińakʼ ona bondobos leka bako calaolente onko secʼ do bạń beṅgetʼ ruạṛeda.” Probhu do noa kathae meneda.

¹⁰ Probhu do arhõe meneda, “Iń do Israelko lạgitʼ noa bondobos iń dohoea. Ona do hoyokʼ kana, ińakʼ ạn-ạriko onkoakʼ monreń rebetʼakoa ar onkoakʼ ontorre hõń ol dohoea. Iń do onkoren Isoriń hoyokʼa, ar onko do ińren hoṛgeko hoyokʼa.

¹¹ Apnar ato oṛakʼrenko ar apnar boehako, okoe hõ noa menkate do ar tishõ bako cetʼakoa, ‘Probhu baḍaeyeme mente,’ ente sanamkoge iń doko oromińạ.

¹² Onate iń do onkoakʼ kạiyiń ikại takoa, ar tishõ onkoakʼ kại do bạń disạ dohoetakoa.”

¹³ Isor do noa bondobos nawateye lại sodorketʼte lahateakʼ bondobos do mareakʼ menteye okoḍa ocokeda. Ar okaṭakʼ marege ar sedae reakʼ kana mente nosṭo cabakʼkan ona do usạrage danaṅokʼa.