1Timothi 2 - Santali Common Language New Testament

Dewa sewa lạgitʼ sikhạuna

¹ Pạhilregeń meneda, sanamko lạgitʼ nehõr, koe, aroj ar gun manao hoyokʼ ma.

² Nonka leka rapajko ar napṛakʼ hudạwanko lạgitʼ hõ koejoṅ hoyokʼa, jemon Isor bhokti ar dhoromte man salakʼ khạtir ar sulukte din bon khemao daṛeakʼ.

³ Aboren babańcaoicʼ Isorakʼ mẽtʼãhã samaṅre ona do bhagegea ar onatege uni doe kusikʼa.

⁴ Uni doe menjoṅkana sanamkoge jemon kại khon bańcaoko ńam ar Mạsi reaṅ sạri khạndritetʼko baḍae daṛeakʼ.

⁵ Isor doe mitʼ goṭengea ar mitʼ goṭengeae Isor ar manwakoren dene banar renicʼ hõ. Uni doe hoyokʼ kana Jisu Mạsi.

⁶ Uni do sanam manwako chaḍaoko reakʼ dam lekate acʼakʼ jiwigeye emena. Isore ṭhik dohoakatʼ oktere ona reaṅ goha do em akana,

⁷ ar noa goha emokʼ lạgitʼ Isor do lại jạhiricʼ, apostol ar boṅgan hoṛ jạtrenko ṭhen biswạs ar sạriạkʼren cecetʼicʼe bahal akadińạ. Iń do sạriakʼgeń roṛeda, eṛe do baṅ.

⁸ Ińakʼ monejoṅakʼ do noage herel hopon do sanam jaegare edre se jhogṛa baṅkate sapha monte sonot ti tulkate jemonko koejoṅ.

⁹ Noa hõń khojkana maejiuko do mạ̃hir ar bhage bud akel salakʼ horokʼ bandere sambṛaokʼ ar lek lekako sajaokʼma. Onko do nana parkan galaṅ upʼ ar sona se mạnik se damanakʼ kicricʼkote aloko sajaokʼma.

¹⁰ Ona bodol bhage kạmikoteko sajaokʼma. Okoe maejiu apnar do Isor bhokti kanako menteko monejoṅkan onko maejiu lạgitʼ do onka hoyokʼge lek kana.

¹¹ Maejiuko do hapegeko tahenma ar purạ puri tabere tahẽkateko cetʼ joṅma.

¹² Lại cecetʼre ar herel cetanre mạliki calao do okoe maejiu hõ bạń aṛakʼako kana. Bickom onko do thirgeko tahenma.

¹³ Ente pạhilre Adamgeye gaṛhao maṛaṅlena; ar ona tayom do hawage.

¹⁴ Ona chaḍa Adam do bae bulạu maṛaṅ ocolena, menkhan maejiugeye bulạu ocolena ar Isorakʼ hukume bebataokeda.

¹⁵ Menkhan maejiuko do gidrạ janamko hoteteko bańcaokʼa; khạjuk sambṛao salakʼ biswạs ar dulạṛ ar sonotokʼreko tahẽ idikʼ.