Galathiko lạgitʼ Pạul Apostolakʼ ciṭhi 3 - Santali Common Language New Testament

Pạtiạu se Ạn-ạriko?

¹ E bebuj Galatiko, okoeye ahaketʼpea? Ape ma coṅ pusṭạutegeń porcar akatʼpe, Jisu Mạsi doe krus ocolena mente.

² Iń do eken ape ṭhen khon baḍae sanań kana, ạn-ạriko manaote cetʼ sonot Jiupe ńamledea, se bhage sombatre pạtiạu iạtepe ńamledea?

³ Ape do cetʼ nunạkʼgepe bebujgea? Sonot Jiu hotete nawa jion ehopʼkate ńitokʼ do cetʼ apnarakʼ kurumuṭute sạbit utạrokʼpe ńamjoṅkana?

⁴ Ape do cetʼ ạuṛiakʼge dukpe jomleda? Asiń dohoyeda apeakʼ duk jom do baṅ ạuṛiakʼ akantapea.

⁵ Isor do sonot Jiu cedakʼe emakatʼpea ar ape talare nunạkʼ hahaṛawakʼkoe kạmiyeda ona baṛe hudispe. Uni do cetʼ ạn-ạrikope manaoetʼkante noakoe kạmi kana, se bhage sombatrepe pạtiạu akanteye onkayeda?

⁶ Abraham disạyepe. Sonot sostorre olakana, “Abraham do Isorakʼ kathareye pạtiạuena ar Isor do dhorom menteye ataṅkedea.”

⁷ Onate noa katha baḍaejoṅpe, okoe Isorreko pạtiạukʼkan eken onko kangeako Abrahamren hoponko do.

⁸ Sonot sostorre laharege olakan tahẽkana, biswạs iạtege Isor do boṅgan hoṛ jạtrenko dhorom menteye aṅgockoa. Abraham do noa kathage bhage sombat menteye baḍae ocolen tahẽkana, “Am hotetege sanam jạtrenko do bhorko ńama.”

⁹ Onkate ńelokʼ kana, Abraham do Isorreye pạtiạuente cetʼleka bhore ńamletʼ onkage uni tayom khon okoe do Isorreko pạtiạukʼkan onko hõ inạ bhorgeko ńameda.

¹⁰ Sonot sostorre olakana, “Sarapanicʼ kanae uni do, one okoe ạn-ạri reakʼ mimitʼ hukumko leka bae senokʼkan.” Enḍekhan ńelokʼ kana, ạn-ạrire bhorsakʼkan sanamkorege noa sarap do menakʼa.

¹¹ Ona chaḍa noa hõ pusṭạugea je, ạn-ạri manaote Isor do okoe hõ dhorom mente bae ataṅkoa, ente sonot sostor reakʼ katha leka, “Okoe dhorom menteye ataṅ ocoakan uni do biswạs hotetege jione ńama.” Ente pạtiạu tulucʼ ạn-ạri reakʼ jãhãn jopoṛao do bạnukʼ anaṅ.

¹² Ạn-ạri doe meneda, “Okoe hoṛ ạn-ạrikoe manaoetʼkan uni do ona hotetege jiwetʼe tahena.”

¹³ Ar ạn bon bebataoetʼte okako sarap abore tahẽkan, ona do Mạsi acʼgeye ladeyana are chaḍaoketʼ bona. Sonot sostorre noa olakana, “Darere aka ocoakanicʼ mitʼke mitʼ hoṛ doe sarapanicʼ kana.”

¹⁴ Isor do Abraham oka bhore emade tahẽkan ona bhorge Jisu Mạsi hotete boṅgan hoṛ jạtrenko hõko ńam daṛeakʼa, ar abo hõ jemon biswạs hotete gokʼ akawatʼbon sonot Jiubon ńam daṛeae, onate Mạsi do ona sarap acʼreye ladeana.

Ạn-ạri ar gokʼakʼ

¹⁵ E boehako, iń do ạdi alga kathate noa reaṅ iń bujhạuape kana. Mitʼ dhao manwa talare jãhãnakʼ bondobos doholenre ona bondobos do okoe hõ bako bạtil daṛeakʼa se ona tulucʼ jãhãnakʼ hõ bako juṭucʼ daṛeakʼa.

¹⁶ Abraham ar uniren bõsko ṭhen Isor doe gokʼleda. Sonot sostor do bae menakada, “Bõsko ṭhen,” Metakʼme ạḍi utạr bõsko ṭhen, bickome menakada, “Amren bõsko ṭhen” Metakʼme mitʼṭen bõs ṭhen, ar uni bõsren Hopon doe hoyokʼ kana Mạsige.

¹⁷ Ińakʼ katha reakʼ mane do noage, Isor do Abraham oktere mitʼṭen kajak bondobose dohoakatʼ tahẽkana. Ar pon sae pe gel bochor tayom ạn-ạrikoe emena, ar onate laha reakʼ bondobos do baṅ bạtil lena; menkhan uniakʼ gokʼakʼ do bahal tahẽyena.

¹⁸ Isorakʼ bhor ńamokʼ do ạn-ạrikore ṭehãḍokʼkan khan enḍekhan gokʼakʼre ona do baṅ ṭehãḍokʼ kana. Menkhan Isor do dayate mitʼṭecʼ gokʼakʼ hotete Abrahame bhorade tahẽkana.

¹⁹ Enḍekhan cetʼ lạgitʼ ạn do? Ona do manwae kạiyetʼkante Isorakʼ gokʼakʼ tulucʼ ạne em juṭucʼena. Ar okoe reaṅe gokʼ dohoakatʼ tahẽkan uni Abrahamren bõs ạuriye hijukʼ hạbicʼ bahal tahen lạgitʼge ạn-ạriko do emlena. Serma goḍetko hotete mitʼṭen dene banarrenicʼ hotete noa ạn do bahal tahẽkana.

²⁰ Menkhan eken mitʼ hoṛe tahẽlen khan dene banarrenicʼakʼ jạruṛ do bạnukʼa; ar Isor doe mitʼgoṭengea.

²¹ Enḍekhan ạn do cetʼ Isorakʼ gokʼakʼko birud reakʼ kana? Khạṭige baṅa. Isor do jiwetʼ daṛe oco reakʼ mitʼṭen ạne emlen khan enḍekhan khạṭige manwa do dhorom menteye bikạu ocokokʼa.

²² Menkhan sonot sostor do sanamkoge kại iạte dusi menteye ṭarhao akatʼkoa, jemon Jisu Mạsire pạtiạukʼko do akoakʼ ona biswạs hotete gokʼ akawatʼko reakʼ bhorko ńam daṛeakʼa.

²³ Biswạs ạuri hijukʼre abo do ạn-ạrite bon esetʼ ạcur akan tahẽkana ar biswạsiko mente ạuri bon sodorokʼ hạbicʼ bon bond esetʼ ocoakan tahẽkana.

²⁴ Enḍekhan ńelokʼkana, Mạsi ṭhen seṭerokʼ lạgitʼ noa ạnge aboren ạyuricʼ do, jemon pạtiạu hotete dhorom mente bon ṭarhao ocokʼ.

²⁵ Menkhan ńitokʼ do pạtiạu hecʼakante ạn-ạri gobolre ar bạnukʼ bona.

Isorren hoponko

²⁶ Mạsi Jisure biswạs hotete ape jotoge Isorren hoponkope hoeakana.

²⁷ Ente tinạkʼ hoṛ Mạsirepe bạptis akan, ape do kicricʼ leka Mạsipe horokʼ akawana.

²⁸ Jihudi ar boṅgan hoṛ jạtrenko talare, golam ar sạdhin hoṛko talare, maejiu ar herel talare jãhãn begar do bạnukʼa, ente Mạsi Jisu tulucʼpe joṛao mitʼ akante jotoko Mạsirepe mitʼgea.

²⁹ Mạsirenpe hoeakante Abraham bõsren hoponko hõpe hoeakana. Isor do Abraham oka emae reakʼe gokʼade tahẽkan ape hõ ona sanamakʼren ạidạrikope hoeakana.