रोमानियनमन 10 - सादरी नवाँ नियम

¹ हे मोर बिसवासी भाईमन, मोर इ इच्छा अहे कि मोर अपन आदमी इसराइलीमन छुटकारा पाओक, इकर लगिन मोंय परमेश्‍वर से प्रार्थना करोना।

² मोंय उमन केर गवाही देवोना कि उमन के परमेश्‍वर लगिन जोश तो अहे, मगर परमेश्‍वर केर कइसन सेवा करेक अहे सेके नी जानैना।

³ काले कि उमन परमेश्‍वर केर धरमी बनाएक के नी बुइझ के, अपन तरीका से धरमी बनेक केर कोशिश करैना, आउर परमेश्‍वर केर धरमी बनाएक केर नियम के नी मानैना।

⁴ काले कि यीशु मसीह पहिलेहें मूसा केर नियम केर मकसद के जे लगिन उ देवल जाय हे, पूरा काइर देलक, से लगिन उ सोउब आदमीमन जेमन यीशु मसीह उपरे बिसवास करैना, परमेश्‍वर उमन के धरमी बनायला।

छुटकारा सोउब आदमीमन केर लगिन

⁵ मूसा अपन नियम केर किताब में उमन केर बारे में लीख हे कि जेमन उकर नियम के माइन के परमेश्‍वर केर देखेक में धरमी बनेक खोजैना, उमन उकरे से जिंदा रहबैं।

⁶ मगर जे धरमी बनेक बिसवास से अहे, उकर बारे में पवितर किताब में लिखल अहे, “तोंय खुद से ना कहबे, केहर उपरे स्वरग में चढ़ी मसीह के हेंठे लानेक ले?”

⁷ या अपन मन में इ ना कहबे, “केहर मरणलोक में नीचे उतरी मसीह के मुरदा में से जियाय के उपरे लानेक ले?”

⁸ मगर मूसा जे इ कहेला, उ एइसन अहे, “तोंय इ संदेश के अपन मुँह से कइह के मानेक आउर अपन मन में ग्रहण करेक पारिसला।” इ संदेश कहेला तोके परमेश्‍वर उपरे भरसा करेक चाही।

⁹ अगर तोंय अपन मुँह से यीशु के प्रभु जाइन के आदमीमन केर भीरे कबूल करबे आउर अपन मन में बिसवास करबे कि परमेश्‍वर उके मोरलमन में से जियालक, तो तोके परमेश्‍वर पक्का छुटकारा देवी।

¹⁰ काले कि धरमी बनेक लगिन मन से बिसवास करल जायला, आउर छुटकारा पावेक लगिन मुँह से कबुलल जायला।

^11-13 काले कि पवितर किताब में इ लिखल अहे, “जे केऊ प्रभु केर उपरे बिसवास करी आउर उकर नाँव लेवी, उ छुटकारा पावी आउर उके कहियो लाजिम होवेक नी पड़ी।” यहूदीमन आउर यूनानीमन में कोनों फरक नखे, इ लगिन कि उ सोउब केर प्रभु हेके आउर जेमन उकर से मदइत माँगैना उ सोउबमन के बचायला।

¹⁴ मगर इकर से पहिले कि आदमीमन उकर से मदइत माँगबैं, उमन के प्रभु उपरे बिसवास करेक होवी, आउर इकर से पहिले कि उमन प्रभु उपरे बिसवास करबैं, उमन के प्रभु केर बारे में सुनेक होवी, आउर आदमीमन प्रभु केर बारे में सुनबैं, इकर लगिन केखो प्रभु केर बारे में उकर उपरे बिसवास करेक लगिन बताएक होवी।

¹⁵ आउर इकर से पहिले कि केऊ प्रभु केर बारे में केखो बताई, उके भेजल जाएक जरुरी अहे। एहे लगिन पवितर किताब में लिखल अहे, “उमन केर गोड़ कतइ सुंदर अहे जेमन शुभ समाचार सुनायना!”

¹⁶ मगर सोउब आदमीमन उ शुभ समाचार उपरे बिसवास नी करलैं। जइसन कि यशायाह परमेश्‍वर केर संदेश के बताएक वाला कहेला, “हे प्रभु, हमरे केर संदेश उपरे केऊ बिसवास नी करलैं।”

¹⁷ बिसवास तब आवेला जब तोहरे संदेश के सुनाला, आउर संदेश मसीह केर बचन हेके।

¹⁸ मगर मोंय कहोना, इसराइलीमन जरूर हें यीशु मसीह केर संदेश के सुइन हैं, काले कि पवितर किताब में लिखल अहे, “उकर संदेश आउर बचन धरती केर सोउब आदमीमन ठिना आउर सोउब ठाँव में पोंहचाल गेलक।”

¹⁹ फिन मोंय कहोना, इ सच अहे कि इसराइली आदमीमन यीशु मसीह केर बारे में संदेश के बुइझ गेलैं, पहिले तो प्रभु मूसा केर द्वारा कहलक, “हे इसराइलीमन, जब तोहरे परजाइत आदमीमन उपरे मोर प्रेम के देखबा, तो तोहरे के हिसिंगा होवी। मोंय तोहरे के मूरख परजाइत आदमीमन केर द्वारा खिसवामूँ।”

²⁰ फिन यशायाह परमेश्‍वर केर संदेश के बताएक वाला ढेइर साहस केर संगे बतायला कि प्रभु कहेला, “जे आदमीमन मोके नी खोजत रहैं, उमन मोके पाय गेलैं, आउर मोंय उमन के मिललों जेमन मोके पूछबो नी करत रहैं।”

²¹ मगर इसराइली आदमीमन केर बारे में परमेश्‍वर अपन संदेश के बताएक वाला यशायाह केर द्वारा कहेला, “मोंय दिन भइर एगो आगया नी मानेक वाला आउर बक-झक करेक वाला परजा बटे अपन हाँथ पसराय के रहलों, ताकि उमन के अपन बटे बोलामूँ।”