2 Korinthiko 3 - Santali Common Language New Testament

Nawa bondobos

¹ Ale do noako kathate cetʼ arhõ apnarte sarhaokʼle ńamjoṅ kana? Adom adom hoṛko cetʼleka jạruṛakokan, onkage ale hõ cetʼ ape ṭhen khon sarhaokʼ reakʼ ciṭhi jạruṛale kana? Tis hõ baṅ.

² Aleakʼ ontorre olakan ciṭhi ma apege coṅ. Ona ciṭhi reakʼ katha do sanamkogeko baḍaegea ar sanamkogeko paṛhao akada.

³ Apege Mạsiakʼ ciṭhi ar aleakʼ kạmiko reakʼ jo kanpe ona do pusṭạute ńelogokʼ kana. Noa ciṭhi kạlite olakʼ do baṅkana bickom jiwetʼ Isorren Jiu hotetege olakana. Noa do jãhãn dhiri paṭare baṅ olakana, menkhan manwa ontorrege olakana.

⁴ Mạsi hotete Isorre ale do nonkan khạṭi biswạsge menakʼtalea.

⁵ Menkhan apnarte jãhãnakʼ cekae reakʼ daṛe menakʼ talea mentele dạbi daṛeakʼa ona do baṅ, bickom ona lektetʼ do Isor ṭhen khonge hijukʼ kana.

⁶ Mitʼṭen nawa bondobos reakʼ katha baḍae ocole lạgitʼ uni doe lek ocoketʼlea. Noa bondobos do eken ạn-ạriko manao reaṅ do baṅ, menkhan sonot Jiuakʼ ạyurte ontorre gobolokʼ reaṅ kana; ente ạn-ạrite do gogocʼgea menkhan sonot Jiu do jione emokʼa.

⁷ Dhirire olakʼ oka bondobos hotete moron hijukʼkan ona bondobos emokʼ jokhecʼ Isorakʼ do ṭhonok sodorlena. Onate Moseakʼ mẽtãhã hõ Isorakʼ ṭhonokte perecʼlena. Ar ona ṭhonok do bại bạite kom idiyenre hõ Israelko do Moseakʼ mẽtʼãhã secʼ bako beṅgetʼ daṛeada.

⁸ Ona bondobos reakʼ jo nunạkʼ ṭhonokanakʼ hoedaṛeakʼ khan, enḍekhan sonot Jiuakʼ kạmi reakʼ jo do cetʼ artetʼ ṭhonokanakʼ baṅ hoyokʼa?

⁹ Oka bondobos hotete manwa dusi menteye ṭarhaokʼkan ar uniakʼ kạmiko ṭhonokte perecʼge khan, enḍekhan manwa dhorom menteye ataṅokʼre uniakʼ kạmiko do artetʼ ṭhonokte perejokʼtaea.

¹⁰ Sạrige, okaṭakʼ do lahare ṭhonokte perecʼ tahẽkan, ńitokʼ ona reakʼ jãhãn ṭhonok do bạnukʼa, ente ona khon ńitokʼakʼ bondobos reaṅ ṭhonok do artetʼ ḍhergea.

¹¹ Ar caba hijukʼakʼ judi nunạkʼge ṭhonokte perecʼ tahẽkan khan enḍekhan okaṭakʼ jaejug hạbicʼ tahenkan ona do artetʼ ṭhonokte perecʼgea!

¹² Ale do nonkanakʼ as menakʼtalete sodortele roṛetʼkana.

¹³ Ar Mose lekanko dole baṅkana, ente Mose do acʼakʼ mẽtʼãhãe betʼ esetʼetʼ tahẽkana, jemon acʼakʼ caba idikʼkan mẽtʼãhã reakʼ marsal Israelko aloko ńelńam.

¹⁴ Menkhan onko hoṛkoakʼ mon do keṭecʼlen takoa. Onate teheń hạbicʼ hõ ona mare bondobos reakʼ katha paṛhao jokhecʼ onkoakʼ ontorre inạ mitʼ lekanakʼ bedokʼakʼ orwal do tahenkangea, ente eken Mạsi tulucʼ mitʼlen khange ona orwal do ocogokʼa.

¹⁵ Menkhan teheń hạbicʼ Moseakʼ ạn-ạri puthiko paṛhao jokhecʼ Israelkoakʼ ontor do ona orwalte esetʼge tahenkana.

¹⁶ Onko modre jãhãege Probhu secʼ mon ạcurlentakore ona orwal do ocogokʼa.

¹⁷ Probhu kangeae sonot Jiu do; ar okare Probhuren Jiu onḍege sạdhintetʼ.

¹⁸ Onate okoe Mạsi tulucʼ bon mitʼ akan, abo sanamko do bin betʼ mẽtʼãhã ạrsire ńelokʼkan muṭhạn leka Probhuakʼ ṭhonok ńel ńelte apnar hõ ṭhonokte hara rakabokʼte uni lekage bon hoyokʼkana. Probhu, metakʼme sonot Jiu reaṅ daṛetege noa do hoyokʼ kana.