तीतुस 3 - सादरी नवाँ नियम

बिसवासीमन केर चाइल चलन

¹ बिसवासीमन के याइद दिवाव कि उमन हाकिममन आउर अधिकारीमन केर आदर करोक, आउर उमन केर आगया के मानोक, आउर दोसरमन लगिन बेस काम के करोक।

² केखो बदनाम ना करोक आउर ना केकरो से झगरा लड़ोक, मगर किरपा करेक वाला स्वभाव से रहोक, आउर सोउब आदमीमन केर संगे नरम बाइन के रहोक।

³ काले कि हमरे हों बिसवासी बनेक से पहिले निरबुद्धि, आउर आगया नी मानेक वाला, आउर भ्रम में पड़ल रही, आउर लगातार रकम-रकम केर बुरा काममन के करत रही, आउर सुख बिलास केर काममन के करेक में बंधाल रही, आउर हमरे अपन समय के दुष्ट काममन के करेक में बितात रही, आउर दोसरमन से हिसिंगा-डाह करेक में जिंदगी के बितात रही, दोसरमन हमरे से नफरत करत रहैं आउर हमरे एक दोसर संगे नफरत करत रही।

⁴ मगर फिन भी हमर छुटकारा देवाइया परमेश्‍वर हमरे उपरे अपन दया आउर प्रेम देखालक।

⁵ आउर हमरे के हमर पाप केर दंड से बचालक, आउर इ धरम केर काममन केर चलते निहीं, जे हमरे खुद करली, मगर अपन दया केर चलते हमरे उपरे किरपा करलक, आउर परमेश्‍वर हमरे के अपन पवितर आत्मा देई के बचालक, जे हमरे केर पापमन के धोई देलक आउर नवाँ जिंदगी आउर नवाँ स्वभाव देलक।

⁶ परमेश्‍वर हमरे के मुफत में पवितर आत्मा के देई हे, ताकि उ शक्ति केर साथ हमर में काम करी, काले कि यीशु मसीह हमर पापमन लगिन मोइर हे आउर हमरे केर छुटकारा देवाइया बाइन जाय हे।

⁷ परमेश्‍वर एइसन काइर के अपन किरपा से हमरे के धरमी ठहरालक, आउर हमरे उकर संतान बाइन गेली, से लगिन हमरे जुग-जुग ले उकर संग रहेक केर आसरा करिला।

⁸ इ गोइठ सच हेके आउर मोंय चाहोना कि तोंय इ गोइठमन केर बारे में बिसवासीमन के पोक्ता से सिखाबे, इ लगिन कि जेमन परमेश्‍वर उपरे बिसवास काइर हैं, उमन भला काममन के करते रहेक में धेयान देवोक, इ गोइठमन बेस आउर आदमीमन लगिन फायदा केर हेके।

⁹ मगर तोंय बे मतलब केर उटपटांग बक झक, पुरखामन केर बंशावली, बिरोध आउर झगरामन से दूर रह, जे मूसा केर नियम केर बारे में अहे, काले कि उमन बेकार आउर कोनों फायदा केर ना लगे।

¹⁰ अगर केऊ कलीसिया के तोरेक वाला अहे, तो उके कम से कम दूई बेर चेताव कि उ एइसन ना करोक, फिन भी अगर उ एइसनेहें करते रहेला तो उकर से अलगे होई जा।

¹¹ इ जाइन के कि एइसन आदमी जाइन बुइझ के बुरा डहर में चलेला आउर पाप करेला। उकर बुरा काममन हें बतायला कि उ दोषी अहे।

तीतुस के सलहा आउर जोहार

¹² मोंय अरतिमास चाहे तुखिकुस के तोर ठिना क्रेते टापू भेजमूँ, जब उ पोंहची तो तोंय मोर ठिना नीकुपुलिस नगर आवेक केर कोशिश करबे, काले कि मोंय जाड़ केर महिना हुवाँय बिताएक केर बिचार काइर हों।

¹³ जब वकील जेकर नाँव जेनास हेके, आउर एगो दोसर आदमी जेकर नाँव अपुल्लोस हेके, अपन डहर हिंठबैं तो तोंय जेतना उमन केर मदइत करेक पारिसला ओतना मदइत करबे। आउर जे कोनों उ मनक डहर खरचा लगिन जरुरत अहे, उ सोउब के उमन ले देबे, ताकि उमन के डहर में कोनों चीज केर घटी ना होवोक।

¹⁴ तोंय सिरिफ बिसवासीमन केर धेयान के अपन बटे करेक लगिन ना सिखाव, मगर उमन के भला काम करेक लगिन कड़ा मेहनइत करेक हों सिखाव। ताकि जे आदमीमन केर जरुरत अहे उमन केर जरुरत के पूरा करल जाओक, इ चीज बिसवासीमन के एगो मकसद केर साथ जियेक में मदइत करी।

¹⁵ सोउब बिसवासीमन जेमन हिंयाँ मोर संगे अहैं, तोहरे के जोहार कहैना, आउर जे हमर संगी बिसवासीमन क्रेते टापू में अहैं आउर हमर से प्रेम करैना, उमन के हों जोहार, मोंय प्रार्थना करोना कि परमेश्‍वर तोहरे सोउब केर उपरे किरपा करोक।