रोमानियनमन 11 - सादरी नवाँ नियम

इसराइली आदमीमन उपरे परमेश्‍वर केर दया

¹ इ लगिन मोंय पुछोना, का परमेश्‍वर अपन परजा के छोइड़ देलक? निहीं! बिलकुल निहीं! मोंय हों तो इसराइली हेकों, अब्राहम केर बंश आउर बिन्यामीन केर गोतर में से हेकों।

² परमेश्‍वर अपन उ परजा के नी छोइड़ हे जेके उ आगे हें से चुइन हे, तोहरेमन जानाला कि पवितर किताब में परमेश्‍वर केर संदेश के बताएक वाला एलिय्याह केर बारे का लिखल अहे, उ इसराइली आदमीमन केर बारे में परमेश्‍वर ठिना शिकाइत करेला आउर उमन उपरे दोष लगाय के कहेला,

³ “हे प्रभु, उमन तोर संदेश के बताएक वालामन के माइर मोरालैं, आउर तोर बेदीमन के धाँइस देलैं आउर मोंय हें एकले आदमी बाइच हों जे तोर पिछे चलाथों, आउर उमन मोके हों मोराएक लगिन खोजाथैं।”

⁴ मगर परमेश्‍वर एलिय्याह के जबाब देलक, “मोंय अपन लगिन सात हजार आदमीमन के बचाय के राइख हों, जेमन झूठा ईश्‍वर बाल देवता केर आराधना नी करैना।”

⁵ परमेश्‍वर केर किरपा से इसराइलीमन केर एगो छोटका झूँड़ बचल अहे जेमन के परमेश्‍वर अपन सच्चा आदमीमन केर रूप में चुइन हे।

⁶ इ परमेश्‍वर केर चुनेक, उकर किरपा से होलक ना कि भला काम करेक से, अगर भला काम करेक से होतक तो परमेश्‍वर केर किरपा नी रहतक।

⁷ से लगिन एइसन होलक, जबकि इसराइलीमन धरमी बनेक केर कोशिश करलैं मगर बनेक नी पारलैं, मगर परमेश्‍वर जेमन के चुइन लेलक उमन धरमी बाइन गेलैं, दोसरमन के ढींठ बनाय देवल गेलक आउर उमन परमेश्‍वर केर गोइठ के सुनेक से ठुकराय देलैं।

⁸ जइसन कि पवितर किताब में एलिय्याह परमेश्‍वर केर संदेश के बताएक वाला केर बटले लिखल अहे, परमेश्‍वर उमन केर मन के आइज केर दिन तक एइसन भोथरा काइर देई हे कि उमन ना बुझोक, आउर आँइख के एइसन अंधरा काइर देई हे कि ना देखोक, आउर कान के एइसन बहिरा काइर देई हे कि ना सुनोक।

⁹ आउर राजा दाऊद कहेला, जब उमन भोजमन में रहैना तो तुरते फाँइस जायना जइसन चरई जाल में फाँइस जायला आउर जानवर गढ़हा में गिर जायला, ताकि उमन दंड पाबैं।

¹⁰ उ मनक आँइख अंधरा होई जाओक ताकि उमन देखेक नी पारबैं, आउर सोउब बेरा अपन मुसीबतमन में टेढ़ा होई जाबैं।

¹¹ तो मोंय पुछोना, “का इसराइलीमन एइसन ठोकर खाय के गिरलैं कि कहियो उठेक नी पारबैं?” निहीं! बिलकुल निहीं! मगर उमन केर अबिसवास केर चलते परजाइत आदमीमन के छुटकारा मिललक, ताकि इसराइली आदमीमन के हिसिंगा होवोक।

¹² से लगिन अगर इसराइलीमन केर बिसवास नी करेक से दुनिया केर परजाइत आदमीमन लगिन भला होलक, तो इसराइली आदमीमन केर परमेश्‍वर बटे घुरेक सचमुच में परजाइत आदमीमन केर लगिन ढेइर बगरा आशीष पोंहचाएक वाला होवी।

परजाइतमन केर छुटकारा

¹³ मोंय तोहरे परजाइत आदमीमन से इ गोइठमन के कहोना, जबकि मोंय परजाइत आदमीमन लगिन यीशु केर चुनल खास चेला हेकों, इकर लगिन मोंय अपन सेवा केर घमंड करोना।

¹⁴ ताकि कोनों नियर मोंय अपन इसराइली आदमीमन में हिसिंगा करुवाय के उमन में से कायनों झन के बचाय लेमूँ।

¹⁵ काले कि जब इसराइलीमन के छोइड़ देवल जाएक दुनिया केर आदमीमन केर परमेश्‍वर से मेल-जोल होवेक केर कारण होलक, तो जब इसराइलीमन यीशु के मसीह केर रूप में ग्रहण करबैं, तब उमन लगिन एइसन होवी जइसन कि उमन मोरलमन में से जी उठलैं।

¹⁶ मोंय इसराइलीमन केर बारे में एगो उदाहरन बताथों, हमरे इसराइलीमन केर रीति अहे, जब हमरे रोटी पकाएक ले आटा सानिला तो एक मुट्ठी आटा परमेश्‍वर के देवेक लगिन अलग राखिला। जब एक मुट्ठी आटा परमेश्‍वर केर होई जायला, तो इकर मतलब पूरा सानल आटा हों परमेश्‍वर केर होई जायला। एहे नियर गाँछ केर उदाहरन अहे, अगर जाइर परमेश्‍वर केर हेके तो डाइरमन हों परमेश्‍वर केर हेके।

¹⁷ इसराइली आदमीमन बेस जैतून गाँछ केर डाइरमन नियर आउर अब्राहम केर बंश हेकैं, इसहाक आउर याकूब गाँछ केर जाइरमन नियर हेकैं। जे नियर जंगली जैतून गाँछ केर डाइर के बेस जैतून गाँछ केर डाइर में कलम काइर के साटल जाएक से बेस जैतून केर डाइर बनेक केर फायदा मिलेला, ओहे नियर परजाइत आदमीमन के हों इसराइलीमन के मिलेक वाला फायदा मिलेला।

¹⁸ तो डाइरमन उपरे घमंड ना करबा जे काइट के फेकल जायला, आउर अगर तोहरे घमंड करबा, तो जाइन लेवा कि तोहरे जाइर के निहीं मगर जाइर तोहरे के संभरायला।

¹⁹ फिन तोहरे कहबा, परमेश्‍वर हमरे के चाहेला, काले कि उ थोरेक इसराइलीमन के छोइड़ देलक, ताकि तोहरे उ मनक ठाँव के लेवेक पारबा।

²⁰ इ ठीक अहे, उमन तो अबिसवास केर चलते बेस जैतून केर गाँछ से टुटाल गेलैं, मगर तोहरेमन बिसवास से बनल रहाला, इ लगिन घमंडी ना होवा मगर परमेश्‍वर से डरावा।

²¹ काले कि जब परमेश्‍वर असली डाइरमन के हों काइट के फेइक देलक, तो तोहरे के हों काइट के फेइक देवी।

²² इ लगिन परमेश्‍वर केर किरपा आउर कड़ाई के धेयान से देखा! जेमन गिर गेलैं उमन उपरे उ कड़ाई करलक, मगर तोहरे उपरे किरपा करलक, अगर तोहरे उकर किरपा में लगातार बनल नी रहबा तो तोहरे हों काइट देवल जबा।

²³ आउर अगर इसराइलीमन हों घुरबैं आउर बिसवास करबैं, तो बेस जैतून गाँछ केर डाइर में परमेश्‍वर बटले साटल जाबैं।

²⁴ काले कि जंगली जैतून गाँछ केर डाइर के बेस डाइर में साटल जाएक नी होवेला। आउर तोहरे जेमन इसराइली ना लगा, उ नियर अहा जइसन जंगली जैतून केर डाइर में से काइट के बेस जैतून गाँछ केर डाइर में जोड़ल जाय हा, तो इसराइलीमन उ डाइर नियर हेकैं जेमन बेस जैतून गाँछ में से बाइढ़ हैं, तो उमन अपन गाँछ में पक्का फिन से काले नी जोड़ल जाबैं।

परमेश्‍वर सोउब आदमीमन उपरे दया करेला

²⁵ हे बिसवासी भाईमन, मोंय चाहोना कि तोहरेमन इ भेद के बुझा, ताकि तोहरे खुद में घमंड ना करबा, थोरेक इसराइलीमन कठोर मन वाला अहैं, इ कठोर बनल रहेक तब तक रही, जब तक कि परजाइत आदमीमन केर मसीह में बिसवास करेक केर गिनती पूरा नी होवी।

²⁶ इकर पाछे सोउब इसराइलीमन छुटकारा पाबैं, जइसन कि पवितर किताब में लिखल अहे, बचाएक वाला यरुशलेम शहर में आवी आउर अभक्ति के याकूब केर बंशमन से दूर करी।

²⁷ आउर उमन केर संगे मोर एहे करार होवी, जबकि मोंय उ मनक पापमन के क्षमा काइर देमूँ।

²⁸ इसराइलीमन शुभ समाचार उपरे बिसवास नी करेक चलते परमेश्‍वर केर बैरी हेकैं, मगर परमेश्‍वर उमन के अपन लगिन चुइन लेई हे से लगिन उमन से प्रेम करलक, आउर सेहे लगिन परमेश्‍वर उ मनक पुरखामन से करार काइर हे।

²⁹ काले कि परमेश्‍वर कहियो अपन बरदानमन से, आउर बोलाएक से पिछे नी मुढ़ेला।

^30-32 परमेश्‍वर सोउब आदमीमन के आगया नी मानेक लगिन छोइड़ देलक, ताकि सोउबमन उपरे दया करोक। एक समय तोहरे परजाइतमन परमेश्‍वर केर आगया के नी मानला से लगिन इसराइलीमन उपरे दया होलक, मगर एखन इसराइलीमन परमेश्‍वर केर आगया के नी मानाथैं, सेकर चलते तोहर उपरे दया होलक।

परमेश्‍वर केर बड़ाई

³³ अहा! परमेश्‍वर केर धन आउर बुद्धि आउर गेयान कइसन गंभीर अहे! उकर बिचार के केऊ बखाइन करेक नी पारैना आउर उकर डहर के केऊ समझेक नी पारैना!

³⁴ “प्रभु केर बुद्धि के केहर जानलक? चाहे उकर मंत्री केहर होलक?

³⁵ चाहे केहर पहिले उके कोनों देई हे जेकर बदला उके देवल जाई?”

³⁶ काले कि सोउब कुछ उकरे बटे से आवेला, ओहे सोउब कुछ के बनाय हे, आउर उकरे लगिन सोउब कुछ अहे, उकरे महिमा जुग-जुग होते रहोक आमीन।