प्रकाशितवाक्य 8 - सादरी नवाँ नियम

सातवाँ मोहर

¹ जब मेमना सातवाँ मोहर खोललक तो स्वरग में आधा घंटा तक सनाटा छाय गेलक।

² तब मोंय उ सातों स्वरगदूतमन के देखलों, जे परमेश्‍वर केर सामने ठड़ाल रहैना, आउर उमन के सात गो तुरही देवल गेलक।

³ फिन एक आउर स्वरगदूत धूप जलाएक लगिन सोना केर कटोरा लेई के आलक, आउर बेदी ठिना ठड़ाय गेलक। उकर ठिना सोना केर एगो धूपदानी रहे। आउर उके ढेइर धूप देवल गेलक कि सोउब पवितर आदमीमन केर प्रार्थनामन केर संगे सोना केर उ बेदी में, जे सिंहासन केर सामने अहे चढ़ाओक।

⁴ तब स्वरगदूत केर हाँथ से धूप केर धुंगिया पवितर आदमीमन केर प्रार्थनामन केर संगे परमेश्‍वर केर भीरे पोंहइच गेलक।

⁵ इकर पाछे स्वरगदूत धूपदानी लेई के उकर में बेदी केर आइग भरलक आउर धरती में उझइल देलक। जेकर से बदरी गरजेक, आउर शबद, आउर बिजलीमन चमकेक, आउर भूंईडोल आवेक लगलक।

सात तुरहीमन

⁶ फिन उ सातों स्वरगदूत जेमन ठिना सात गो तुरही रहे, उमन अपन-अपन तुरही फुँकेक लगिन तेयार होलैं।

⁷ जइसन हें पहला स्वरगदूत तुरही फुँकलक, तइसनेहें लोहू से मिलल बरफ आउर आइग दिसेक लगलक, आउर उमन के हेंठे धरती में उझलल गेलक। जेकर से धरती केर एक तिहाई हिस्सा पोइड़ के भसम होई गेलक आउर एक तिहाई गाँछमन पोइड़ के भसम होई गेलक आउर सोउब हरियार घास हों पोइड़ के भसम होई गेलक।

⁸ फिन दूसरा स्वरगदूत तुरही फूकलक, तो आइग नियर बरते एगो बड़का पहार समुदर में साजल गेलक आउर समुदर केर एक तिहाई हिस्सा लोहू बाइन गेलक।

⁹ आउर समुदर केर एक तिहाई जीवमन मोइर गेलैं आउर एक तिहाई जहाज नाश होई गेलक।

¹⁰ फिन तीसरा स्वरगदूत तुरही फुँकलक। इकर से आकाश से मशाल नियर बरते एगो बड़का तइरगन गिरलक। उ तइरगन एक तिहाई नदीमन आउर पानी केर सोतामन में गिरलक।

¹¹ उ तइरगन केर नाँव “नागदौना” हेके आउर पानी केर एक तिहाई हिस्सा नागदौना नियर कड़ुवा होई गेलक, आउर ढेइर हें आदमीमन उ पानी केर कड़ुवा होई जाएक से, उ पानी के पी के मोइर गेलैं।

¹² फिन चौथा स्वरगदूत तुरही फुँकलक। इकर से बेइर केर एक तिहाई हिस्सा आउर चाँद केर एक तिहाई हिस्सा आउर तइरगनमन केर एक तिहाई हिस्सा में बिपइत आलक। जेकर से उमन केर एक तिहाई हिस्सा अंधार होई गेलक। आउर दिन केर एक तिहाई हिस्सा में इंजोत नी रहे, एहे लेखे एक तिहाई राइत हों अंधार में डूइब गेलक।

¹³ जब मोंय फिन देखलों तो आकाश केर माझे में एगो उकाब चरई के उड़ते आउर जोर से इ कहते सुनलों, “उ तीन गो स्वरगदूतमन केर तुरही केर शबदमन केर खातिर जेमन केर फुँकेक एखन बचल अहे, धरती केर रहेक वालामन उपरे हाय! हाय! हाय!”