प्रकाशितवाक्य 5 - सादरी नवाँ नियम

मोहरबंद किताब आउर मेमना

¹ आउर जे सिंहासन में बाइठ रहे, मोंय उकर भतखाइया हाँथ में एगो किताब देखलों, जे भीतरे आउर बाहरे लिखल रहे, आउर उके सात गो मोहर लगाय के बंद करल जाय रहे।

² फिन मोंय एगो बलवान स्वरगदूत के देखलों जे ऊँचा शबद से इ परचार करत रहे, “इ किताब के खोलेक आउर उकर मोहर के तोरेक केर लायक के अहे?”

³ ना स्वरग में, ना धरती में, ना धरती केर हेंठे केऊ उ किताब के खोलेक या उकर उपरे नजइर करेक केर लायक निकललक।

⁴ तब मोंय कुहंइक-कुहंइक के काँदेक लगलों, काले कि उ किताब के खोलेक या उकर उपरे नजइर करेक केर लायक केऊ नी मिललक।

⁵ तब उ मुखियामन में से एगो मोर से कहलक, “ना काँद, देख, यहूदा केर गोतर केर उ सिंह, जे दाऊद केर बंश हेके, उ किताब के खोलेक आउर उकर सातों मोहर तोरेक लगिन जीत पाय हे।”

⁶ तब मोंय उ सिंहासन आउर चाइरो जीवमन आउर उ मुखियामन केर माझे, एगो मेमना के ठड़ाल देखलों। उ बलि करल मेमना नियर रहे। उकर सात गो सींग आउर सात गो आँइख रहे, इ परमेश्‍वर केर सातों आत्मामन हेकैं, जे समूचा धरती में भेजल जाय हैं।

⁷ उ आय के उकर भात खाइया हाँथ से जे सिंहासन में बाइठ रहे, उ किताब लेई लेलक।

⁸ जब उ किताब लेई लेलक, तो उ चाइरो जीव आउर चोबिसो मुखियामन उ मेमना केर सामने गिर के प्रणाम करलैं आउर उमन में से हर एक केर हाँथ में बीना-बाजा आउर धूप से भरल सोना केर कटोरा रहे, जे पवितर आदमीमन केर प्रार्थनामन हेके।

⁹ आउर उमन इ नवाँ गीत गावेक लगलैं: “तोंय इ किताब के लेवेक आउर इकर मोहर के खोलेक केर लायक अहिस, काले कि तोंय बलि होई के अपन लोहू से हरेक गोतर, भाषा, आदमीमन, आउर जाइत में से परमेश्‍वर केर लगिन आदमीमन के कीन लेई हिस।

¹⁰ आउर उमन के हमर परमेश्‍वर लगिन तोंय एइसन आदमी बनाय देई हिस, जेमन केर उपरे उ राइज करेला आउर पुरोहित बनाले जे उकर सेवा करैना आउर उमन दुनिया में राइज करबैं।”

¹¹ आउर जब मोंय देखलों तो उ सिंहासन आउर उ जीवमन आउर उ मुखियामन केर चाइरो बटे ढेइर स्वरग दूतमन केर शबद सुनलों, जेमन केर हिसाब लाखो आउर करोड़ो केर रहे।

¹² उमन ऊँचा शबद से कहत रहैं, “धाइन अहे उ मेमना जेके माइर मोराल जाय रहे। उ महिमा केर लायक अहे। उकर अधिकार महान अहे। उकर गेयान गहरा अहे। उ ढेइर शक्तिशाली अहे। आउर उ ढेइर धनवान अहे। आवा, हमरे उकर आदर आउर महिमा करब।”

¹³ फिन मोंय स्वरग में, आउर धरती में आउर धरती केर हेंठे आउर समुदर केर सोउब सिरजाल चीजमन के आउर सोउब कुछ के जे उकर में अहे, इ कहते सुनलों, “जे सिंहासन में बाइठ हे, उकर आउर मेमना केर धन्यबाद, आदर आउर महिमा आउर राइज जुग-जुग रहोक।”

¹⁴ आउर चाइरो जीवमन आमीन कहलैं, आउर मुखियामन झुइक के माथा टेकलैं आउर भक्ति करलैं।