रोमानियनमन 9 - सादरी नवाँ नियम

परमेश्‍वर आउर उकर चुनल आदमीमन

^1-3 जब, अगर कोनोवें चीजमन हमरे के परमेश्‍वर केर प्रेम से अलग करेक नी पारी, तो काले इसराइली आदमीमन परमेश्‍वर से अलग होई गेलैं? मोंय उमन केर लगिन ढेइर दुःखी अहों, आउर मोर हिरदय उमन केर लगिन सोउब बेरा पोड़ेला। आउर मोंय सचमुच में कहोना, मोंय खुद हें मोर अपन भाई बहिनमन केर मुक्ति लगिन दोषी गिनातों आउर मसीह से अलग होई जतो, मोंय एहे इच्छा कराथों। इ सोउब मोंय मसीह के अपन गवाह बनाय के सच्चाई से बताथों, आउर पवितर आत्मा आउर मोर दिल हों एहे गवाही देवाथे कि इ सोउब झूठा ना लगे।

⁴ उमन इसराइली आदमी हेकैं जइसन मोंय, उमन परमेश्‍वर केर बालपोस बढ़ाल संतान बनेक लगिन चुनल जाय हैं, आउर महिमा आउर करार आउर मूसा केर नियम पाय हैं, आउर भक्ति आउर करारमन ओहेमन केर हेके।

⁵ अब्राहम, इसहाक आउर याकूब उ मनक पुरखामन हेकैं, आउर मसीह खुद काया केर हिसाब से इसराइली रहे, सोउब केर उपरे राइज करेक वाला परमेश्‍वर केर महिमा जुग-जुग होते रहोक। आमीन।

⁶ मगर मोंय इ नी कहाथों कि परमेश्‍वर अपन करार के पूरा करेक नी पारलक, काले कि सोउब इसराइल केर बंशमन सच्चा इसराइली ना लगैं।

⁷ आउर अब्राहम केर बंश होवेक केर चलते उमन अब्राहम केर सच्चा संतान नी बनैना, मगर जइसन पवितर किताब में लिखल अहे “इसहाक से हें तोर बंश कहाई।”

⁸ मतलब काया से जनमल संतान परमेश्‍वर केर संतान निहीं, मगर सिरिफ करार केर संतानमन अब्राहम केर संतान गिनल जायना।

⁹ काले कि करार केर बचन इ हेके, “अगला साल एहे बेरा मोंय दोबारा आमूँ, आउर सारा केर एगो बेटा होवी।”

¹⁰ आउर सिरिफ एहे निहीं, मगर रिबका केर जुड़वाँ बेटामन केर हों आबा ओहे हमर पुरखा इसहाक रहे।

^11-12 आउर हिंयाँ तक कि उमन केर जनम से पहिले, या उमन केर भला आउर बुरा करेक से पहिले, परमेश्‍वर रिबका से कहलक “तोर बड़का बेटा छोटका बेटा केर सेवा करी” परमेश्‍वर एइसन इ देखाएक लगिन कहलक कि उ अपन इच्छा केर मोताबिक काम करेला, इ निहीं कि उमन कोनों काइर रहैं।

¹³ जइसन पवितर किताब में लिखल अहे, “मोंय याकूब से प्रेम करलों, मगर एसाव से प्रेम नी करलों।”

¹⁴ तो हमरे का कहब? का परमेश्‍वर केखो चुनेला तो उके चुनेक में अन्यायी अहे? निहीं! बिलकुल निहीं!

¹⁵ काले कि परमेश्‍वर मूसा से कहेला, “मोंय जेकर उपरे दया करेक चाहोना उकर उपरे दया करमूँ, आउर जेकर उपरे किरपा करेक चाहोना उकर उपरे किरपा करमूँ।”

¹⁶ परमेश्‍वर उके चुनेला जेकर में उ अपन दया देखाएक चाहेला, उकर चुनेक इकर में टिकल नखे कि आदमीमन का चाहैना या का करेक खोजैना।

¹⁷ पवितर किताब में लिखल अहे परमेश्‍वर मिसर केर राजा फिरौन से कहलक, “मोंय तोके एहे लगिन राजा बनाय हों कि तोर में अपन शक्ति देखामूँ, आउर मोर नाँव केर परचार गोटा दुनिया उपरे होवोक।”

¹⁸ सेले उ जेकर उपरे चाहेला, उकर उपरे दया करेला, आउर जेके चाहेला, उके कठोर बनाय देवेला।

परमेश्‍वर केर खीस आउर उकर दया

¹⁹ तब थोरेक आदमीमन मोर से कहबैं, “अगर एइसन अहे, तो परमेश्‍वर काले कहेला हमरे बुरा अही, परमेश्‍वर केर इच्छा केर बिरोध के करेक पारेला?”

²⁰ हे संगी, तोंय केहर हेकिस, जे परमेश्‍वर से सवाल पुछिसला? जे चीज के बनाल जाय हे, का उ बनाएक वाला से कहेक पारी कि तोंय मोके काले बनाले?

²¹ का कुम्हार के माटी केर उपरे अधिकार नखे कि उ एके गो लोंधा में से, एगो बासन के खास काम लगिन, आउर दूसरा के साधारण काम लगिन बनाई?

²² तो इकर में कोन सा ताजुब केर बात अहे? परमेश्‍वर अपन खीस के आउर अपन शक्ति के, उ सोउबमन के देखाएक चाहेला जेमन नाश होवेक केर लाएक अहैं। मगर उ धीरज से उमन के सहलक।

²³ आउर दया पावल आदमीमन उपरे जेमन के परमेश्‍वर अपन महिमा केर लगिन पहिलेहें से तेयार काइर हे, अपन ढेइर महिमा के देखाई।

²⁴ मतलब हमरे उपरे जेमन के उ ना सिरिफ यहूदीमन में से, बल्कि परजाइत आदमीमन में से हों चुनलक।

²⁵ जइसन कि परमेश्‍वर परजाइतमन केर बारे में अपन संदेश के बताएक वाला होशे केर किताब में हों इ कहेला, “जेमन मोर परजा नी रहैं, उमन के मोंय अपन परजा कहमूँ, आउर जेमन मोर दुलारा नी रहैं उमन के अपन दुलारा कहमूँ।

²⁶ आउर ढेइर ठाँवमन में परमेश्‍वर कइह हे कि तोहरे मोर आदमी ना लगा, ओहे ठाँवमन में परमेश्‍वर उमन के हकाय के कही तोहरेमन मोर संतान हेका।”

²⁷ आउर परमेश्‍वर केर संदेश के बताएक वाला यशायाह इसराइलीमन केर बारे में हकाय के कहेला, “चाहे इसराइली आदमीमन केर गिनती समुदर किनारे केर बालू नियर ढेइर अहे, फिन भी उमन थोरहें बाचबैं।

²⁸ काले कि प्रभु अपन बचन के पूरा काइर के दुनिया केर सोउब आदमीमन केर तुरते सच्चाई से न्याय करी आउर धरम से सिद्ध करी।

²⁹ जइसन परमेश्‍वर केर संदेश के बताएक वाला यशायाह पहिलेहें कइह रहे कि अगर स्वरग केर सेनामन केर प्रभु हमरेमन के बंश बनेक केर हक नी देतक, तो हमरे सदोम आउर अमोरा नगरमन केर आदमीमन नियर होई जाती, जेमन के परमेश्‍वर पूरा-पुरी नाश काइर देलक।”

इसराइली आदमीमन केर अबिसवास

³⁰ तो हमरे का कहब? इ कि परजाइत आदमीमन खुद के परमेश्‍वर केर भीरे धरमी बनाएक केर कोशिश नी करत रहैं, मगर उमन अपन बिसवास से परमेश्‍वर बटले धरमी बनाल गेलैं।

³¹ मगर इसराइली आदमीमन मूसा केर नियम के माइन के परमेश्‍वर केर देखेक में धरमी बनेक केर कोशिश करत रहैं, उमन धरमी बनेक नी पारलैं।

³² एइसन कइसन होवी? काले कि उमन बिसवास से निहीं, मगर भला काममन से धरमी बनेक केर कोशिश करत रहैं, उमन मसीह केर इनकार करलैं, जे ओहे पखना नियर अहे जेकर से आदमीमन ठोकर खायना।

³³ जइसन पवितर किताब में लिखल अहे, “देखा मोंय यरुशलेम शहर में एगो एइसन पखना रखाथों जे आदमीमन के जाएक आउर रोकेक केर कारण होवी, एइसन पखना जेकर से आदमीमन ठेसाय के गिरबैं, आउर जे उकर उपरे बिसवास करी उ कहियो लाजिम नी होवी।”