Aposkạmi 24 - Santali Common Language New Testament

Pạulakʼ bicạr

¹ Mõṛẽ din tayom maraṅ naeke Ananiạs do Jihudikoren adom murubiko ar Tertullus ńutuman mitʼṭen ukil soṅgekate Kạisạriạteye calaoena ar Pạul birudre disạm cakʼlaoicʼ ṭhene lạliskeda.

^2-3 Ar Pạule hoho ạgu ocoyen khan Tertullus do noa menkate Pạulakʼ dosko udukʼaeye ehopʼena, “E manotan Pheliks ḍher din khon am tabere ale do ạḍi sulukre menakʼlea. Am do amakʼ akelte noko jạtrenko ḍherem hara rakapʼ ocoakatʼkoa. Onate ale do jaoge sanam jaegare khạndri ontor khon amle gun manao joharam kana.

⁴ Menkhan amakʼ somoe jemon alo nosṭokʼtam onateń nehõram kana, dayakate aleakʼ katha ańjom taleme. Ale do thoṛa kathate jotowakʼle lạiama.

⁵ “Alele ńṭoṭhadea nui hoṛ do mitʼṭen jhamelayicʼ kanae; uni do jao okte gulmale ehopʼeda. Uni do goṭa dhạrtiren Jihudiko talare gulmale ehopʼakada. Uni do Nasario dolren mitʼṭen ạyuricʼ kanae.

^6-7 Uni do mundil hõ bhõnḍ lạgitʼe kurumuṭiyetʼ tahẽkante ale do unile sapʼkedea ar aleakʼ ạn lekate bicạrile menetʼ tahẽkana, menkhan maraṅ suberdar Lusius doe ãṛgo hecʼena, ar jorkate aleakʼ ti khon uniye idikedea.

⁸ Ar ale okakole dusiyedekan, ona do unim kulile khange jotowakʼem baḍae daṛeakʼa.”

⁹ Ar Jihudiko hõ noa katha do sạri kana menteko suhi akada.

¹⁰ Unre disạm cakʼlaoicʼ do Pạul roṛ lạgitʼe isạrawade khan roroṛe ehopʼena, “Ińiń baḍaea, ḍher bochor khon am do noko Jihudi jạtkoakʼem bicạr ạguyeda; onate ạḍi rạskạ salakʼ iń reakʼ iń roṛetʼkana.

¹¹ Teheń gelbar din khon bạ̃ṛti do baṅ hoeakana iń do sewae lạgitʼ Jerusalemteń rakapʼ calaolena. Arem suṭhik lekhan ona dom baḍae daṛeakʼa.

¹² Ar okoeko dusiyediń kan onko do mundilre okoe tulucʼ hõ rapṭa rạpṭikʼ do bako ńṭoṭhadińạ sunạgogre se nagrahare jãhãrege hoṛko ạulạuko hõ bako ńṭoṭhadińạ.

¹³ Ar okaṭakʼ reakʼko dusiyedińkan ona reakʼ porman hõ onko do bako udukʼ daṛeama.

¹⁴ Iń do noa katha am ṭheniń aṅgoceda je, Jisu Mạsiakʼ hor, okaṭakʼ do onko dhorom birudko metakʼkan, iń do ona horrege ińren hapṛamkoren Isoriń sewawae kana. Moseakʼ ạn-ạri sãote okaṭakʼ juri menakʼ onare ar nạbikoakʼ olakʼre hõń pạtiạukʼ kana.

¹⁵ Onko cetʼlekako asokʼkan onkage iń hõ Isorre noa as menakʼtińạ je, dhorom ar bedhorom sanamkoge arhõko jiwetʼ beretʼ ocokʼa.

¹⁶ Onate iń do Isor ar manwako samaṅre jaoge ińakʼ bibek sapha dohoe reakʼ iń kurumuṭuyeda.

¹⁷ “Ḍher bochor tayom iń do Jerusalemteń senlena jemon iń jạtren reṅgecʼ-orecʼ hoṛko ṭaka-poesateń goṛo daṛeako ar dãṛẽ hõ jemoniń samaṅ daṛeakʼ.

¹⁸ Ado ińiń saphayen tayom tinre onań kạmikan tahẽkana unre onko do mundilreko ńelledińa. Ar iń ṭhen hoṛko hõ bako ṭhạurạulena se iń iạte jãhãn gulmal hõ baṅ hoelena.

¹⁹ Menkhan Asiạ Prodesren adom Jihudiko do onḍeko tahẽkana. Onkoge am ṭhen hijukʼ reakʼ jạruṛ tahẽkantakoa ar iń dusiyiń reakʼ jãhãnakʼ tahen tako khan onkogeko dusikińạ.

²⁰ Se okoeko nonḍe menakʼko onkogeko men ocoge, maraṅ bạisi samaṅre tinreń teṅgo akan tahẽkana unre cetʼ dosko ńamletʼtińạ mente.

²¹ Eken noa mitʼṭen reaṅko dusi daṛeạńạ, iń do onko samaṅre teṅgokate ãṭ aṛaṅteń roṛletʼ tahẽkana, ‘gocʼko do arhõko jiwetʼ beredokʼa ar noa reaṅge teheń ape samaṅre bicạr hoyokʼ kantińạ.’ ”

²² Jisuakʼ hortetʼ reakʼakʼko Pheliks hõ bes okocʼtegeye baḍaekan tahẽkana. Uni do bicạr kạmi bondkateye menkeda, “Maraṅ subedar Lusiuse hecʼlen tayom iń do apeakʼ noa bicạriń chinḍạukatapea.”

²³ Uni do Pạul horhoye lạgitʼ subedare hukumadea, menkhan thoṛa sạdhin macha dohoye reakʼ hõe metadea. Ar Pạulren gateko hõ hecʼkate jemon jạruṛleka uniko sapʼ sorae.

²⁴ Ado thoṛa din tayom Pheliks do acʼren Jihudi bạhu Drusilla soṅgekateye hecʼena. Uni do Pạule hoho ạgu ocokedete uni ṭhen khon Jisu Mạsire pạtiạukʼ reakʼ kathae ańjomkeda.

²⁵ Pạul do tinre dhorom horte calakʼ reakʼ, apnar sambṛaokʼ ar darakan bicạr reaṅe lạiadea, unre Pheliks do botorenteye menkeda, “Ma ńitokʼ do calakʼme; arhõ okte nạpitreń hohoama.”

²⁶ Uni doe asokʼkan tahẽkana Pạul do nahakʼ ghuse emaea. Onate ghane ghạṛicʼ Pạul hoho ạgukate uni tulucʼe galmaraokan tahẽkana.

²⁷ Ado bar bochor paromen khan Pheliks bodol Porkius Phestuse bahalena. Ar Pheliks do Jihudiko kusi ocoko lạgitʼ Pạul do hajotregeye doho oṭokadea.