Galathiko lạgitʼ Pạul Apostolakʼ ciṭhi 6 - Santali Common Language New Testament

Gokʼ gopoṛo reaṅ

¹ E boehako, ape modre jãhãe hoṛ jãhãn dosreye paṛaolenre, enḍekhan okoe sonot Jiu tabere menakʼpe ape do onkanicʼ jut ruạṛepe. Menkhan dulạṛ monte noa kạmipe ar apnartetʼ sontor tahenpe jemon ape hõ kạire alope ńurokʼ.

² Bhạriạ gokʼ gopoṛope, ar nonkate ape do Mạsiakʼ ạnkope purạu daṛeakʼa.

³ Jãhãe jãhãnicʼe baṅkanre hõ apnartetʼ jãhãnicʼ menteye hudisokʼkan khan uni do apnartegeye bulạukʼ kana.

⁴ Mimitʼ hoṛ do akoakʼ kạmiko biḍạuma. Enḍekhan eṭakʼko sãote apnar aloko jurikʼma bickom acʼakʼ kạmi iạteye sarhaokʼma.

⁵ Ente mimitʼ hoṛ do apan ạpin bojha gogokʼ hoyokʼ takoa.

⁶ Okoe Isorakʼ kathae cetʼ ocokʼkan uni do acʼren cecetʼicʼ do acʼakʼ sanam bhageakʼ reakʼe hạṭińae.

⁷ Ape do alope bulạukʼa, Isor do ohoe siṛog ocolena; ente okoe okaṭakʼe era; uni do inạgeye ira.

⁸ Okoe acʼakʼ jel lạgitʼe era; uni do jel khonakʼ maraoakʼgeye irạ. Menkhan sonot Jiu lạgitʼe er khan uni do jaejug jiongeye ira.

⁹ Bhageakʼ kạmi kạmite alo bon mokońokʼma, ente babon loraolen khan okte nạpitre phosol bon ńama.

¹⁰ Ạt bon ńamle khan sanamko lạgitʼ bhageakʼ bon kạmima, bạ̃ṛtikaete Isorren gharońjren hoṛko bhạlạiko lạgitʼ jemon bon kạmi.

Mucạtʼ katha

¹¹ Ńelpe, ińakʼ tite tinạkʼ lạṭu lạṭu akhorkoteń olapekana.

¹² Okoe hoṛmo bahre secʼ bhage udugokʼko menjoṅkan onkoge khatnakʼ lạgitʼko jormoṭetʼpea. Mạsiakʼ krus iạte jemon aloko khed ocokʼ onate onko do nonkako kạmiyeda.

¹³ Khatna ocoakanko hõ coṅ ạn ma bacoko manaoetʼkan. Onko do khatna ocope lạgitʼ sanayetʼkoa jemon noa iạteko sarhao daṛeakʼ baṅma, ape hõ onko dolrepe hecʼakana mente.

¹⁴ Probhu Jisu Mạsiakʼ krus chaḍa ar cetʼte hõ jemon aloń sarhaokʼ. Noa krus hotetege dhạrti do iń ṭhen gocʼgea ar iń hõ dhạrti ṭheniń gocʼgea.

¹⁵ Khatna ar bin khatna do cetʼ hõ baṅkana, menkhan maraṅ katha do hoyokʼ kana Mạsi hotete nawa sirjonge.

¹⁶ Okoe hoṛ noa ạn lekateko calakʼkan onkore, metakʼme Isorren sạri Israelko uni do suluk ar mãyãe dan akoma.

¹⁷ Mucạtʼreń menkea, okoe hõ aloko duk ocoyińma, ente Jisuakʼ ghạl dagko reakʼ cinhạkoge ińakʼ hoṛmoreń asen baṛayeda.

¹⁸ E boehako, aboren Probhu Jisu Mạsiakʼ daya apeakʼ ontorre tahẽ akan tahenma. Amen.