1 Korinthiko 8 - Santali Common Language New Testament

Boṅga samaṅakʼ jomakʼ reaṅ

¹ Iń do ńitokʼ boṅga ṭhen samaṅakʼ jomakʼko reaṅ iń roṛeda. Baḍaegeabon, sanamkoakʼge akel menakʼtabona. Akel do manwae phulạu ocoyea, menkhan dulạṛ doe benao rakapʼa.

² Jãhãe jãhãnakʼe baḍaea menteye menjoṅ kan khan, uni do cetʼleka baḍae jạruṛ tahẽkantae onka do ńit hõ bae baḍae akada.

³ Menkhan okoe Isore dulạṛedekan, Isor do eken unigeye baḍaeyede kana.

⁴ Ńitokʼ do boṅga ṭhen samaṅakʼ jomakʼ reaṅ iń roṛeda. Baḍaegeabon dhạrtire cele boṅgage bạnukʼkoa, ar mitʼ goṭen chaḍa ar cele Isor hõ bạnukʼkoa.

⁵ Serma se dhạrtire deb-debi mente jãhãe menakʼko khan enḍekhan debota hõ aema ar Probhu hõ aema menakʼkoa.

⁶ Enrehõ abo lạgitʼ do mitʼ goṭenge Isor menaea. Unige Baba do; ar uni ṭhen khonge jotowakʼ do hecʼakana ar uni lạgitʼge jiwetʼ menakʼ bona. Aboren Probhu hõe mitʼ goṭengea, uni do Jisu Mạsige. Uni hotetege jotowakʼ do hecʼakana ar uni hotetege jiwetʼ menakʼbona.

⁷ Menkhan noa akel do jotokoakʼ do bạnukʼa. Boṅga sewa reakʼ hewa tahẽkante adomko do ńitokʼ hõ boṅga ṭhen samaṅakʼ jomakʼko jomeda. Onate onkoakʼ bibek hõ nijorgete bhõnḍokʼ kantakoa.

⁸ Menkhan jomakʼ hotete Isor ṭhen do babo teṅgo ṭarhao daṛeakʼa. Ente babon jomle khan aboakʼ do cetʼ loksan hõ baṅ hoyokʼtabona; ar bon jom lekhan hõ jãhãn lab do bạnukʼa.

⁹ Menkhan, sontor akan tahenpe, jemon apeakʼ noa sạdhintetʼ do nijorkoakʼ tạkicʼakʼ aloe hoeocoe.

¹⁰ Amakʼ do akel menakʼtama, menkhan okoeakʼ bibek nijorge uni do boṅga mundilkore jojom duṛupʼe ńellem khan boṅga samaṅakʼ jom lạgitʼ uni hõ cetʼ dil bae ńama?

¹¹ Onkate amakʼ akel karonte nijoricʼ one okoe lạgitʼ Mạsiye gocʼlen, uni doe nosṭokʼa.

¹² Nonkate aperen boehako birudrepe kại ar onkoakʼ nijor bibekkope hạnletako khan enḍekhan ape do Mạsi birudregepe kạiya.

¹³ Onate jomakʼte ińren boehae tạkijokʼ khan, enḍekhan iń do tis hõ jel do bạń joma, jemon ińren boeha aloe tạkijokʼ.