तीतुस 2 - सादरी नवाँ नियम

खरा शिक्षा

¹ मगर हे तीतुस, तोर लगिन इ ठीक हेके कि बिसवासीमन के तोंय सिरिफ ओहे सिखाव, जे यीशु मसीह केर बारे में सच्चा शिक्षा हेके।

² मतलब बूढ़ा आदमी के संयम आउर एइसन समझदारी से ब्यवहार करेक चाही, ताकि आदमीमन उकर आदर करबैं। आउर उके परमेश्‍वर उपरे पक्का बिसवास करेक चाही, आउर दोसरमन के सच्चाई से प्रेम करेक आउर दुःखमन में धीरज धारेक चाही।

³ एहे लेखे बुढ़िया जनानामन के उ जनानामन नियर ब्यवहार करेक चाही जेमन परमेश्‍वर केर लगिन भक्ति केर जिंदगी जियैना। उमन दोसरमन केर निंदा करेक वाला आउर पियंक्कड़ ना होवोक, मगर उमन के दोसरमन के बेस जिंदगी जियेक केर तरीका सिखाएक चाही।

⁴ ताकि उमन एगो बेस नमूना देखाबैं आउर जवान जनानामन के सलहा देवेक केर लायक होबैं, ताकि जवान जनानामन अपन पतिमन आउर छउवामन से प्रेम रखोक।

⁵ आउर संयम, अपन पति केर परती ईमानदार, घर के बेस से चलाएक वाला, दोसरमन के दया करेक वाला आउर अपन-अपन पति केर आदर करेक वाला होवोक, ताकि केऊ परमेश्‍वर केर संदेश केर बारे में निंदा करेक ना पारोक।

⁶ एइसनेहें जवान मरदानामन के हों समझाव, कि संयम आउर समझदारी से काम करोक।

⁷ तोके सोउब गोइठमन में एगो नमूना नियर बेस काम काइर के दोसरमन के देखाएक चाही, ताकि दोसरमन हों उके करबैं। जब तोंय सिखाबे तो सही नीयत आउर आदर पावेक लायक सिखाबे

⁸ आउर सच्चाई के एइसन सिखाव जेकर बुराई करेक नी पराई, ताकि तोर दुश्मन के बिरोध में कहेक केर कोनों मोका ना मिलोक आउर उ लाजिम होई जाओक।

⁹ कलीसिया में धांगरमन के समझाव कि उमन अपन-अपन मालिक केर आगया मानोक, आउर सोउब गोइठमन में उमन अपन मालिक के खुश करेक केर कोशिश करोक आउर उलटाय के जबाब ना देवोक।

¹⁰ उमन मालिक केर कोनों चीजमन केर चोरी ना करोक, मगर सोउब रकम से पूरा ईमानदार रहोक। ताकि आदमीमन उ मनक बेस ब्यवहार के धेयान देबैं। आउर उ मनक बेस काम आदमीमन के हमरे केर छुटकारा देवाइया परमेश्‍वर केर बारे में संदेश सुनेक केर जरिया बनोक।

¹¹ काले कि परमेश्‍वर हरेक आदमीमन लगिन छुटकारा पावेक केर डहर देखाय के, इ बताय देई हे कि उ केतना किरपा करेक वाला हेके।

¹² आउर अपन किरपा से परमेश्‍वर हमरे के सिखायला कि हमरे ओइसन ब्यवहार करेक छोइड़ देवब जे उके खुश नी करेला। आउर जे चीजमन केर इच्छा अबिसवासीमन करैना उकर इच्छा हमरे नी करब, आउर जबकि हमरे एखन इ दुनिया में हें अही, तो बुद्धिमानी आउर भक्ति केर संग इ नियर काम करब जे परमेश्‍वर के खुश करेला।

¹³ आउर हमरे उ आसरा मतलब हमरे केर महान परमेश्‍वर आउर छुटकारा देवाइया यीशु मसीह के तेज चमक केर संगे दोबारा घूइर आवेक केर इंतजार कराथी।

¹⁴ जे खुद के हमर लगिन बलिदान काइर देलक, आउर हमरे के सोउब रकम केर अधरम से छुटकारा देलक आउर शुद्ध काइर के हमरे के अपन लगिन खास आदमी बनाय लेलक, जे भला काम करेक लगिन पूरा पुरी तेयार रहोक।

¹⁵ से लगिन हे तीतुस, मोंय चाहोना कि तोंय क्रेते टापू केर बिसवासीमन के इ गोइठमन के सिखाव, जेमन के मोंय तोके सिखाय हों आउर उके करेक लगिन उसकाव। जहाँ जरुरत होवी हूवाँ उमन के सुधराव, तोके एइसन करेक केर पूरा अधिकार अहे। जे कोनों तोंय सिखाइसला उके केऊ अनदेखा ना करोक।