प्रकाशितवाक्य 7 - सादरी नवाँ नियम

एक लाख चौवालीस हजार आदमीमन

¹ इकर पाछे मोंय धरती केर चाइरो कोना में चाइर गो स्वरगदूत के ठड़ाल देखलों, उमन चाइरो दिशा बटले आवेक वाला हवा के रोकत रहैं, ताकि धरती या समुदर या कोनों गाँछ उपरे हवा ना चलोक।

² फिन मोंय एक आउर स्वरगदूत के जिंदा परमेश्‍वर केर मोहर लेवल पूरब से उपरे बटे आते देखलों, उ चाइरो स्वरग दूतमन से जेमन के उ धरती आउर समुदर केर हानि करेक केर अधिकार देई रहे, ऊँचा आवाज से कहलक,

³ “जब तक हमरे अपन परमेश्‍वर केर सेवकमन केर माथा में मोहर नी लगाय देब, तब तक धरती आउर समुदर आउर गाँछमन के हानि ना पोंहचाबा।”

⁴ जेमन केर उपरे मोहर लगाल गेलक, मोंय उमन केर हिसाब सुनलों। उमन केर हिसाब एक लाख चौवालीस हजार रहे आउर उमन इसराइल केर बारह गोतर में से रहैं।

⁵ स्वरग दूतमन हर एक गोतर में से बारह हजार आदमीमन उपरे मोहर लगालैं: यहूदा केर गोतर में से बारह हजार, रूबेन केर गोतर में से बारह हजार, गाद केर गोतर में से बारह हजार,

⁶ अशेर केर गोतर में से बारह हजार, नपताली केर गोतर में से बारह हजार, मनश्शिह केर गोतर में से बारह हजार,

⁷ शमौन केर गोतर में से बारह हजार, लेवी केर गोतर में से बारह हजार, इस्साकार केर गोतर में से बारह हजार,

⁸ जबूलून केर गोतर में से बारह हजार, यूसुफ केर गोतर में से बारह हजार आउर बिन्यामीन केर गोतर में से बारह हजार आदमीमन केर उपरे मोहर लगालक।

एगो बड़का भीड़

⁹ इकर पाछे मोंय देखलों कि मोर सामने एगो बड़का भीड़ ठड़ाल अहे, जेमन केर हिसाब केऊ करेक नी पारत रहैं। इ भीड़ में हरेक जाइत, हरेक गोतर, हरेक आदमीमन, आउर हरेक भाषा केर आदमीमन अहैं। उमन उ सिंहासन आउर उ मेमना केर सामने ठड़ाल अहैं। उमन चरका लुगा पिंधल अहैं आउर उमन अपन हाँथमन में खिजूर केर डाइर लेवल अहैं।

¹⁰ उमन बड़का शबद से कहत रहैं, “छुटकारा लगिन हमर परमेश्‍वर केर, जे सिंहासन में बाइठ हे आउर मेमना केर जय-जयकार होवोक!”

¹¹ आउर सोउब स्वरगदूत, उ सिंहासन आउर मुखियामन आउर चाइरो जीवमन केर चाइरो बटे ठड़ाल अहैं, फिन उमन सिंहासन केर सामने झुइक के माथा टेकलैं आउर परमेश्‍वर केर आराधना करलैं।

¹² उमन कहलैं, “आमीन! हमर परमेश्‍वर केर स्तुति, महिमा, गेयान, धन्यबाद, आदर, अधिकार आउर शक्ति जुग-जुग बनल रहोक। आमीन।”

¹³ एहे बेरा उ मुखियामन में से केऊ मोर से कहलक, “इ चरका लुगा पिंधल आदमीमन केमन हेकैं? आउर कहाँ से आय हैं?”

¹⁴ मोंय उके जबाब देलों, “हे मालिक, तोंय हें जानिसला।” उ मोर से कहलक, “इमन उमन हेकैं, जे उ बड़का दुःख में से निकइल के आय हैं, इमन अपन-अपन लुगा के मेमना केर लोहू में धोई के चरका काइर हैं।

¹⁵ एहे खातिर उमन परमेश्‍वर केर सिंहासन केर भीरे अहैं आउर उकर मंदिर में दिन राइत उकर सेवा करैना, आउर जे सिंहासन में बाइठ हे, उ उमन उपरे छाँई करी।

¹⁶ उमन फिन भूखे आउर पियासा नी होबैं आउर ना उमन के राउद सेकी, आउर ना तपी।

¹⁷ काले कि मेमना, जे सिंहासन केर माझे में अहे, उमन केर रखवाली करी आउर उमन के जीवन रुपी पानी केर सोता ठिना लेई जाई, आउर परमेश्‍वर उ मनक आँइख से सोउब आँसू के पोंइछ देवी।”