1 Korinthiko 7 - Santali Common Language New Testament

Baplakʼ reaṅ

¹ Ape okako reaṅpe ol akawạdiń, ona reakʼ roṛ ruạṛiń emape kana. Okoe bae baplakʼ enḍekhan uni doe bhageyetʼgea;

² Menkhan goṭa ṭạnḍige loṭghuṭi hoyokʼkana, onate mimitʼ herel hoṛren do rinicʼtetʼe tahentaema, ar mimitʼ maejiuren hõ jãwãetetʼe tahentaema.

³ Hoṛmo secʼte herel do acʼ rinicʼtetʼ oka ńam lektae onae emaema; ar onkage rinicʼtetʼ hõ jãwãetetʼe emkataema.

⁴ Rinicʼtetʼakʼ hoṛmo do eken acʼ eskarakʼ do baṅkana menkhan onare hereltetʼakʼ hõ ektiạri menakʼtaea ar onkaleka jãwãetetʼakʼ hoṛmo hõ acʼ eskarakʼ do baṅkana, menkhan onare rinicʼtetʼakʼ hõ ektiạri menakʼa.

⁵ Alope apan ạpinokʼa; menkhan solha mitʼkate koejoṅ lạgitʼ thoṛa din apan ạpin tahẽ hataṛokʼpe; ona tayom do ar hõ mitʼ ṭhenokʼpe jemon apeakʼ bin sambṛao iạte Soetan aloe biḍạupe.

⁶ Iń do bạń hukumape kana bickom aṛakʼape kan lekageń roṛeda.

⁷ Sanam hoṛge iń lekako hoyokʼma! Menkhan Isor ṭhen khon mimitʼ hoṛ do apan ạpin daya danko ńamakada. Mitʼ hoṛakʼ dan do mitʼleka ar eṭagicʼakʼ dan do eṭakʼleka.

⁸ Baṅ bapla akanko ar rạnḍi maejiukoń metako kana, onko hõ iń lekako tahẽlen khan onko lạgitʼ bhage hoekokʼa;

⁹ menkhan apnarte okoe bako sambṛaokʼ daṛeakʼ onko doko baplakʼma, ente hoṛmo reakʼ sanate lokʼ khon baplakʼge bhagea.

¹⁰ Bapla akanko do noageń hukumako kana, iń do baṅ menkhan Probhuge; bạhu do jãwãetetʼ ṭhen khon aloe chaḍaokʼma;

¹¹ menkhane chaḍao emanlen khan uni do ar aloe baplakʼma, menkhan jãwãetetʼ sãote arhõe mitʼ ruạṛokʼma. Jãwãe hõ bạhutetʼ aloe bạgiyema.

¹² Menkhan eṭakʼko do ińiń metako kana, Probhu do baṅ; jãhãe boeharen Mạsire bepạtiạuicʼ bạhu tahentae ar bạhutetʼ do uni tulucʼ tahene rạjige khan enḍekhan jãwãe do uni aloe bạgiyema;

¹³ onkage rinicʼtetʼren hõ Mạsire bepạtiạuicʼ jãwãeye tahentae ar jãwãetetʼ do uni tulucʼ tahene rạjige khan enḍekhan uni do jãwãetetʼ aloe bạgiyema;

¹⁴ ente rinicʼtetʼ hotete uni bepạtiạricʼ jãwãe ar jãwãetetʼ hotete uni bepạtiạricʼ rinicʼtetʼ doe sonot ocoakana; ar onka baṅ hoelen khan aperen gidrạko do besaphako hoekokʼa, menkhan Isor samaṅre onko do besapha doko baṅkana.

¹⁵ Menkhan uni bepạtiạricʼ jãwãetetʼ se rinicʼtetʼ do chaḍaokʼe menetʼ khan uni doe chaḍaokʼma; ar nonkanakʼ obostare uni pạtiạricʼ boeha se misera do bae golam akana. Menkhan Isor do sulukte tahen lạgitʼgeye hohoakatʼ bona.

¹⁶ E ayo, cekatem baḍaea, am do amren jãwãeyem bańcao daṛeaea se baṅ? Ar E baba am hõ cekatem baḍaea, amren bạhum bańcao daṛeaea se baṅ?

¹⁷ Onate Probhu okoe okalekae dohoakade ar Isor okoe oka lạgitʼe hohoakawade, uni do onka lekageye calakʼma. Noa hukum do goṭa manḍerrenkogeń emakokana.

¹⁸ Jãhãe hoṛ khatna akane hoho ocoakana? Enḍekhan aloe bin khatna ruạṛokʼma? Bin khatnage jãhãeye hoho ocoakana? Enḍekhan uni do aloe khatnakʼma.

¹⁹ Khatna ar bin khatna do cetʼ hõ baṅkana, menkhan Isorakʼ hukum dohoge asolakʼ kana.

²⁰ Isor okoe oka lạgitʼe hohoakawade, uni do onarege tahẽ akane tahenma.

²¹ Amem hoho ocolenre am do cetʼ golamem tahẽkana? Onate alom dukokʼa; ar sạdhinokʼ reakʼ ạtem ńam khan enḍekhan ona do hataome.

²² Golam tahenre Probhu okoeye hohoakawade uni do Probhu hotetegeye sạdhin ocoakana. Onkage okoe sạdhin tahenreye hoho ocoakan uni do Mạsiren golame hoeakana.

²³ Ape do aema damtepe kiriń akana; onate manwakoren golam do ar alope hoyokʼa.

²⁴ E boehako, Isor okoe okalekae hohoakawade, uni do Isor samaṅre onalekageye tahenma.

²⁵ Kũạ̃ri kuṛiko reaṅ do Probhu ṭhen khon jãhãn hukum bạń ńam akada. Menkhan Isorakʼ daya ńamkate pạtiạr minạńte ińiń bujhạuetʼ lekageń roṛeda.

²⁶ Ạḍi harkhet ar saset reakʼ oka okte hijukʼkan ona lạgitʼ ińakʼ bujre okoe okaleka menakʼpe onka tahenge bogea.

²⁷ Am do cetʼ bạhu menae tama? Enḍekhan bạhu bạgiye reakʼ do alom kurumuṭuya. Am do cetʼ bạhu khonem chaḍao akana? Enḍekhan bạhu joṅ reakʼ alom kurumuṭuya.

²⁸ Menkhan amem baplalenre am do bam kạiyetʼ kana. Ar jãhãe kũạ̃ri kuṛiye baplalenre uni hõ bae kạiyeda. Menkhan okoeko baplakʼkan onko do hoṛmore jalako ńama, ar iń do ona khoniń rukhiyạkepea.

²⁹ E boehako, noageń meneda, okte do khaṭo akana. Onate ńit khon bạhuanko do begor bạhuanko lekako tahenma;

³⁰ ar rakʼetʼkanko do bin rarakʼkanko leka; ar rạskạkʼkanko do bin rạskạkʼkanko leka; ar kirińetʼkanko do cetʼge jemon aloko dohojoṅma;

³¹ okoe dhạrti reakʼakʼko laṛcaṛetʼkan, onko do purạpuri aloko laṛcaṛma; ente noa dhạrti reakʼ rup do pheraokʼ kana.

³² Menkhan iń doń menjoṅ kana, jemon nir dạndipe tahen. Bin bapla akanicʼ do Probhu reaṅe dạndikʼ kana, uni doe hudiseda cekate Probhui kusi ocoyea.

³³ Ar bapla akan hoṛge gharońj reakʼ doe dạndikʼ kana; cekate uni do rinicʼtetʼe kusi ocoea mente.

³⁴ Bạhu ar kũạ̃ri kuṛi reaṅ hõ begar menakʼa. Bin baplayicʼ maejiu do Probhu reakʼakʼko reaṅe dandokʼ kana, jemon hoṛmote ar Jiute sonote tahen; menkhan bapla akan kuṛi do gharońj reakʼe dandokʼkana, cekate uni do jãwãetetʼe kusi ocoyea.

³⁵ Noa katha do apeakʼ porho lạgitʼgeń roṛeda. Iń do bạń ladeape kana, bickom oka jạruṛa ar okaṭakʼ bhagea ona lạgitʼgeń udgạuetʼpea, jemon ape do goṭa monte Probhuakʼpe kạmi daṛeakʼ.

³⁶ Ar jãhãe acʼe cikhnạ akade acʼren kũạ̃ri kuṛi tulucʼ bin leke beohareda menteye bujhạuetʼ khan, ar kuṛiyakʼ baplakʼ umer hoeakan khan ar baplaye reakʼ jạruṛe bujhạu khan, enḍekhan uni do acʼakʼ sana lekae kạmi ma. Are onkae khan bae kạiyeda, bapla ocoakin.

³⁷ Menkhan jạruṛ bạnukʼtae iạte acʼakʼ monre ektiạri menakʼtaete jãhãeye mone muruk akatʼ ar ontorreye khạṭi akawan baṅma acʼren kũạ̃ri kuṛi bin baplaye tahẽ ocowaea mente, enḍekhan uni hõe beseda;

³⁸ onate okoe acʼe cikhnạ akade acʼren kũạ̃ri kuṛiye baplayede uni do artetʼe beseda.

³⁹ Jãwãetetʼ tinạkʼ din jiwetʼe tahen, unạkʼ din rinicʼtetʼ do tolgeye tahena, menkhan jãwãetetʼe gocʼlen khan uni doe sạdhinokʼa, ar jãhãegeye kusiae unigeye bapla daṛeaea, menkhan uni hoṛ do Probhurenge jemone hoyokʼ.

⁴⁰ Menkhan ińakʼ bujre uni do enkageye tahẽlen khan artetʼ bhạgane hoyokʼa; ariń meneda, iń do Isorren Jiu hotete noa kathań roṛeda.