प्रकाशितवाक्य 9 - सादरी नवाँ नियम

¹ जब पाँचवाँ स्वरगदूत तुरही फुँकलक तो मोंय आकाश से धरती उपरे एगो तइरगन के गिरते देखलों, आउर उके बेथाह गढ़हा केर कुंजी देवल गेलक।

² जब उ बेथाह गढ़हा के खोललक तब गढ़हा में से बड़का भट्ठी जइसन धुंगिया उठलक आउर उ गढ़हा केर धुंगिया से बेइर आउर आकाश अंधार होई गेलक।

³ उ धुंगिया में से धरती में फेनगामन निकललैं आउर उमन के धरती केर बिच्छूमन नियर आदमीमन के बिंधेक केर ताकत देवल गेलक।

⁴ आउर उमन से कहल गेलक कि ना धरती केर घास के, ना कोनों हरियार बुदा, ना कोनों गाँछ के हानि पोंहचाबा, सिरिफ उ आदमीमन के जे मनक माथा में परमेश्‍वर केर मोहर नी लाइग हे।

⁵ आउर उमन के माइर मोराएक केर तो निहीं, मगर पाँच महिना तक उमन के दुःख देवेक केर अधिकार देवल गेलक: आउर उमन केर दुःख एइसन रहे, जइसन बिच्छू केर बिंधेक से आदमी के होवेला।

⁶ उ दिनमन में आदमीमन माउत के ढूँढ़बैं मगर नी पाबैं आउर मोरेक केर लालसा करबैं आउर माउत उमन से भागी।

⁷ उ फेनगामन केर रूप में लड़ाई लगिन तेयार करल घोड़ामन नियर रहे, एइसन लगत रहे कि उमन केर मूँड़ उपरे सोना केर मुकुट रहे। उमन केर मुँह आदमीमन केर मुँह नियर रहे।

⁸ उमन केर केंस जनानामन केर केंस नियर आउर उमन केर दाँत सिंहमन केर दाँत नियर रहे।

⁹ उमन केर कवच लोहा केर कवच नियर रहे। उमन केर पाँइख केर आवाज लड़ाई लगिन कूदते ढेइर रथमन आउर ढेइर घोड़ामन केर आवाज नियर रहे।

¹⁰ उमन केर पूँइछ बिच्छूमन केर पूँइछ नियर रहे, उमन केर पूँइछ में पाँच महिना तक आदमीमन के दुःख पोंहचाएक केर शक्ति रहे।

¹¹ बेथाह गढ़हा केर दूत उमन केर राजा रहे, उकर नाँव इब्रानी भाषा में अबद्दोन आउर यूनानी भाषा में अपुल्लयोन हेके।

¹² पहला बिपइत बीत चुकलक, देखा, अब इकर पाछे दूई गो बिपइत आवेक वाला अहे।

¹³ जब छठवाँ स्वरगदूत तुरही फुँकलक तो सोना केर बेदी जे परमेश्‍वर केर सामने अहे, उकर सींगमन में से मोंय एइसन आवाज सुनलों,

¹⁴ जइसन कि केऊ, उ छठवाँ स्वरगदूत से जेकर ठिना तुरही रहे, कहाथे, “उ चाइरो स्वरग दूतमन के जे बड़का नदी फरात ठिना बाँधल अहैं, खोइल दे।”

¹⁵ उ चाइरो दूतमन के खोइल देवल गेलक जे ओहे बेरा, आउर ओहे दिन, आउर महिना आउर बरिस लगिन आदमीमन केर एक तिहाई हिस्सा के माइर मोराएक ले तेयार करल जाय रहैं।

¹⁶ उमन केर फौज मनक सवारीमन केर हिसाब बीस करोड़ रहे, मोंय उमन केर गिनती सुनलों।

¹⁷ आउर मोके इ दर्शन में उ घोड़ामन आउर उ मनक उपरे सवार सेनामन इ लेखे दिसलैं, जेमन केर कवच आइग नियर लाल, धूम्रकांत आउर गंधक नियर पीला रहे, आउर उ घोड़ामन केर मूँड़ सिंहमन केर मूँड़ नियर रहे, आउर उमन केर मुँह से आइग, धुंगिया आउर गंधक निकलत रहे।

¹⁸ इ तीनों बिपइत मतलब आइग, धुंगिया आउर गंधक से जे घोड़ामन केर मुँह से निकलत रहे, आदमीमन केर एक तिहाई हिस्सा के माइर मोराल गेलक।

¹⁹ काले कि उ घोड़ामन केर शक्ति उमन केर मुँह आउर उमन केर पूँइछ में रहे, काले कि उमन केर पूँइछ साँपमन नियर रहे, आउर उ पूँइछमन केर मूँड़ हों रहे आउर ओहेमन से उमन दुःख पोहचात रहैं।

²⁰ आउर बचल आदमीमन जे उ बिपइतमन से नी मोइर रहैं अपन हाँथमन केर बुरा काममन के करेक नी छोड़लैं। उमन भूत-प्रेतमन आउर, सोना, चाँदी, पीतल, पखना आउर काठ केर बनाल मूर्तिमन केर पूजा करेक नी छोड़लैं, जेमन ना देखेक पारैना, ना सुनेक पारैना आउर ना हें चलेक पारैना।

²¹ उमन अपन करल हत्यामन, जादू-टोना, ब्यभिचार आउर चोरी करेक से मन नी फिरालैं।