Aposkạmi 14 - Santali Common Language New Testament

Ikonium nagrahare

¹ Ikonium nagrahare Pạul ar Barnabas do ạkinakʼ cạli leka Jihudikoakʼ sunạgogkote kin boloyena. Unkin do onḍe nonkan kathakin galmaraoatʼkoa je, Jihudiko ar Junạniko khon ạḍi utạr hoṛko pạtiạuena.

² Menkhan okoeko Jihudi bako pạtiạulen onko do boṅgan hoṛ jạtrenkoko uskạuketʼkote biswạsi boehako birudre onkoakʼ monko bạṛicʼketʼtakoa.

³ Pạul ar Barnabas do ona nagrahare thoṛa dinkin tahẽyena ar dil salakʼ Probhuakʼ kathakin galmaraoatʼkoa. Ar Probhuakʼ daya reaṅ okakin porcaretʼ tahẽkan ona katha sạrikana mente sạbud lạgitʼ Probhu do Pạul ar Barnabas hotete cinhạko ar hahaṛawakʼkoe hoeocokeda.

⁴ Onate nagraharen hoṛko doko begarena; adomko do Jihudiko secʼ ar adomko do apostol secʼko calaoena.

⁵ Unre boṅgan hoṛ jạtrenko ar Jihudikoren mukhiyạko do jarwa mitʼkate Pạul ar Barnabas santaokin ar dhirite tińkin lạgitʼko solhawana.

⁶ Menkhan Pạul ar Barnabas do onakin baḍaeketʼ khan Lukạuniạ Prodes reakʼ Lustrạ ar Derbe ar ona aḍe pase ṭoṭhatekin dạṛkeda.

⁷ Onako ṭoṭhare unkin do Mạsi reaṅ bhage sombat porcarkin dhurạuena.

Lustrạ ar Derbe nagrahare

⁸ Lustrạ nagrahare mitʼṭen leḍha hoṛe duṛupʼkokʼkan tahẽkana. Uni do jonom khonge leḍhae tahẽkana ar tis hõ bae taṛamakatʼ tahẽkana.

^9-10 Ar uni hõ Pạulakʼ galmaraoe ańjomkan tahẽkana. Unre Pạul do uni secʼ sojheteye beṅgetʼkeda ar boge ocokʼ lạgitʼ biswạs menakʼtaea menteye ńelkede khan ãṭ aṛaṅte hohoateye metadea, “Amakʼ jaṅgate sojhete teṅgonme.” Ar inạtege uni hoṛ doe don beretʼente taṛame dhurạuena.

¹¹ Pạul okae kạmiketʼ ona ńelte hoṛko do Lukạuniạ pạrsite hohoateko menkeda, “Debko manwa chinte abo ṭhenko pheḍ hecʼakana.”

¹² Onate Barnabas do Jupiter ar Pạul do kathae roroṛkan tahẽkante Merkuriko ńutumkedea.

¹³ Jupiter debakʼ than do nagraha bahrere tahẽkana. Ar uni debren naeke do nagraha reakʼ duạr ṭhen daṅgra ar malae ạgukeda, ente naeke ar sanam hoṛko do Pạul ar Barnabas janwar dãṛẽ emakin lạgitʼko menetʼ tahẽkana.

¹⁴ Barnabas ar Pạul do ona kathakin ańjomketʼ khan ạkinakʼ kicricʼkin oṛecʼketʼte hoṛko ṭhenkin ńir calaoena ar ãṭ aṛaṅtekin menkeda,

¹⁵ “E ho gateko, ape do cedakʼ noakope onkayeda? Ạliń hõ coṅ ape leka duk suk jojom manwakangeliń. Ạliń do ape ṭhen bhage sombat liń porcareda jemon noa ạuṛiakʼko khon jiwetʼ Isor secʼpe, ạcurokʼ. Unige serma, dhạrti, jalapuri ar onakore menakʼ jotowakʼ doe sirjạu akada.

¹⁶ Laha piṛhiren sanamkoge uni do akoakʼ sana lekageye sen ocowatʼko tahẽkana,

¹⁷ menkhan enhõ uni do jao okte acʼ reaṅ gohae emakada. Ente uni do serma khon dakʼe emokʼkana ar okte nạpitre phosole dan abon kante dayae udukʼape kana. Uni do asambheṛ jomakʼe dan apekante apeakʼ mon do rạskạteye perecʼetʼtapea.”

¹⁸ Noako katha kin galmaraoatʼkore hõ janwar dãṛẽ khon hoṛko thir ocoko lạgitʼ unkin do ạḍi haronokʼ hoyentạkina.

¹⁹ Ado Antiokiạ ar Ikonium khon adom Jihudiko hecʼkate Pạul ar Barnabas birudre hoṛkoko bhiṅgṛạuketʼkoa. Unre Pạul do dhiriteko tińkedea ar gocʼenae hudiskate nagraha bahreteko or idikadea.

²⁰ Menkhan tayomte biswạsiko uni beṛhaeteko teṅgoyen khan uni doe beretʼente nagrahateye ruạṛ calaoena. Ar dosar hilokʼ acʼ ar Barnabas do Derbe nagrahatekin calaoena.

^21-22 Ado Derbere bhage sombat porcarkate Pạul ar Barnabas do ạḍi utạrkin celaketʼkoa. Ona tayom Lustra, Ikonium ar Pisidiạ Prodes reakʼ Antiokiạte ruạṛ senkate onḍenko celakoakʼ biswạskin kajakketʼte onkokin daṛe ocoketʼkoa ar pạtiạure ṭarhao tahen lạgitʼkin udgạuketʼkoa. Unkinkin menkeda, “Isorakʼ rajte bolokʼ lạgitʼ ạḍi utạr duk jojom hoyokʼ tabona.”

²³ Unkin do mitʼke mitʼ manḍerre maraṅ mukhiyạ kin bahalketʼkoa ar okoe Probhu cetanreko biswạs akan tahẽkan, koejoṅ ar upạste uni Probhuakʼ tirege manḍerren hoṛkokin jimạkatʼkoa.

Siriạ disạm reakʼ Antiokiạte kin ruạṛkan

²⁴ Tayomte Pạul ar Barnabas do Pisidiạ Prodes talatekin parom calaoente Pamphuliạ Prodeshte kin seṭerena.

²⁵ Unkin do Perga nagrahare Isorakʼ katha porcarkate Attaliạ bondortekin calaoena.

²⁶ Ar Attaliạ khon jahajte Siriạ disạm reakʼ Antiokiạ tekin ruạṛ hecʼena. Ar oka kạmi ńitkin mucạtʼketʼ ona kạmi lạgitʼge noa Antiokiạ khonge Isorakʼ dayarekin jimạ ocolena.

²⁷ Ado Antiokiạtekin seṭeren khan unkin do manḍerren sanamko mitʼ ṭhenkin jarwaketʼkoa ar Isor ạkin hotete okakoe kạmiketʼ ona sanamakʼ kin lạiatʼkoa. Ar cetʼlekate Isor do boṅgan hoṛ jạtrenko Mạsire biswạs reakʼ duạre jhicʼ akawatʼko ona reakʼ hõkin lạiatʼkoa.

²⁸ Ona tayom Pạul ar Barnabas do celako sãote onḍe ḍher dinkin tahẽyena.