2 Patras 3 - Santali Common Language New Testament

Probhuakʼ ruạr hijukʼ reaṅ

¹ E dulạṛiạ boehako, ape ṭhen noa do ińakʼ dosar ciṭhi kana. Banar ciṭhirege iń do adomakʼko babotreń disạ ocoyetʼpete apeakʼ soṛa mon udgạu reakʼ iń kurumuṭuyeda.

² Sonot nạbiko okako katha lahateko menakatʼ onako ar aperen apostolko hotete aboren Probhu ar babańcaoicʼ okaṭakʼ hukume emakatʼ, ińakʼ monejonakʼ do jemon onape disạ dohoe.

³ Pạhilre noa katha disạ dohoepe, bhageakʼko reaṅ okoe do nisṛạu reakʼ sobhabtako onko do sesa sisi dinrehõko nisṛạugea. Onko do akoakʼ bạṛicʼ sana lekako colona,

⁴ arko mena, “Uniakʼ hijukʼ reakʼ oka gokʼakʼ tahẽkan ona reakʼ do cetʼ hoyena? Dhạrti sirjạu khon cetʼleka calao hijukʼkan tahẽkan ṭhik onkage aboren hapṛamko gocʼ tayom khon jotowakʼge coṅ inạ mitʼlekage calakʼkan.”

⁵ Noko hoṛ do dhikhitegeko hiṛińeda je, sedaere Isorakʼ kathate serma do sirjạulena ar dakʼte ar dakʼ khonge dhạrti hõ sirjạulena mente.

⁶ Un reakʼ ona dhạrti do ḍubạ dakʼte ḍahao maraolena.

⁷ Ar Isorakʼ inạ mitʼ kathatege ńitokʼakʼ serma ar dhạrti do seṅgelte ḍahao maraokʼ lạgitʼ dohoakana; Isor bebhokti hoṛkoakʼ bicạr ar ḍahao marao din hạbicʼ ona do jogao dohoakana.

⁸ Menkhan E dulạṛiạ boehako, noa katha do alope hiṛińa, Probhu ṭhen mitʼ din do hajar bochor somangea ar hajar bochor do mitʼ din somangea mente.

⁹ Adom hoṛko hudiseda Probhu do acʼakʼ gokʼakʼ purạu lạgitʼe bilomeda, menkhan ona do baṅ. Asokaete uni do ape lạgitʼe soboriyeda, ente jãhãegeye nosṭokʼ do bae khoja, bickom sanamkoge jemon kại khon monko ạcurtako noageye khojkana.

¹⁰ Menkhan Probhuakʼ din do kombṛo leka hijukʼa. Ona dinre serma do sãe sãe saḍete parom calakʼa ar siń cando, ńindạ cando, ipilko sanamge atarokʼa arko le cabakʼa. Dhạrti ar onare menakʼ sanamakʼge ḍahao maraokʼa.

¹¹ Sanamakʼge nonka marao lạgidokʼkan khan enḍekhan cetʼ lekanko hoyokʼ lektapea? Ape do gagojokʼ tulucʼ Isorakʼ din koyokʼ horre tahente sonot ar Isor bhoktite jion khemao lektapea.

¹² Unre serma do lokʼte ḍahao maraokʼa ar siń cando, ńindạ cando ar ipilko hõko atarokʼa arko galao cabakʼa.

¹³ Menkhan abo do Isorakʼ gokʼakʼ lekate nawa serma ar nawa dhạrti lạgitʼ bon koyokʼ horeda. Onḍe do sanamakʼge Isorakʼ monejoṅakʼ leka hoyokʼa.

¹⁴ E dulạṛiạ boehako, ape do ńitokʼ noako lạgitʼpe koyokʼ horetʼkante murukte kurumuṭuipe jemon uni do niphuṭ ar dhoromre sulukte tahẽakane hecʼńampe.

¹⁵ Disạipe, manwako kại khon bańcaoko ńam lạgitʼ aboren Probhu doe sombhuriyeda. Ar inạ mitʼ kathage aboren dulạṛiạ boeha Pạul hõ Isore emakade akelte apeye olatʼpea.

¹⁶ Uniakʼ joto ciṭhirege noako reaṅ inạ mitʼ kathageye oletʼkana. Onako modre adomakʼko babotre menakʼakʼ as bujhạu do muskilgea. Onate baṅ cetʼakatʼ ar baṅ kajak hoṛko do eṭakʼ eṭakʼ sostorko leka noako reakʼ mane hõko pẽṛtayetʼte nijạte nosṭokʼko ạgujoṅ kana.

¹⁷ E dulạṛiạ boehako, ape do noa katha laharegepe baḍae akatʼte sontor akae tahenpe, jemon noko bạṛicʼ hoṛkoakʼ bhul horte aloko bulạu idipe, ar apeakʼ kajak mon khon alope ńurokʼ.

¹⁸ Ape do aboren Probhu ar babańcaoicʼ Jisu Mạsiakʼ daya ar uni reaṅ akelte hara rakabokʼpe. Ńit ar jaejug hạbicʼ uniakʼge ṭhonok hoyokʼtae ma. Amen.