Aposkạmi 13 - Santali Common Language New Testament

Barnabas ar Sạulakʼ porcar

¹ Antiokiạ manḍerre do thoṛa nạbi ar cecetʼkoko tahẽkana. Onkoakʼ ńutum do Barnabas, Nigerko metaekan Simeon, Kurene nagraharen Lukius, disạm cakʼlaoicʼ Herod sãoteye ạsul haralen Manaen ar Sạul.

² Onko do upạskate Probhuko sewawaekan tahẽkanre sonot Jiu do onkoe metatʼkoa, “Barnabas ar Sạul oka kạmi lạgitʼ iń hohoakatʼkin, ińakʼ ona kạmi lạgitʼ ńitokʼ unkin baṛe begarkinpe.”

³ Unre onko do upạskateko koejoṅkeda arko capoketʼkinte unkinko bidạgotʼkakʼ kinạ.

Kupros Dipre

⁴ Ado sonot Jiu hotetekin kol ocoyen khan Barnabas ar Sạul do Seleukiạtekin rakapʼ calaoena. Ar onḍe khon jahajte unkin do Kupros diptekin senena.

⁵ Salamisre seṭerkate unkin do Jihudikoakʼ sunạgogkore Isorakʼ kathakin porcarkeda. Unre goṛoyicʼ lekate Johan hõ unkin sãoteye tahẽkana.

⁶ Ado goṭa dipkin dãṛã mucạtʼketʼ khan unkin do Paphos hạbicʼkin hecʼena ar onḍe do Bar-Jisu ńutuman mitʼṭen Jihudi jạdu udukʼicʼ eṛe nạbikin ńamkedea.

⁷ Uni eṛe nạbi do Eluma, metakʼme jạdu alako metaekan tahẽkana. Uni jạdu udukʼicʼ do disạm cakʼlaoicʼ Sergius Pạulusren mitʼṭen gateye tahẽkana ar uni disạm cakʼlaoicʼ do mitʼṭen budan hoṛgeye tahẽkana. Uni do Isorakʼ katha ańjom lạgitʼ Barnabas ar Sạule hoho ạgu ocoketʼkina.

⁸ Menkhan Eluma do Barnabas ar Sạul tạkicʼkine ehopʼkeda ar disạm cakʼlaoicʼ hõ Jisure pạtiạukʼ khon ruạṛe lạgitʼe kurumuṭukeda.

⁹ Unre Sạul okoe do Pạulko metaekan uni do sonot Jiuteye perecʼente Eluma secʼ beṅgetʼ uricʼkateye metadea,

¹⁰ “Am do Soetanren hopon ar joto bhageakʼren bạiri kanam. Amre do joto lekan phạsiara ar bedhorom menakʼa. Probhuakʼ sojhe horko konḍeae do cetʼ bam bạgiya?

¹¹ Ńelme, Probhuakʼ ti do am birudre rakapʼ akana. Am dom kãṛãkʼa ar thoṛa din hạbicʼ siń cando reakʼ marsal bam ńelńama.” Ar unrege dhund ar ńut paṛaoadete hoṛe ńamkoa mente onte note ṭạmḍạu baṛaye ehopʼena.

¹² Noako ńelte uni disạm cakʼlaoicʼ do Probhureye biswạsena, ente Probhu reaṅ oka cecetʼakʼe ńamletʼ onate uni doe hahaṛalena.

Pisidiạ disạm reakʼ Antiokiạre

¹³ Noa tayom Pạul ar uniren sãotenko do jahajte Paphos khon Pamphuliạ disạm reakʼ Perga nagrahateko calaoena. Unre Johan do onko bạgikate Jerusalemteye ruạṛ senena.

¹⁴ Tayomte onko do Perga khon Pisidiạ disạm reakʼ Antiokiạ nagrahateko senena ar jirạukʼ mãhãre sunạgogre bolokateko duṛupʼena.

¹⁵ Ado sonot sostor reakʼ ạn-ạri ar nạbikoakʼ puthi khon paṛhao sạten khan sunạgogren mukhiyạko do onkoko metatʼkoa, “E boehako, jãhãn sikhạuna katha menakʼtape khan ma roṛpe.”

¹⁶ Unre Pạul doe teṅgoyena ar ti tulkateye menkeda, “E Israelko ar Isor botoraekan boṅgan hoṛ jạtrenko ańjompe baṛe.

^17-18 Israel jạtren Isor do aboren hapṛamkoe bachaoletʼkoa ar Misor disạmreko tahẽkanre uni doe usul ocoletʼkoa. Ar daṛeanakʼ tite ona disạm khone oḍok ạguketʼkoa ar pongel bochor hạbicʼ hahaṅkarre onkoakʼ bạṛicʼ colonkoe sahaoketʼtakoa.

¹⁹ Ona tayom Kanan disạmren eae goṭen jạtkoe maraoketʼkote acʼren hoṛko ona disạm cetanre ạidạriye ematʼko tahẽkana.

²⁰ Noako sanamakʼ hoe purạukʼte pon sae mõṛẽgel bochor lagaolena. “Noa tayom Sạmuel nạbi hạbicʼ Isor do bicạricʼe ematʼko tahẽkana.

²¹ Ona tayom disạmren hoṛko do rajko khojkedea. Unre uni do Benjamin khũṭren, Kisren hopon Sạulgeye ematʼkoa. Sạul do pongel bochor hạbicʼ raje calaoketʼa.

²² Ona tayom Isor do Sạul ocokʼkate Dạude rajkedea. Uni do Dạud reaṅe menakada, ‘iń do Jisạiren hopon Dạudre ińakʼ mone lekan mitʼṭen hoṛiń ńamakadea. Uni do ińakʼ sanam monejoṅakʼe purạutińạ.’

²³ Isor do acʼakʼ gokʼakʼ lekage noko hoṛkoakʼ bõs khon babańcaoicʼ Jisuge Israelko ṭhene sodorkedea.

²⁴ Jisu hijukʼ lahare sanam Israelko ṭhen Johan do noa menteye porcarleda je, hoṛko do kại khon mon ạcurkate bạptisma hatao lek takoa.

²⁵ Johan do acʼakʼ kạmiye mucạtʼ ạguyetʼ tahẽkanreye menleda, ‘iń doń okoe kana mentepe hudisetʼkana? Iń do uni Mạsi doń baṅkana. Uni do iń tayomteye daraekana, iń do uniakʼ panahi raṛaetae lek hõń baṅkana.’

²⁶ “E boehako, Abrahamren hoponko ar Isor botoraekanko, kại khon bańcao reakʼ noa khobor do abon ṭhenge kolakana.

²⁷ Jerusalemren hoṛko ar onkoren mukhiyạko do Jisu bako oromledea. Noa chaḍa nạbikoakʼ okaṭakʼ katha jirạukʼ mãhãre jaoge paṛhao idikʼkan tahẽkan, ona katha hõ onko do bako bujhạu daṛeada; onate Jisuko dusikedete ona kathako purạukeda.

²⁸ Onko do Jisuakʼ gocʼ ocokʼ reaṅ jãhãn dos bako ńamletʼtaere hõ Pilạtko metadea jemon uniye goje.

²⁹ Sonot sostorre uni reaṅ cetʼko ol tahẽkan ona sanamakʼ purạuen khan onko do krus khon pheḍkedeteko topakadea.

³⁰ Menkhan Isor do gocʼko khon uniye jiwetʼ beretʼkedea.

³¹ Gạlil khon okoeko uni sãote Jerusalemteko hecʼlen, onko do aema din hạbicʼ uniko ńelledea. Ar onkoge ńitokʼ do aboren hoṛko ṭhen uni reaṅ gohako emeda.

³² “Ạliń do apeko ṭhen noa bhage sombat liń emape kana, aboren hapṛamko ṭhen Isor okaṭakʼe gokʼletʼ tahẽkan,

³³ ona do onkoren hoponko lạgitʼ, metakʼme abo lạgitʼ Jisu gocʼko khone jiwetʼ beretʼkedeteye purạu akada. Noa reaṅ do dosarakʼ sereńre olakana: Am dom ińren hopon kana, teheńge amren apatiń hoyena.

³⁴ Isor do gocʼko khon uniye jiwetʼ akadea ar uniakʼ hoṛmo do tishõ baṅ nosṭokʼtaea, ona kathakore Isore menakada, ‘Sonot ar sạriakʼ bhor reakʼ Dạud ṭhen okań kiriyạlen, ona do amiń emama.’

³⁵ Ona reaṅ ar mitʼ jaegare olakana: Amren sonoticʼ do alom sea ocoaea.

³⁶ “Dạud do ona piṛhiren hoṛko modre Isorakʼ monejoṅakʼe purạuketʼ tayome gocʼena. Ar uniren hapṛamko sãoteko topakede khan uniakʼ hoṛmo do nosṭoyena.

³⁷ Menkhan Isor do okoe gocʼko khone jiwetʼ beretʼkede, uniakʼ hoṛmo do baṅ sealena.

³⁸ Onate E ińren boehako, ape do baḍae joṅpe, Jisu hotetege ape ṭhen kại reakʼ ikạ ńam reaṅ jạhirokʼ kana.

³⁹ Ape do Moseakʼ ạn-ạri hotete kại reakʼ sạjại khon bape rukhiyạu akana, menkhan jãhãege Jisureye pạtiạukʼ, uni do kại reakʼ sạjại khon bańcaoe ńama.

⁴⁰ Onate ape do sontorokʼpe, jemon nạbikoko roṛakatʼ noako apere alo paṛaokʼ:

⁴¹ Ape okoe do Isor sãotepe khiloḍkan, ańjompe Ape do bhaṛokʼpe ar mohor meṭaokʼpe; ente ape bidạlrege iń do nonkanakʼ iń kạmiya one uniakʼ katha ohogepe pạtiạulen, jãhãeye lạiapere hõ baṅa.”

⁴² Ado Pạul ar Barnabas sunạgog khonkin oḍok calakʼkan tahẽkan jokhecʼ hoṛkoko nehõratʼkinạ jemon hijukʼkan jirạukʼ mãhãre noako reaṅ arhõkin galmaraoako.

⁴³ Ar sunạgog khonko calao baṛayen khan ạḍi utạr Jihudiko ar Jihudi dhoromre pạtiạu akan Isor botoraekanko do Pạul ar Barnabas tạkinko pańjaketʼkinạ. Unre Pạul ar Barnabas do onkokin galmaraoatʼkoa, ar Isorakʼ dayare jemon khạtirko tahen ona lạgitʼ kin udgạuketʼkoa.

⁴⁴ Ado dosarakʼ jirạukʼ mãhãre nagraharen sanam hoṛko Isorakʼ katha ańjom lạgitʼ mitʼ sãoteko jarwayena.

⁴⁵ Ar nunạkʼ hoṛakʼ bhiṛ ńelte Jihudiko do hiskạteko perecʼena ar Pạul okae menetʼkan tahẽkan ona birudre aema lekan kathakote nisṛạueko ehopʼena.

⁴⁶ Unre Pạul ar Barnabas do dilkate kin roṛ ruạṛatʼkoa, “Pạhilre ape ṭhen Isorakʼ katha lạlại jạruṛ tahẽkan tạlińa, menkhan tinre ape do bape moneada ar jaejug jion ńam lạgitʼ apete lek bape bujhạulena unre ạliń do boṅgan hoṛ jạtrenko secʼliń ạcurokʼkana.

⁴⁷ Ente Probhu do noa kathae men akada, ‘boṅgan hoṛko ṭhen iń do mitʼṭen marsal lekań dohoakatʼmea, jemon am hotete goṭa dhạrtiren hoṛko kại khon bańcaoko ńam.’ ”

⁴⁸ Noa katha ańjomkate boṅgan hoṛ jạtrenko doko rạskạyena ar Probhuakʼ kathako sarhaokeda; ar jaejug jion ńam lạgitʼ Isor tinạkʼe niṭ dohoakatʼko tahẽkan onko doko pạtiạuena.

⁴⁹ Ar Probhuakʼ katha do onako ṭoṭha reakʼ sanam jaegakore pasnao idiyena.

⁵⁰ Menkhan Jihudiko do Isor bhoktiae bhodro maejiuko ar nagraharen manotan hoṛkoko udgạuketʼkoa. Nonkate onko do Pạul ar Barnabas upạrte khedko calaoketʼte ona ṭoṭha khonko oḍok gotʼkatʼ kinạ.

⁵¹ Unre Pạul ar Barnabas do onko hoṛko upạrte ạkinakʼ jaṅga reakʼ dhuṛikin koṭa oṭokatʼte Ikonium nagrahatekin calaoena.

⁵² Menkhan onḍenko cela do rạskạ ar sonot Jiuteko perecʼena.