2Timothi 3 - Santali Common Language New Testament

Mucạtʼ dinko reakʼ katha

¹ Noa katha baḍaeme je, mucạtʼ dinkore ạḍi muhin reakʼ okteko hijukʼa.

² Manwa do eken apnargeko dulạṛokʼa, onko do ṭaka-poesako dulạṛa, usul monan ar nindạukoko hoyokʼa, durnamko gahaoa, ar eṅga apa bebataokoko hoyokʼa. Onko do bebatao ar bebhoktikoko hoyokʼa,

³ onkore dulạṛ do baṅ tahena, onko doko jhogṛakʼa menkhan bako miṭmaṭa. Onko do eṭakʼko reakʼko oktawa, ar apnar do bako sambṛao daṛeakʼa, kurmutạhakoko hoyokʼa, ar bhageakʼ doko hirkhạwakʼa.

⁴ Onko do eṛe, ṭhok ar bạḍạite phulạu akanko hoyokʼa. Isor bạgikate rij-roṅge bạ̃ṛtiko dulạṛa.

⁵ Onkoakʼ bahretetʼem ńelle khan Isor bhokti menakʼtakoa mentem bujhạukea, menkhan Isor bhokti reakʼ daṛege onko doko baṅetʼkana. Nonkan hoṛko khon do pharak akae tahenme.

⁶ Nonkan hoṛko modre adomko do oṛakʼ oṛakʼ bolokate lilhi ạimạiko hatetʼkoa, one okoe do kại ghạṭiteko ten akan; onko do nana parkan bạṛicʼ sanateko ạyur ocokʼkana.

⁷ Onko do siń sạṭupʼ sikhnạt reakʼ kathako ańjomeda, menkhan tishõ Isorakʼ sạriakʼ reakʼ khạndritetʼ do bako bujhạu daṛeakʼ kana.

⁸ Cetʼleka Jannes ar Jambres do Mose birudrekin teṅgolen onkage noko hoṛko hõ ona sạriakʼ birudreko teṅgon kana. Nokoakʼ mon do bạricʼgetakoa ar Mạsiakʼ dhorom biswạs reakʼ jãhãn cinhạge onkore baṅ ńamokʼ kana.

⁹ Menkhan onko do ar bako laha daṛeakʼa, ente Jannes ar Jambresakʼ lelhatetʼ cetʼleka sanamko ṭhen pusṭạute sodorlen onkage onkoakʼ lelhatetʼ hõ sanamko ṭhen sodorokʼa.

Timothi lạgitʼ sikhạuna

¹⁰ Am do ińakʼ sikhnạt, cạl-colon, monsubạ, biswạs, sahao daṛe, sombhuri ar dulạṛ do bestegem nirik akada.

¹¹ Ona chaḍa Antiokiạre, Ikoniumre ar Lustrạre paṛao ạdiń tahẽkan santaokoń sahao akatʼ reakʼ katha hõm baḍaegea, menkhan Probhu do onako khone rukhiyạ akadińạ.

¹² Okoe Mạsi Jisu tulucʼ joṛao mitʼkate Isor bhoktite din khemaoko menjoṅkan onko do jotogeko khed ocokʼa.

¹³ Menkhan bạṛicʼko ar bhõnḍko do din din artetʼgeko bạṛicʼ idikʼa. Onko do eṭakʼko bhul horteko idikoa ar apnarhõ bhul horteko calakʼa.

¹⁴ Menkhan am do okaṭakʼem cetʼakatʼ ar khạṭi montem biswạs akan onare ṭarhao akae tahenme, ente okoeko ṭhen khonem cetʼakatʼ ona mam baḍaege.

¹⁵ Huḍiń tahen khonge am do sonot sostor khonem cetʼakawana. Ar noa sonot sostorge am do Jisu Mạsire biswạs iạte kại khon bańcao ńam reakʼ bude danama.

¹⁶ Sonot sostor reakʼ mitʼke mitʼ katha do Isor ṭhen khon hecʼakana ar ona do cecetʼakʼre, udgạure, sudhrạukʼre ar dhoromre etokʼ lạgitʼ jạruṛgea,

¹⁷ jemon Isorren hoṛ purạte lek leka hoekate bhage kạmi lạgitʼ sajakanicʼe hoedaṛeakʼ.