Kolossiko lạgitʼ Pạul Apostolakʼ ciṭhi 1 - Santali Common Language New Testament

^1-2 Iń Pạul do Isorakʼ sanate Jisu Mạsiren mitʼṭen apostoliń hoeakana. Kolossiạ nagrahare okoe doko Isorren hoṛkan ar Mạsire mitʼakan biswạsi boehakanko, onko ṭhen iń ar Timothi do noa ciṭhi liń oleda. Aboren Baba Isor do daya ar suluke dan apema.

Pạulakʼ gunman johar koejoṅ

^3-4 Mạsi Jisure apeakʼ biswạs ar Isorren sanam hoṛko lạgitʼ apeakʼ dulạṛ reakʼ katha liń ańjomakada, onate tinạkʼ dhao ape lạgitʼ liń koejoṅ kan unạkʼ dhaoge aboren Probhu Jisu Mạsiren Baba Isor liń gunmanao joharae kana.

⁵ Sermare ape lạgitʼ okaṭakʼ jogao dohoakan ona ńam reakʼ as khonge ape talare noa pạtiạu ar dulạṛ do janamakana. Ar okaṭakʼ bhage sombat, metakʼme sạri katha ape ṭhen seṭer akan ona hotetege ape do noa as reakʼ kathape ańjom akada.

⁶ Noa bhage sombat do goṭa dhạrtire pasnaoente jokʼ kana ar dinke din baḍhao idikʼ kana. Ar oka hilokʼ noa bhage sombatpe ańjomketʼ ar Isorakʼ daya reakʼ katha sạri mentepe baḍaeketʼ enhilokʼ khon ṭhik onkage ona do ape talare hõ kạmikʼ kana.

⁷ Ona bhage sombat reakʼ katha do ạlińren dulạṛiạ Epaphrase ṭhenpe ańjomakada. Uni do ape lạgitʼ Mạsiren mitʼṭen pạtiạr sapʼdapʼicʼ kanae.

⁸ Sonot Jiu do dulạṛ reakʼ okaṭakʼ mone danakatʼpe ona reaṅ Epaphrase do ạlińe baḍae ocoakatʼlińa.

Mạsige maraṅ utạricʼ

⁹ Onate ape reaṅ ańjom tayom khonge ạliń do jao ghuṛi ape lạgitʼ liń koejoṅ kana. Jiuteakʼ akel ar bud salakʼ Isorakʼ monejoṅakʼ jemon purạtepe bujhạu daṛeakʼ onate Isor ṭhenliń khojkana.

¹⁰ Onate boge kạmikote bhage jope jokʼte Isor do arhõ jemon mońjtepe baḍae daṛeae; ar nonkate jotowakʼre Probhupe kusi ocoyete unire lek lekape colon.

^11-12 Noa do hoedaṛeakʼgea, ente Isor do acʼakʼ maraṅ daṛete apeye daṛe ocoakatʼpea jemon jao ghuṛi rạskạ salakʼ jotowakʼ sahao ar sombhurikate Isor Babape gun manao joharae. Marsal reakʼ rajosṭire Isorren hoṛko oka ạidạriko hameṭ joṅ ona reakʼ bhạgiạdar hoyokʼ lạgitʼ uni do lekmankoe hoeoco akatʼpea.

¹³ Ente uni do ńut reakʼ rajosṭi khone bańcaoketʼbonte acʼren dulạṛiạ Hoponakʼ rajosṭiteye ucạṛ ạguketʼbona.

¹⁴ Hopon tulucʼ bon kolom mitʼakante abo dobon chaḍao ocoakana, metakʼme kại ikạ bon ńam akada.

¹⁵ Nui Hopon kangea bin ńelokʼ kan Isorren muṭhạntetʼ do. Ar unige sanamakʼ ạuri sirjạureye tahẽkana ar sanam sirjon cetanre unigeye mạlik kana.

¹⁶ Ente sermare ar otre, oka ńelokʼkan ar oka baṅ ńelokʼ kan, jotowakʼge uni hotete sirjạu akana. Siṅghạsonkoge cetʼ, rajosṭikoge cetʼ, baṅ do rajkoge, baṅ do ektiạriankoge sanamakʼ do uni hotete uni lạgitʼge sirjạu akana.

¹⁷ Uni do sanamakʼko khon laharen kanae ar unirege jotowakʼ do ṭarhao mitʼakana.

¹⁸ Ona chaḍa unige acʼakʼ hoṛmoren, metakʼme manḍerren matha kanae. Unige pạhilicʼ ar unige pạhilre gocʼko khone jiwetʼ beretʼena, jemon unige jotowakʼren maraṅicʼe hoedaṛeakʼ.

¹⁹ Isor doe goṭaletʼa jemon acʼakʼ joto lekanakʼ perecʼtetʼ Mạsire tahen.

²⁰ Ona chaḍa dhạrirege cetʼ ar sermarege cetʼ, Mạsi hotete jotowakʼge acʼ tulucʼ samge ocoye goṭaleda. Mạsi do krusre acʼakʼ mãyãme danketʼte suluke ạguketʼa ar onate Isor tulucʼ manwakoakʼ noa samge do hoeakana.

²¹ Sedae do Isor ṭhen khon pharakrepe tahẽkana ar uni birudre apeakʼ monre bạiripe tahẽkana. Apeakʼ bạṛicʼ kạmiko hotete ona do sodor akana.

²² Menkhan Mạsiakʼ gujukʼte uniakʼ hoṛmo hotete Isor do ńitokʼ acʼ tulucʼe mitʼ akatʼpea, jemon uni do sonot, niphuṭ ar bin dusạnko mente acʼ samaṅreye teṅgo ṭarhao ocope.

²³ Onate Mạsi reaṅ bhage sombat khon oka sạri aspe ńamakatʼ ona khon alo pharakokʼte pạtiạure teṅgo ṭarhao akae tahenpe. Ona bhage sombat do goṭa dhạrtire lại jạhir akana ar ape do onape ańjom akada. Ar iń Pạul do noa bhage sombatren porcaricʼ iń hoeakana.

Manḍer lạgitʼ Pạulakʼ kạmi

²⁴ Ape lạgitʼ oka duk sasetiń jometʼkan onate iń doń rạskạkʼ kana. Mạsiakʼ hoṛmo reakʼ, metatʼme manḍerko lạgitʼ uniakʼ oka duk saset ńit hõ sarecʼ menakʼ ona do ińakʼ hoṛmoreń purạueda.

²⁵ Isor do acʼakʼ katha ape ṭhen purạte porcar reakʼ bhar ińreye emakatʼte iń do manḍerren mitʼṭen sapʼdapʼicʼ iń hoeakana.

²⁶ Isorakʼ kathare okaṭakʼ sạri okoakʼ sedaeren hoṛko ṭhen jug jug khon okoge tahẽkan, ńitokʼ acʼren hoṛko ṭhen ona do sodor akana.

²⁷ Isor doe khojkana, boṅgan hoṛ jạtrenko talare hõ uniakʼ noa sạri okoakʼ reakʼ maraṅ ṭhonok cetʼkana mente, ona jemon acʼren sanam hoṛko baḍae daṛeakʼ. Ona sạriakʼ do noage, Mạsi do apeakʼ ontorre menaete uniakʼ ṭhonok ńam reakʼpe asakana.

²⁸ Ale do uni Mạsi reaṅle porcareda, metakʼme Isorakʼ asambheṛ akel salakʼ mimitʼ hoṛle sontoretʼkoa arle cetʼako kana, jemon Mạsi hotetele purun daṛeako.

²⁹ Ar noa monsubạge Isorakʼ oka maraṅ daṛe ińreye kạmikan ona daṛe lekate iń do ạḍitetʼiń khaṭaokʼ kana.