Aposkạmi 22 - Santali Common Language New Testament

¹ “E boehako ar Babako, ńitokʼ iń do apnarteń roṛ dogokʼ kana, ańjomtińpe baṛe.”

² Hoṛko do Ibri pạrsite roroṛko ańjomkede khan ekalteko thir hapeyena. Unre Pạul doe menkeda,

³ “Iń doń Jihudi hoṛ kana. Kilikiạ reakʼ Tạrsus nagrahareń janamlena, menkhan noa nagraharegeń hara akana. Gamalielakʼ jaṅga pheḍre duṛupʼkate aboren hapṛamkoakʼ ạn-ạriko mońjteń cetʼakada. Isor reaṅ teheń ape cetʼ lekape gagojokʼkan onkage iń hõń gagojokʼkan tahẽkana.

⁴ Jisuakʼ horte okoeko calakʼkan tahẽkan onko doń santaoetʼko tahẽkana ariń gocʼetʼko tahẽkana ar herel ar maejiuko sapʼ ạgukate hajotreń bhoraoetʼko tahẽkana.

⁵ Noa katha do sạrikana je, onaren goha do maraṅ naekeko ar maraṅ bạisiren sanamkoge. Iń do onko ṭhen khon Damesek nagraharen dhorom mukhiyạko emako lạgitʼ ciṭhiń hataoleda ar onkan hoṛko tol ạgukate Jerusalemre sạjạiko lạgitʼge onḍeń calakʼkan tahẽkana.

⁶ “Unre tikin okte tahẽkana” Iń do Damesek soriń seṭeren khan ackage serma khon iń beṛhaete mitʼṭen marsal bamberena.

⁷ Ar iń do otreń bhindạṛena ar okoe coṅe mitạńkaniń ańjomkeda, ‘E Sạul, E Sạul cedakʼem khedeń kana?’

⁸ ‘‘Iń doń kulikedea, ‘Probhu am dom okoe kana?’ Uni doe roṛ ruạṛkeda, ‘iń do Nasaretren Jisu kạnạń, one okoeyem khedeńkan.’

⁹ Unre okoe iń sãoreko tahẽkan onko hõ ona marsalko ńelkeda, menkhan iń tulucʼ okoeye galmaraoketʼ uniakʼ katha do bako bujhạuleda.

¹⁰ Adoń menkeda, ‘E Probhu iń do cetʼ iń cekaya?’ “Probhui menkeda, ‘ma beretʼme, ar Damesekte calakʼme. Ar am lạgitʼ oka ṭhik doho akan ona do onḍegem baḍae ocokʼa.’

¹¹ Unre ińren soṅgetenko do tire sapʼkate Damesekteko tiạkʼ idikedeńa, ente ona jhãk jhãk marsal iạteń kãṛãyena.

¹² “Ado Ananiạs ńutuman mitʼṭen hoṛ iń ṭhene hecʼena. Uni do Moseakʼ ạn-ạriko manot salakʼe pańjayetʼ tahẽkana, ar onḍenko sanam Jihudiko ạḍiko manotedekan tahẽkana.

¹³ Uni do hecʼkate iń aṛere teṅgoyenteye metadińa, ‘E boeha Sạul, amakʼ ńeńel reakʼ daṛe ruạṛ hijukʼtam ma.’ Ar inạtege iń do uniń ńel ńamkedea.

¹⁴ “Unre Ananiạse menkeda, ‘aboren hapṛamkoren Isor do ame bachao akatʼmea jemon uniakʼ sanakom baḍae daṛeakʼ ar uni dhoromicʼ hoṛ, metakʼme Jisu Mạsim ńel ńame ar uniakʼ katham ańjomtae.

¹⁵ Am do unirenge goham hoyokʼa ar okam ńelakat̕ arem ańjomakatʼ ona do sanam hoṛko ṭhenem lạiya.

¹⁶ Am do ńitokʼ cedakʼem bilomeda? Ma beredokʼte bạptis ocokʼme ar uniakʼ ńutum dohaeakʼme ar amakʼ joto kạiko ạrupʼ saphaetam.’

¹⁷ “Jerusalemte ruạṛ hecʼkate mitʼ din mundilreń koejoṅkan tahẽkanre iń do mitʼṭen dorsoniń ńelkeda.

¹⁸ Probhu do iń sãote galmarao kaniń ńelkedea. Uni doe metadińạ, ‘usạragodme ar ńitge Jerusalem khon oḍok calakʼme, ente iń reaṅ goha do hoṛko bako ataṅ tama.’

¹⁹ Ińiń menkeda, ‘E Probhu, noko hoṛko baḍaegea, okoe amreko pạtiạukʼkan tahẽkan onko dal ar tolkate hajotre bhoraoko lạgitʼ iń do mitʼ sunạgog khon eṭakʼ sunạgogteń calakʼkan tahẽkana.

²⁰ Ar amren gohayicʼ Stephanko gojekan tahẽkanre onḍegeń teṅgo akan tahẽkana ar uni gocʼ ocokʼre iń hõ rạjigeń tahẽkana, ar okoe uniko gojekan tahẽkana onkoakʼ kicricʼkoń horhoyetʼ tahẽkana.’

²¹ “Unre Probhu do ińe metadińạ, ‘Do calakʼme, ente iń do sạṅgińte boṅgan hoṛ jạtrenko ṭheniń kolmea.’ ”

²² Hoṛko do un hạbicʼ Pạulakʼ kathako ańjomkan tahẽkana, menkhan boṅgan hoṛ jạtrenkoakʼ kathae roṛketʼ khan ãṭ aṛaṅte hohoate memenko ehopʼena, “Uni do dhạrti khon ocokʼ giḍikaepe; uni do jiwetʼ tahen lek doe baṅkana.”

²³ Ar rạgạu rạgạuko hohoyetʼkan tahẽkanre akoakʼ kicricʼko capatʼ giḍiyetʼ tahẽkana ar coṭte dhuṛiko oṭaṅetʼ tahẽkana,

²⁴ unre maraṅ subedar do palṭonkoakʼ gaṛte Pạul idiye lạgitʼe hukumkeda. Ar Pạul birudre cedakʼ nonkako hohoyeda ona baḍae lạgitʼ cạbuk baṛakate jeraye lạgitʼe hukumkeda.

²⁵ Ado cạbuke lạgitʼko tolkede khan Pạul do onḍeye teṅgo akan tahẽkan subedare metadea, “Romi hoṛ bin bicạr dusite cạbuke reakʼ hukum do cetʼ apeakʼ ạnre menakʼgea?

²⁶ Noa katha ańjomkate uni subedar do maraṅ subedar lạiyadeteye metadea, “Am do cetʼem cekae lạgidokʼ kana? Nui ma coṅe Romi hoṛkan.”

²⁷ Unre maraṅ subedar do Pạul ṭhen hecʼenteye kulikedea, “Lạiạńme am do cetʼ Romi kanam? Pạule menkeda, “Hẽ.”

²⁸ Maraṅ subedare menkeda, “Iń do ạḍi utạr ṭaka-poesa emkate Romren porja hoyokʼ reakʼ ạidạriń ńamakada.” Pạule menkeda, “Menkhan iń do janam khonge Romren porja kạnạń.”

²⁹ Noa kathako ańjomketʼ khan cạbuke lạgidokʼkanko do unreko calao baṛayena. Ar maraṅ subedar do mitʼṭen Romi hoṛe tol akadea menteye baḍaeketʼ khan botor hecʼadea.

Maraṅ bạisi samaṅre Pạul

³⁰ Jihudiko cedakʼ Pạulko dusiyede kana ona ṭhik lekate baḍae lạgitʼ dosar hilokʼ maraṅ subeder do Pạule raṛakedea ar maraṅ naekeko ar maraṅ bạisiren hoṛko mitʼ ṭhen jarwakʼ lạgitʼe hukumatʼkoa. Ona tayom Pạul ạgukate onko samaṅreye teṅgokedea.