रोमानियनमन 13 - सादरी नवाँ नियम

राइज केर परती जिम्मेदारी

¹ हरेक आदमी सरकारी अधिकारीमन केर अधीन रहोक, काले कि सोउब अधिकार परमेश्‍वर बटे से मिलेला आउर जे अधिकारीमन अहैं, उमन परमेश्‍वर बटले हें ठहराल जाय हैं।

² इकर लगिन जे केऊ आदमी उमन केर आगयामन के नी मानेला, जेमन के राइज करेक केर अधिकार मिल हे, तो उ आदमी परमेश्‍वर केर नियम केर बिरोध करेला, आउर नियम केर बिरोध करेक वालामन दंड पाबैं।

³ अगर केऊ भला करेला तो उके सरकार से डराएक केर जरुरत नखे। मगर, अगर उ बुरा करेला तो उके डराएक चाही, अगर तोहरे सरकार केर अधिकारीमन से डराएक नी चाहाला, तो बेस काम करा आउर उमन तोहरे के बेस कहबैं।

⁴ काले कि सरकारी अधिकारीमन तोहर मदइत करेक लगिन परमेश्‍वर केर सेवक हेकैं। मगर तोहरे बुराई करबा तो डरावा, काले कि अधिकारीमन ठिना तोहरे के दंड देवेक केर अधिकार अहे, उमन परमेश्‍वर केर सेवकमन हेकैं कि जेमन बुरा करैना, उमन के दंड देबैं।

⁵ तोहरे के उमन केर अधीन रहेक अहे, ना सिरिफ दंड से बचेक ले, मगर मन के शुद्ध रखेक लगिन हों।

⁶ इ लगिन मालगुजारी हों देवा, काले कि उमन परमेश्‍वर केर सेवक हेकैं, आउर अपन काम के पूरा करेक लगिन सोउब बेरा लगल रहैना।

⁷ इ लगिन हरेक झन के जे देवेक उचित अहे उके देवा, जेके मालगुजारी चाही उके मालगुजारी देवा, जेके महसूल चाही उके महसूल देवा, जेकर से डराएक चाही उकर से डरावा, जेकर आदर करेक चाही उकर आदर करा।

एक दोसर केर परती जिम्मेदारी

⁸ एक दोसर से प्रेम करेक के छोइड़ के आउर कोनों गोइठ में केकरो कर्जदार ना होबा, काले कि जे दोसर से प्रेम करेला, ओहे मूसा केर नियम के पूरा काइर हे।

⁹ काले कि मूसा केर नियम में ढेइर आगयामन अहे, “ब्यभिचार नी करेक, हत्या नी करेक, चोरी नी करेक, लोभ नी करेक,” आउर इमन के छोइड़ आउर कोनोवें आगया होवी तो सोउब केर निचोड़ इ आगया हेके “अपन पड़ोसी से अपन नियर प्रेम करा।”

¹⁰ प्रेम पड़ोसी केर कोनों बुराई नी करेला, इ लगिन प्रेम करेक मूसा केर नियम के पूरा करेक हेके।

¹¹ तोहरे सोउब लगातार एक दोसर से प्रेम करा, काले कि परमेश्‍वर बटले हमरे के इ बुरा दुनिया से छुटकारा देवेक केर बेरा भीरे पोंहइच जाय हे, जब हमरे मसीह उपरे बिसवास काइर रही, उ बेरा केर बिचार से एखन बेरा आउरे भीरे पोंहइच जाय हे, इके बुझा, तोहरे के नींद से जागेक अहे।

¹² इ बुरा दुनिया में हमर रहेक केर बेरा लगभग सिराय जाय हे। जइसन कि राइत ढेइर बीत जाय हे आउर दिन होवेक वाला अहे, आउर मसीह केर घूइर आवेक केर बेरा भीरे पोंहइच जाय हे। से लगिन हमरे के अंधार केर काममन के छोइड़ देवेक अहे, आउर हमरे के ओहे काममन के करेक अहे, जे बुरा काममन के करेक से रोकेला, जइसन सिपाही अपन हँथियार के इंजोत में धारण काइर के रहेला।

¹³ आउर जइसन आदमीमन अंधार में निहीं मगर इंजोत में रहैना, तइसनेहें आवा हमरे हों बेस ब्यवहार करब, ना कि लीला-क्रीड़ा आउर पियंक्‍कड़पन में, ना ब्यभिचार आउर लुचा काममन में, आउर ना झगरा आउर डाह में जिंदगी बिताब।

¹⁴ बल्कि आवा हमरे हँथियार केर रूप में प्रभु यीशु मसीह के पिंध लेवब, आउर पापी स्वभाव केर इच्छामन के पूरा करेक केर कोशिश नी करब।