रोमानियनमन 8 - सादरी नवाँ नियम

पवितर आत्मा बटले जिंदगी

¹ से लगिन अब जेमन मसीह यीशु में अहैं, उमन के परमेश्‍वर दंड नी देवी। (काले कि उमन काया केर मोताबिक निहीं बल्कि आत्मा केर मोताबिक चलैना।)

² पवितर आत्मा तोहरेमन के जिंदगी देवी, जे जिंदगी मसीह यीशु बटले आवेला आउर उ तोहरे के पाप आउर माउत से आजाद करी।

³ काले कि जे काम के मूसा केर नियम हमरे केर पापी स्वभाव केर चलते कमजोर होई के नी करेक पारलक, उके परमेश्‍वर करलक मतलब अपनेहें बेटा के हमरे नियर पापी बनाय के, आउर हमरे केर पापमन लगिन बलिदान होवेक ले भेइज के पापी काया केर बराबइर में, आउर पाप केर बलिदान होवेक लगिन भेइज के, परमेश्‍वर मसीह केर काया में पाप केर दंड देलक।

⁴ इ लगिन कि मूसा केर नियम केर माँग हमरे में जे पापी स्वभाव केर मोताबिक निहीं बल्कि पवितर आत्मा केर मोताबिक चलिला, पूरा करल जाओक।

⁵ काले कि जेमन पापी स्वभाव केर कब्जा में अहैं उमन पाप काममन केर बारे में सोचैना, मगर जेमन पवितर आत्मा केर कब्जा में अहैं उमन आत्मा के खुश करेक केर बारे में सोचैना।

⁶ इ लगिन अपन मन केर उपरे पापी स्वभाव के कब्जा करेक देवेक माउत के लानेला, मगर अपन मन केर उपरे आत्मा के कब्जा करेक देवेक जिंदगी आउर शांति के लानेला।

⁷ काले कि पापी स्वभाव केर कब्जा में रहेक परमेश्‍वर केर दुश्मन बनेक हेके, काले कि पापी स्वभाव ना परमेश्‍वर केर नियम केर अधीन अहे आउर ना कहियो होवी।

⁸ आउर जेमन पापी स्वभाव केर कब्जा में अहैं, उमन परमेश्‍वर के खुश करेक नी पारबैं।

⁹ मगर जब पवितर आत्मा तोहर में बसेला, तो तोहरेमन पापी स्वभाव केर कब्जा में नखा, मगर आत्मा केर कब्जा में अहा। अगर केकरो में मसीह केर आत्मा नखे तो उ उकर आदमी ना लगे।

¹⁰ अगर मसीह तोहर में अहे तो पाप केर चलते काया मोरल होते हुए हों, धरमी ठहराल जाएक केर चलते तोहर आत्मा जिंदा अहे।

¹¹ आउर अगर पवितर आत्मा जे यीशु के मोरलमन में से जियालक तोहर में बसल अहे, तो जे मसीह के मोरलमन में से जियालक, उ तोहर नाश होवेक वाला कायामन के हों अपन आत्मा केर द्वारा जे तोहर में बसल अहे जियाई।

¹² तो हे बिसवासी भाईमन, हमरे के उ नियर चलेक अहे जइसन परमेश्‍वर केर आत्मा कहेला, आउर उ नियर चलेक नखे जइसन पापी स्वभाव चाहेला।

¹³ काले कि अगर तोहरेमन काया केर स्वभाव केर मोताबिक चलबा, तो परमेश्‍वर से अलग होई जबा, अगर पवितर आत्मा केर शक्ति से काया केर स्वभाव केर इच्छा के रोकबा, तो परमेश्‍वर में बनल रहबा।

¹⁴ जेतना आदमीमन परमेश्‍वर केर आत्मा केर चलाल में चलैना, ओहेमन परमेश्‍वर केर संतान हेकैं।

¹⁵ तोहरेमन के गुलामी केर आत्मा नी मिल हे कि फिन तोहरे परमेश्‍वर से डराबा, मगर पवितर आत्मा तोहरे के परमेश्‍वर केर संतान बनायला, जेकर से हमरे हे आबा कइह के हकाइला।

¹⁶ पवितर आत्मा खुद हें हमर आत्मा केर संगे गवाही देवेला कि हमरे परमेश्‍वर केर संतान हेकी।

¹⁷ आउर अगर संतान हेकी, तो हकदार हों हेकी बल्कि परमेश्‍वर केर हकदार आउर मसीह केर संगी हकदार हेकी, जब एखन हमरे उकर संगे दुःख उठाथी तो उकर संगे महिमा हों पावब।

एखन दुःख मगर आवेक वाला समय में महिमा

¹⁸ मोंय पक्का जानोना कि जे दुःख आउर तकलीफ एखन हमरे उठाथी, उ हमरे उपरे आवेक वाला महिमा केर सामने कोनोवें नखे।

¹⁹ काले कि परमेश्‍वर केर सिरजाल चीजमन आसरा भरल नजइर से परमेश्‍वर केर सच्चा संतानमन के दिस्तार होवेक केर डहर देखाथैं।

²⁰ काले कि परमेश्‍वर केर बनाल सोउब कुछ केर कीमत सिराय गेलक, आउर इ सोउब कुछ इ लगिन नी होलक कि उ चीजमन एइसन चाहत रहैं, मगर परमेश्‍वर एइसन होवेक देलक। मगर एखनोहों आसरा अहे

²¹ आउर परमेश्‍वर केर सिरजाल चीजमन उ दिन के देखाथैं, जब उमन परमेश्‍वर केर संतानमन से, माउत आउर नाश होवेक से छूइट के महिमा से भरल आजादी केर संगे मिलबैं।

²² हमरे जानिला कि सोउब सिरजाल चीजमन बथा से कुंहराथैं, जइसन एगो जनाना छउवा जनम देवेक बेरा बथा से कुंहरेला।

²³ आउर सिरिफ सिरजाल चीजमन भइर नी कुंहराथैं, मगर हमरेमन हों जेमन आवेक वाला महिमा केर सवाद के चखेक लगिन पवितर आत्मा के परमेश्‍वर केर पहिला चीज केर रूप में पाय ही खुद हें कुंहराथी, मगर अब हमरे परमेश्‍वर केर आसरा देखाथी कि उ हमरे के अपन नीज संतान केर रूप में अपनाय लेवोक, इ सोउब तब होवी जब परमेश्‍वर हमरे केर इ कायामन के नवाँ काया बनाय के छुटकारा काइर देवी।

^24-25 इकर आसरा परमेश्‍वर हमरे के देई हे जब हमरे छुटकारा पाली। हमरे एखन तक उ सोउब के नी पाय ही जेके देवेक केर करार परमेश्‍वर हमरे से काइर हे, से लगिन हमरे एखन तक उके पावेक केर आसरा करिला, आउर से लगिन जब तक हमरे उके नी पावब तब तक धीरज से आसरा देखाथी।

²⁶ एहे नियर जब हमरे परमेश्‍वर उपरे भरसा करेक में ढेइर कमजोर रहिला तब पवितर आत्मा हमर मदइत करेला, काले कि हमरे नी जानिला कि प्रार्थना का नियर करेक चाही, मगर पवितर आत्मा खुद हें कुंहइक-कुंहइक के जेके बताएक नी पराई, हमर लगिन प्रार्थना करेला।

²⁷ आउर परमेश्‍वर जानेला कि पवितर आत्मा का कहाथे, काले कि उ पवितर आदमीमन लगिन परमेश्‍वर केर इच्छा केर मोताबिक प्रार्थना करेला।

²⁸ आउर हमरे जानिला कि जेमन परमेश्‍वर से प्रेम करैना, उमन लगिन सोउब गोइठमन मिल के भलाई के हें लानेला, मतलब ओहेमन लगिन जेमन उकर इच्छा केर मोताबिक चुनल जाय हैं।

²⁹ काले कि जेमन के उ पहिले से चुइन लेई हे, उमन केर लगिन पहिले से फैसला हों काइर लेई हे कि उमन उकर बेटा नियर बाइन जाबैं, ताकि उकर बेटा ढेइर भाईमन में पहिलौठा बनोक।

³⁰ फिन जेमन केर लगिन उ पहिले से फैसला काइर हे, उमन के बोलालक हों, आउर जेमन के बोलालक उमन के धरमी हों बनालक, आउर जेमन के धरमी बनालक उमन के महिमा हों देई हे।

परमेश्‍वर केर प्रेम

³¹ इ सोउब के देखते हुए हमरे इ कहेक पारिला कि अगर परमेश्‍वर हमर बटे अहे, तो केऊ हमरे के हरुवाएक नी पारबैं।

³² परमेश्‍वर अपन नीज बेटा के हों नी बचालक, मगर उके हमरे सोउब केर खातिर दुश्मनमन के जिम्मा देई देलक, तो परमेश्‍वर उ सोउब कुछ के हों हमरे के देवी, जेके देवेक केर करार काइर हे।

³³ केऊ परमेश्‍वर केर भीरे हमरे के दोष लगाएक नी पारबैं, काले कि परमेश्‍वर हमरे के धरमी बनाय हे।

³⁴ आउर केऊ हमरे के दंड देवेक नी पारी, काले कि यीशु मसीह हमर लगिन मोरलक आउर फिन मोरलमन में से जी उइठ के परमेश्‍वर केर भतखाइया आरा बाइठ हे, आउर हमर लगिन प्रार्थना हों कराथे।

³⁵ कोनोवें चीज हमरे के मसीह केर प्रेम से अलग करेक नी पारी। ना सताव, ना संकट, ना हुड़दंग, ना अकाल, ना गरीबी, ना खतरा, या तलवाइर।

³⁶ जइसन लिखल अहे, “परमेश्‍वर केर खातिर हमरे के रोज दिन आदमीमन माइर मोराएक केर धमकी देवाएना, आउर हमरे से एइसन ब्यवहार करैना जइसन बलि करेक वाला भेड़ी के बलि करेक लगिन लेगैना”

³⁷ मगर इ सोउब बुरा चीजमन में हमरे उकर चलते जे हमर से प्रेम काइर हे पूरा जीत पाय ही।

³⁸ काले कि मोंय पक्का जानोना कि कोनोवें चीज हमरे के परमेश्‍वर केर प्रेम से अलग करेक नी पारी। ना माउत, ना जिंदगी, ना स्वरगदूत, ना अधिकारी, ना आइज केर डार, ना काइल केर चिंता, आउर ना ही नरक केर शक्ति हमरे के परमेश्‍वर केर प्रेम से अलग करेक पारी,

³⁹ आउर ना उपरे आकाश केर शक्ति चाहे नीचे धरती केर शक्ति, सचमुच में परमेश्‍वर केर सिरजाल चीजमन में से कोनोवें चीजमन हमरे के परमेश्‍वर केर प्रेम से, जे हमरे के प्रभु यीशु मसीह बटले मिल हे, अलग करेक नी पारी।