प्रकाशितवाक्य 6 - सादरी नवाँ नियम

सात मोहरमन केर खोलल जाएक

¹ फिन मोंय देखलों कि मेमना उ सात गो मोहरमन में से एगो के खोललक, सेहे बेरा उ चाइरो जीवमन में से एगो के मोंय बदरी घिड़केक जइसन ऊँचा आवाज में इ कहते सुनलों, “आव!”

² तब मोंय नजइर उठाय के देखलों, तो मोर आगे एगो चरका घोड़ा अहे, आउर उ घोड़ा में जे बाइठ हे उकर हाँथ में एगो धनुष अहे, उके एक मुकुट देवल गेलक आउर उ जय-जय करते निकललक कि आउर हें जीत पाओक।

³ आउर जब मेमना दूसरा मोहर खोललक, तो मोंय दूसरा जीव के इ कहते सुनलों, “आव!”

⁴ फिन एक आउर घोड़ा निकललक जे लाल रंग केर अहे, उकर में जे बाइठ हे उके इ अधिकार देवल गेलक कि धरती उपरे से शांति के उठाय लेवोक ताकि आदमीमन एक दोसर के माइर मोराओक आउर उके एक बड़का तलवाइर देवल गेलक।

⁵ आउर जब मेमना तीसरा मोहर खोललक, तो मोंय तीसरा जीव के इ कहते सुनलों, “आव!” आउर मोंय नजइर उठाय के देखलों, तो मोर आँइख केर सामने एक करिया घोड़ा अहे, आउर उकर में जे बाइठ हे उकर हाँथ में एगो तराजू अहे।

⁶ आउर मोंय चाइरो जीवमन केर माझे में से एगो आवाज के इ कहते सुनलों, “एक दिन केर मजूरी केर बदली में एक दिन खाएक केर गोहोम आउर एक दिन केर मजूरी केर बदली में तीन दिन खाएक केर जौ किनेक केर बराबइर होवी। मगर जैतून तेल आउर अंगूर केर रस केर भाव नी बदली।”

⁷ आउर जब मेमना चौथा मोहर खोललक तो मोंय चौथा जीव केर आवाज इ कहते सुनलों, “आव!”

⁸ आउर मोंय नजइर उठाय के देखलों, तो मोर आँइख केर सामने एक पीला रंग घोड़ा अहे आउर उकर में जे बाइठ हे, उकर नाँव माउत हेके: आउर मरणलोक उकर पिछे-पिछे अहे आउर उके धरती केर एक चौथाई हिस्सा में इ अधिकार देवल गेलक कि तलवाइर आउर अकाल आउर मरी आउर धरती केर जंगली जानवरमन केर द्वारा आदमीमन के माइर मोराओक।

⁹ आउर जब मेमना पाँचवाँ मोहर खोललक तो मोंय बेदी केर हेंठे उ मनक प्राण के देखलों, जे परमेश्‍वर केर बचन केर परचार करेक केर खातिर आउर उ गवाही केर खातिर कि यीशु हमर प्रभु हेके, जे उमन देई रहैं, माइर मोराल जाय रहैं।

¹⁰ आउर उमन जोर से आवाज देई के कहलैं, “हे मालिक, तोंय पवितर आउर सच्चा हेकिस। तोंय कब तक फैसला नी करबे? आउर धरती में रहेक वाला आदमीमन से हमर लोहू केर पलटा केखन तक नी लेबे?”

¹¹ आउर उमन में से हरेक के चरका लुगा देवल गेलक आउर उमन से कहल गेलक कि थोरेक देरी आउर धीरज धरा, जब तक कि तोहर संगी सेवकमन आउर भाई-बहिन केर हिसाब पूरा नी होई जाई, जे उमन केर नियर माइर मोराल जाएक अहैं।

¹² आउर जब मेमना छठवाँ मोहर खोललक, तो ओहे बेरा एक बड़का भूंईडोल आलक, आउर बेइर कम्बरा नियर करिया आउर पूरा चाँद लोहू नियर लाल होई गेलक।

¹³ आउर आकाश केर तइरगनमन धरती में एइसन गिरलैं जइसन बड़का आँधी से हिल के अंजीर केर गाँछ में से कच्चा फार झरेला।

¹⁴ आउर आकाश एइसन लोप होई गेलक, जइसन कागज मोढ़ेक से सिकुइड़ जायला आउर हरेक पहार आउर टापू, अपन-अपन ठाँव से हाइट गेलक।

¹⁵ आउर धरती केर राजा आउर प्रधान आउर सरदार आउर धनवान आउर शक्तिशाली आदमीमन आउर हर एक सेवक आउर हर एक आजाद, पहारमन केर खोहमन में आउर चट्टाइनमन में जाय लुकलैं।

¹⁶ आउर पहारमन आउर चट्टाइनमन से कहेक लगलैं, “हमर उपरे गिर जा आउर हमरे के उकर मुँह से जे सिंहासन में बाइठ हे आउर मेमना केर खीस से लुकाय लेवा।

¹⁷ काले कि उकर खीस केर भयानक दिन आय पोंहइच हे, अब के उकर सामने ठहरेक पारी?”