Galathiko lạgitʼ Pạul Apostolakʼ ciṭhi 1 - Santali Common Language New Testament

¹ Iń Pạul do Mạsiren mitʼṭen apostol kạnạń. Noa apostol hudạ jãhãe manwa ṭhen khon se jãhãe manwa hotete do bạń ńamakada, bickom Jisu Mạsi ar Isor Baba, one okoe do Mạsi gocʼko khone jiwetʼ beretʼkede, uni hotetegeń ńamakada.

² Iń ar iń soṅgete okoe biswạsi boehako menakʼko, ale sanamkoge Galatiạ manḍerrenko lạgitʼ ciṭhile oleda.

³ Isor Baba ar aboren Probhu Jisu Mạsi do daya ar suluke danape ma.

⁴ Aboren Isor Babawakʼ sanaleka Mạsi do aboakʼ kạiko iạte apnarakʼ jiwiye emkeda, jemon noa bạṛicʼ piṛhirenko khone rukhiyạ bon.

⁵ Jaejug hạbicʼ Isorakʼ ṭhonok baṛe hoyokʼma. Amen.

Bhage sombat do eken mitʼgoṭengea

⁶ Mạsiakʼ dayate okoe do acʼren hoṛ hoyokʼ lạgitʼe hohowatʼpe tahẽkan, uni bạgikate usạra eṭakʼ lekan bhage sombat secʼpe ạwil akan ńelte iń doń hahaṛakʼ kana.

⁷ Ona do jãhãn bhage sombatge baṅkana. Enrehõ adom hoṛ menakʼkoa one okoe do sulukte bako tahẽ ocoape kan, ar Mạsi reaṅ bhage sombat bodolko monejoṅkan.

⁸ Menkhan oka bhage sombat apele jạhir akatʼpe ona khon judạ lekan bhage sombat ape ṭhen porcarlen khan, ona do alele jạhirape se jãhãe serma goḍetgeye jạhirape, enḍekhan unire sarap paṛaokʼma.

⁹ Iń do cetʼleka pạhilteń roṛakatʼ onkage ńitokʼ hõń roṛeda, ape oka bhage sombatpe ataṅakatʼ ona khon jãhãe judạ lekan bhage sombate porcar enḍekhan unire sarap paṛaokʼma.

¹⁰ Noate iń do okoeakʼ sarhao ńamjoṅ iń kurumuṭuyeda, manwa se Isorakʼ? Se manwa kusi ocoye reakʼ iń kurumuṭu kana? Ar ńit hạbicʼ manwa kusi ocoko lạgitʼ iń kurumuṭuyetʼ khan enḍekhan Mạsiren golam doń baṅkana.

Cetʼlekate Pạul do Apostole hoyen

¹¹ E boehako, baḍae ocoyetʼpe kạnạń, oka bhage sombat iń jạhirakawatʼpe ona do jãhãe manwa hotete benaoakʼ katha do baṅkana.

¹² Jãhãe hoṛ ṭhen khon ona do bạń ńamakada se okoe hõ ona do bako cetʼ akawadińa, bickom Jisu Mạsi acʼtetʼge iń ṭhene sodorakada.

¹³ Jihudi dhoromreń tahẽkanre cetʼ lekan jioniń khemaoetʼ tahẽkan ona dope ańjomakatʼgea. Ar noa hõpe ańjomakada, Isorakʼ manḍerrenko tinạkʼ bebạṛicʼ iń khedetʼkokan tahẽkana ar maraoko lạgitʼ iń kurumuṭuyetʼ tahẽkana mente.

¹⁴ Iń umerren aema Jihudiko khon hõ ona dhoromre iń do ạḍitetʼiń laha idilena. Ona chaḍa ińren hapṛamko ṭhen khon okako ạri-cạli hecʼ ạguakan ona reaṅ hõ ạḍi jidiń tahẽkana.

¹⁵ Menkhan Isor do janam khongeye bachao doho akadiń tahẽkana ar uniakʼ dayatege apostol hoyokʼ lạgitʼe hohoakadińạ.

¹⁶ Jemon boṅgan hoṛ jạtrenko ṭhen Mạsi reaṅ bhage sombatiń porcar, onate Isor do acʼakʼ monejoṅ leka acʼren Hopon iń ṭhene sodorkedere okoe tulucʼ hõ bạń solhawana.

¹⁷ Okoe iń lahate apostolko hoelen iń do Jerusalemre onko ṭhen hõ bạń senlena. Unre iń do Arob disạmteń senakan tahẽkana ar tayomte arhõ Damesek nagrahateń ruạṛ hecʼena.

¹⁸ Ado pe bochor tayom pạhil dhao Patras sãote ńapamokʼ lạgitʼ Jerusalemteń senlena, ar uni tulucʼ onḍe gel mõṛẽ din iń tahẽkana.

¹⁹ Unre Probhuren boeha Jakob chaḍa eṭakʼ jãhãe apostolko sãote ińakʼ ńapam do baṅ hoelena.

²⁰ Isorge goha do, ape ṭhen okakoń oletʼkan ona reaṅ okaṭakʼ hõ eṛeakʼ do baṅkana.

²¹ Ona tayom iń do Suriạ ar Kilkiliạ reakʼ eṭakʼ eṭakʼ ṭoṭhakoteń senlena.

²² Jihudi reakʼ Isại manḍerrenko ṭhen iń do oprom bạń tahẽkana.

²³ Onko do eken niạ kathako ańjomleda baṅma, “Okoe hoṛ aboe santaoetʼ bon tahẽkan uni do ńitokʼ Mạsire biswạsokʼ reakʼ kathae porcareda, menkhan lahate uni do marao lạgitʼe kurumuṭuleda.”

²⁴ Ar iń iạte onko do Isorko mạhimawadea.