रोमानियनमन 7 - सादरी नवाँ नियम

बिहा करल जिंदगी केर उदाहरन

¹ हे बिसवासी भाईमन, तोहरेमन जानाला (मोंय मूसा केर नियम के जानेक वालामन से कहोना) कि जब तक आदमी जिंदा रहेला, तब तक उकर उपरे मूसा केर नियम केर अधिकार रहेला।

^2-3 जइसन कि मूसा केर नियम कहेला, एगो आदमी केर जनाना तब तक उकर संगे रहेला जब तक उकर आदमी जिंदा रहेला, मगर जब उकर आदमी मोइर जायला तो उ जनाना केऊ दोसर आदमी से बिहा करेक लगिन आजाद होई जायला। मगर, अगर उकर आदमी जिंदा अहे आउर उ दोसर आदमी से बिहा करेला, तो उ जनाना ब्यभिचार करेला।

⁴ तइसनेहें हे मोर बिसवासी भाईमन, जब तोहरेमन हों मसीह केर संगे मोइर गेला, तब मूसा केर नियम केर अधिकार से हों छूइट गेला। अब तोहरे मसीह केर होई गेला जे मोरलमन में से जी उठलक, ताकि तोहरेमन परमेश्‍वर लगिन फल लानेक वाला जिंदगी जिबा।

⁵ काले कि जब हमरे पापी स्वभाव केर अधिकार से चलाल जात रही, तो पाप केर इच्छामन हमरे केर भीतरे काम करत रहे, आउर इ पापी इच्छामन माउत के लानेक लगिन हमरे केर काया में काम करत रहे।

⁶ मगर हमरे मूसा केर नियम में जे लिखल अहे, उकर लगिन मोइर गेली, जे एक बेर हमरे के गुलाम बनाय के राइख रहे, अब हमरे उकर से एइसन छूइट गेली कि अब परमेश्‍वर केर सेवा हमरे उकर आत्मा केर आगया माइन के पुरना तरीका से निहीं, जेकर में लिखल नियम के पालन करेक पड़त रहे, बल्कि नवाँ तरीका से करेक पारिला।

मूसा केर नियम आउर पाप

⁷ तो हमरे का कहब? का मूसा केर नियम पाप हेके? निहीं बिलकुल निहीं! बल्कि मूसा केर नियम से हें मोंय पाप का हेके सेके जानलों। लोभ करेक पाप हेके सेके मोंय इकरे से जानलों, काले कि मूसा केर नियम में लिखल अहे, “तोहरे लोभ ना करबा,” निहीं तो लोभ करेक पाप हेके सेके मोंय नी जानतों।

⁸ मगर मूसा केर नियम केर द्वारा पाप के मोर में सोउब रकम केर लोभ सिरजाएक केर मोका मिल गेलक, काले कि मूसा केर नियम केर बिना पाप मोरल अहे।

⁹ मोंय तो पहिले पाप के जानते हें नी रहों मगर जब मोंय मूसा केर नियम के जानलों, तो मोर में पाप करेक केर इच्छा होवेक लगलक आउर मोंय परमेश्‍वर से दूर होई गेलों।

¹⁰ आउर ओहे आगया जे जिंदगी लगिन रहे, मोर लगिन माउत केर कारण बनलक।

¹¹ काले कि मूसा केर नियम केर द्वारा पाप मोका पाय के मोके बहकाय देलक आउर उकरे चलते मोके मोराइयो देलक।

¹² इ नियर हमरे देखिला कि मूसा केर नियम पवितर अहे, आउर उकर आगया हों पवितर, धरमी आउर भला अहे।

¹³ तो का मूसा केर नियम जे बेस रहे, मोर लगिन माउत केर कारण होलक? निहीं! बिलकुल निहीं! मगर पाप जे मूसा केर नियम के जे बेस रहे उकर द्वारा मोर लगिन माउत के लेई आनलक। इ नियर पाप साबित करलक कि सचमुच में पाप का हेके आउर आगया से पता चललक कि पाप सोउब रकम से बुरा अहे।

आदमी केर मन में पाप से लड़ाई

¹⁴ हमरे जानिला कि मूसा केर नियम तो आत्मिक अहे, मगर मोंय काया में अहों आउर पाप केर गुलाम अहों।

¹⁵ आउर जे मोंय करोना, उके नी जानोना, काले जे बेस काम मोंय करेक चाहोना उके नी करोना, इकर बदली उ काम के करोना जेके मोंय घिरना करोना।

¹⁶ आउर अगर, जे मोंय नी चाहोना ओहे बुरा काम के करोना, तो मोंय माइन लेवोना कि मूसा केर नियम भला अहे।

¹⁷ तो एइसन दशा में उ बुरा काम के करेक वाला मोंय निहीं, बल्कि पाप हेके, जे मोर में बसल अहे।

¹⁸ काले कि मोंय जानोना कि मोर पापी स्वभाव में कोनों बेस चीज नी बसेला, भला काम करेक केर इच्छा तो मोर में अहे, मगर उके करेक मोर से नी होवेला।

¹⁹ काले कि जे बेस काम के करेक केर मोंय इच्छा करोना, उके तो नी करेक पारोना, मगर जे बुरा काम के करेक केर इच्छा मोंय नी करोना, उखे करते रहोना।

²⁰ से लगिन, अगर मोंय ओहे काम के करोना जेकर इच्छा नी करोना तो उकर करेक वाला मोंय ना लगों, मगर पाप हेके जे मोर में बसल अहे।

²¹ इ लेखे मोंय इ नियम के पाओना कि जब भलाई करेक केर इच्छा करोना, तो बुरा काम के हें करोना।

²² काले कि मोंय पूरा मन से तो परमेश्‍वर केर नियम से खुश रहोना।

²³ मगर मोके अपन काया केर अंगमन में दोसर रकम केर नियम दिसेला, जे उ नियम से लड़ेला, जेके मोर मन परमेश्‍वर केर नियम मानेला, आउर उ शक्ति मोके पाप केर गुलाम बनायला जे एखनो तक मोर काया केर अंगमन में अहे।

²⁴ मोंय कइसन अभागा आदमी हेकों! मोके इ माउत केर काया से केहर छुड़ाई?

²⁵ मोंय परमेश्‍वर के धन्यबाद देवोना काले कि ओहे मोके यीशु मसीह हमर प्रभु केर द्वारा छुटकारा देवी। मोंय अपन मन से तो परमेश्‍वर केर नियम के मानेक चाहोना, मगर मोंय एखनो तक पाप केर गुलाम में अहों काले कि मोर मन में बुरा इच्छा अहे।