Aposkạmi 15 - Santali Common Language New Testament

Jerusalem reakʼ bạisi

¹ Jihudạ disạm khon adom hoṛ do Siriạ disạm reakʼ Antiokiạteko hecʼena ar biswạsi boehako noa menkate cetʼakoko ehopʼena, “Moseakʼ ạn-ạri lekate bape khatna ocolen khan kại khon bańcao do ohogepe ńamlea.”

² Onate Pạul ar Barnabas sãote onko hoṛko doko apṭha ạpṭhiyena. Onko doko goṭakeda je, Pạul ar Barnabas do Antiokiạren thoṛa biswạsiko soṅgekate Jerusalemkin calakʼa ar apostolko ar manḍerren mukhiyạko tulucʼ noa reaṅko galmaraoa.

³ Antiokiạ manḍerrenko do onkoakʼ calakʼ reakʼko bebostakeda. Ado Phoenikiạ ar Samariạ Prodes talate calakʼ jokhecʼ Pạul ar Barnabas do hoṛkokin baḍae ocoketʼkoa, boṅgan hoṛ jạtrenko do Isor secʼ cetʼlekako ạcurokʼ kana mente. Ar noa khobor ańjomkate sanam biswạsikoge ạḍiko kusiyena.

⁴ Pạul ar Barnabas Jerusalemtekin hecʼen khan manḍerren hoṛko, mukhiyạko ar apostolko do ạḍi rạskạ salakʼko ataṅ daramketʼkinạ. Ar unkin hotete Isor okakoe cekaletʼ tahẽkan ona sanamakʼkin lạiatʼkoa.

⁵ Unre Phạrusikoren thoṛa hoṛ hõ biswạsiko tahẽkana. Onko do teṅgoyenteko menkeda, “Boṅgan hoṛ jạtrenko do khatnakʼ jạruṛgetakoa ar Moseakʼ ạn-ạri jemonko pańjae ona lạgitʼ hukum emako jạruṛa.”

⁶ Unre apostolko ar manḍerren mukhiyạko do noa reaṅ hudis lạgitʼ mitʼ ṭhenko jarwayena.

⁷ Ado aemako galmaraoketʼ khan Patras do teṅgoyenteye metatʼkoa, “E boehako, ape mape baḍaege, ḍher din lahare apeko tala khon Isor do ińe bachao akadińạ jemon boṅgan hoṛ jạtrenko hõ ińakʼ moca khon bhage sombat reakʼ katha ańjomkateko pạtiạukʼ.

⁸ Isor do sanam hoṛkoakʼ mone baḍaea. Uni do cetʼleka sonot Jiue danatʼbon tahekan, onkage boṅgan hoṛ jạtrenko hõe danatʼkote gohae emakada je, onko hõ kại khon bańcaoko ńamakada.

⁹ Uni do abo ar onko talare jãhãn begar do bae dohoakada, ente onkoko pạtiạu akante uni do onkoakʼ ontore sapha akatʼtakoa.

¹⁰ Enḍekhan aboren hapṛamko se abo okaṭakʼ bojha babon gokʼ daṛe akatʼ ona bojha pạtiạu akan boṅgan hoṛ jạtrenkoakʼ tarenre gokʼakote cedakʼ ape do Isor biḍạue lạgitʼpe kurumuṭu kana?

¹¹ Alele pạtiạukʼ kana je, Probhu Jisuakʼ dayate pạtiạu akan boṅgan hoṛ jạtrenko do cetʼleka kại khon bańcaoko ńamakatʼ, onkage abon hõ bańcao bon ńamakada.”

¹² Unre bạisiren sanamko doko thir hapeyena ar Pạul ar Barnabas hotete boṅgan hoṛ jạtrenko talare Isor do okako hahaṛa kạmiye kạmi akatʼ ona unkinakʼ moca khon ańjomko ehopʼena.

¹³ Adokin roṛ mucạtʼketʼ khan Jakobe menkeda, “E boehako, ańjompe.

¹⁴ Isor do acʼren hoṛko hoyokʼ lạgitʼ boṅgan hoṛ jạtrenko modkhon thoṛa hoṛ bachaokateye udukʼakada je, boṅgan hoṛ jạtrenko lạgitʼ hõ uni doe dạndikʼ kana. Ar noa kathage Simon Patras do aboe lại akatʼ bona.

¹⁵ Ar noa katha tulucʼ do nạbikoakʼ katha hõ jurikʼkana, ente sostorre olakana:

¹⁶ ‘Noa tayom hecʼkate iń do Dạudakʼ lạnduṛ akan oṛakʼ arhõń benaoa ruạṛa. Oka dhaṅ dhaser akan ona do arhõń gathao ruạṛa, ona do arhoń teṅgo ruạṛa;

¹⁷ Jemon eṭakʼ sanam hoṛko, metakʼme boṅgan hoṛ jạtrenko okoe do ińren menteko hoho ocokʼkan onko jemonko sendrayiń. Probhu, okoe do noakoe kạmikan, unige noako kathae menakada.’

¹⁸ Ar ḍher din laha khon noa do uniakʼ monre tahẽkana.”

¹⁹ Jakob do arhõe menkeda, “Noa iạtege ińakʼ bujre boṅgan hoṛ jạtren okoeko Isor secʼko ạcurokʼkan onko duk emako lek do baṅkan tabona.

²⁰ Bickom onko ṭhen noa katha bon olma, jemon boṅga tulucʼ jopoṛao sanamakʼ ar joto lekan loṭghuṭi khon sahaṛ akanko tahen, ar limbạtʼ gocʼ janwarakʼ jel ar mãyãm jemon aloko jom.

²¹ Noa hukum emakoge bhagea, ente Mose okae menakatʼ ona do mimitʼ nagrahakore ạḍi laha khonge porcarokʼ kana ar uni okae ol oṭoakatʼ ona do mimitʼ jirạukʼ mãhãre sunạgogkore paṛhao idikʼkana.”

Boṅgan hoṛ jạtrenko ṭhen olakʼ ciṭhi

²² Unre apostolko, manḍerren murubiko ar manḍerren eṭakʼ sanam hoṛkoko goṭakeda je, onko do akoren adom hoṛko bachaokate Pạul ar Barnabas sãote Antiokiạteko kolkoa. Onko do Jihudạ ar Silạs tạkinko bachaoketʼkinạ. Nui Jihudạge Barsabako metaekan tahẽkana. Ente biswạsi boehako modre nukin bana hoṛge mukhiyạkin tahẽkana.

²³ Ado onko hotete noa ciṭhiko kolkeda: Antiokiạ, Siriạ ar Kilikiạren biswạs akan boṅgan hoṛ jạtren boehako ṭhen ale apostolko ar manḍerren murubiko, metakʼme aperen boehako do noa ciṭhile olape kana. Apeakʼ suluk hoyokʼma.

²⁴ “Alele ańjomkeda je, aleko mod khon adom hoṛ do senkate ạḍi lekan kathate apeakʼ monko ạulạuetʼte kosṭoko emapekana, menkhan ale do nonkan kạmi bale menakatʼkoa.

²⁵ Onate ale sanamkoge mitʼkate thoṛa hoṛ bachaokate aleren dulạṛiạ gate Barnabas ar Pạul sãote ape ṭhenle kolketʼkoa.

²⁶ Barnabas ar Pạul do aboren Probhu Jisu Mạsi iạte gujukʼrekin paṛaolena.

²⁷ Ale do Jihudạ ar Silạs tạkinle kolketʼkinạ jemon okale olakatʼ ona do mocate hõ kin lạiape.

²⁸ Sonot Jiu ar ale do noage mońjle metakʼ kana, noa jạruṛokʼakʼko reaṅ chaḍa ar okaṭakʼte hõ jemon ape cetanre bạ̃ṛti bojha aloko ladeape.

²⁹ Ona jạruṛokʼakʼko reaṅ do hoyokʼ kana: Boṅga ṭhen samaṅakʼ jãhãnakʼge alope joma, mãyãm hõ alope ńũiya, ar limbạtʼ gocʼkoakʼ jel hõ alope joma, ar sanam lekan loṭghuṭi khon sahaṛ akae tahenpe. Ar noako khon sạṅgińrepe tahen khan bhage hoyokʼtapea. Ma napaete tahen tabonpe.’’

³⁰ Ado Pạul, Barnabas ar unkin hoṛko kolketʼkin khan onko do Antiokiạteko calaoena. Onḍe onko do manḍerren hoṛko mitʼ ṭhenko jarwaketʼkote ona ciṭhiko ematʼkoa.

³¹ Hoṛko do ona ciṭhiko paṛhaokeda ar onare oka jiwi raṛecʼ reakʼ katha tahẽkan onate ạḍiko kusiyena.

³² Jihudạ ar Silạs apnarhõ nạbi kin tahẽkana; onate unkin do aemakin galmaraoatʼkote onḍenko boehakin udgạuketʼkoa ar onkoakʼ pạtiạukin keṭecʼ ocoketʼtakoa.

^33-34 Unkin do Antiokiạre thoṛa din kin tahẽyena. Ar Jerusalemren okoe do Jihudạ ar Silạs Antiokiạteko kolletʼkin, Antiokiạren boehako do sulukteko bidạkatʼkinte Jihudạ ar Silạs do arhõ onko ṭhenko kol ruạṛkatʼkinạ,

³⁵ Menkhan Pạul ar Barnabas do Antiokiạrege kin tahẽyena. Onḍe unkin do arhõ aemako ṭhen Probhuakʼ katha cetʼako ar porcarkin dhurạuena.

Pạul ar Barnabas kin begarokʼkan

³⁶ Thoṛa din tayom Pạul do Barnabase metadea, “Dela, okako jaegare Probhuakʼ katha laṅ porcarakatʼ, onako jaegate arhõ ruạṛ senkate boehako laṅ hirikoa ar cetʼleka menakʼkoa mente ona hõ laṅ ńeltorakoa.”

³⁷ Unre Barnabas do Johan soṅgetora joṅe menana. Nui Johan do Mark hõko metaekan tahẽkana.

³⁸ Menkhan Pạul do uni soṅgete iditoraye bhage do bae metatʼa, ente Mark do Pamphuliạreye bạgi oṭoatʼkin tahẽkana ar unkin sãote ar bae kạmileda.

³⁹ Unre Pạul ar Barnabas do mot baṅ mitʼlente unkin dokin begarena. Onate Barnabas do Marke soṅgekedete jahajte Kupros dipteye calaoena, ar Pạul do Silạse bachaoana.

⁴⁰ Unre Antiokiạren boehako do Pạul ar Silạs tạkin Probhuakʼ tireko jimạketʼkin khan unkin dokin mohḍhayena.

⁴¹ Pạul do Siriạ ar Kilikiạ talateye parom calao idiyente sanam manḍerkore pạtiạukoe keṭecʼketʼtakoa are daṛe ocoketʼkoa.