Ibriko 1 - Santali Common Language New Testament

Serma goḍetko khon hõ Hopon doe maraṅgea

¹ Ḍher din lahare nạbiko hotete Isor do aboren hapṛamko ṭhen ạḍi dhao ar ạḍi lekate thoṛa thoṛateye galmaraoatʼko tahẽkana.

² Menkhan sesa sisi dinkore uni do acʼren Hopon hotete abokoe galmaraoatʼ bona. Isor do acʼren Hopon sanamakʼren ạidạri hoyokʼ lạgitʼe dohokedea. Ar Hopon hotetege uni do sanamakʼe sirjạukeda.

³ Isorakʼ sanam gun do uni Hopontetʼrege menakʼa; ar Hopontetʼ kangeae Isorren purạ nạmuna do. Hopon do acʼakʼ ektiạranakʼ kathate jotowakʼe calaoetʼ kana. Manwakoakʼ kại reakʼ puruchun meṭaokate Hopon do coṭ utạricʼren Isorakʼ jojomsa aṛereye duṛupʼena.

⁴ Uni do acʼ apat ṭhen khon okaṭakʼ ńutume ńamakatʼ ar cetʼleka ona do serma goḍetkoakʼ ńutum khon hõ maraṅge, onkage uni do acʼtetʼ hõ serma goḍetko khon maraṅe hoeakana.

⁵ Isor do jãhãtis cetʼ jãhãe serma goḍet noa kathae menakawadea, “Am do ińren hopon kanam, teheńge amren apatiń hoyena?” Arhõ uni do cetʼ noae menakada, “Iń do uniren apatiń hoyokʼa ar uni do ińren hopone hoyokʼa?”

⁶ Baṅ, ona do bae menakada. Isor do acʼren dulạṛiạ Hopon noa dhạrtite kole jokhecʼe menakada, “Isorren sanam goḍetko do uniko sewawae ma.”

⁷ Serma goḍetko reaṅ doe meneda, “Uni do hoe hõ acʼren goḍete hoe ocoyedea; ar jolokʼkan seṅgel do acʼren golame hoe ocoyedea.”

⁸ Menkhan Hopontetʼ reaṅ doe meneda, “E Isor, amakʼ siṅghạson do jug cetan jugge; ar amakʼ ḍanṭao do hok reakʼ ḍanṭaokangea.

⁹ Am do dhoromem dulạṛeda ar bedhorom dom kurudakʼ kana; onate Isor, amren Isor do, amren soṅgetenko khon hõ bạ̃ṛti hulạs sunum lekae ojokʼ akatʼmea.”

¹⁰ Isor do arhõe menakada, “E Probhu, am do etohopʼrege dhạrti reakʼ rehetʼem bạisạu akada; ar serma hõ amakʼ titegem benao akada.

¹¹ Onako do dhaṅ dhaserokʼa, menkhan am do jaejug hạbicʼem tahena. Kicʼricʼ lekage onako do mare cabakʼa.

¹² Oyonakʼlekage onako dom guṛhe dohokakʼa, ar kicricʼ leka onako do pherao ocokʼa. Menkhan am do enkagem tahena, ar amakʼ dinko do tishõ baṅ mucạdokʼa.”

¹³ Isor do tis baṅ jãhãe serma goḍet noa kathae menakawade, “Tin hạbicʼ amren bạiriko amakʼ jaṅga latarre bạń dohoko, unhạbicʼ am do ińakʼ jojomsa aṛere duṛupʼme?”

¹⁴ Serma goḍetko do cetʼ sanamkoge sapʼ sosor Jiuko doko baṅkana? Okoe kại khon bańcaoko ńam onko sapʼ sorako lạgitʼge coṅ onko mako kol ocoakan.