प्रकाशितवाक्य 3 - सादरी नवाँ नियम

सरदीस केर कलीसिया के संदेश

¹ सरदीस शहर केर कलीसिया केर स्वरगदूत के इ संदेश लीख: मोंय ओहे हेकों जेकर ठिना परमेश्‍वर केर सात गो आत्मा आउर सात गो तइरगन अहैं। मोंय तोके जे कहाथों उके सुन: मोंय तोर काममन के जानोना कि तोंय जिंदा तो कहाइसला, मगर मोरल अहिस।

² से लगिन सावधान होई जा, तोर भीतरे जे मोर उपरे थोरेक बिसवास बाइच हे उके मजबूत कर, ताकि इ पूरा रीति से ना सिराय जाओक। काले कि मोंय तोर कोनों काम के अपन परमेश्‍वर केर भीरे पूरा नी पालों।

³ से लगिन याइद कर कि तोंय कइसन गेयान पाले आउर सुइन रहिस, आउर उकर में बनल रह, आउर पाप करेक छोइड़ दे। आउर अगर तोंय सावधान नी रहबे तो मोंय चोर नियर आय जामूँ आउर तोंय नी जानेक पारबे कि कोन घड़ी तोर ठिना आय जामूँ।

⁴ मगर हाँ, सरदीस शहर में तोर हिंयाँ थोरेक एइसन आदमीमन अहैं, जेमन अपन-अपन लुगा के अशुद्ध नी करलैं, उमन चरका लुगा पिंधल मोर संगे घूमबैं, काले कि उमन इ लाएक अहैं।

⁵ जे जीत जाई, उ एहे लेखे चरका लुगा पिंधी, आउर मोंय उकर नाँव जिंदगी केर किताब में से कोनों रीति से नी काटमूँ, मगर उकर नाँव अपन आबा आउर उकर स्वरग दूतमन केर सामने माइन लेमूँ।

⁶ जेमन केर कान अहे, उमन धेयान से सुइन लेवा कि पवितर आत्मा कलीसिया केर आदमीमन से का कहेला।

फिलदिलफिया केर कलीसिया के संदेश

⁷ आउर फिलदिलफिया शहर केर कलीसिया केर स्वरगदूत के इ संदेश लीख: मोंय ओहे हेकों जे पवितर आउर सच्चा हेके, आउर जे दाऊद केर कुंजी रखेला। आउर मोर खोलल के केऊ बंद नी करेक पारी आउर बंद करल के केऊ खोलेक नी पारी। मोंय तोके जे कहाथों उके सुन:

⁸ मोंय तोर काममन के जानोना, देख, मोंय तोर सामने एगो दुरा खोइल के राइख हों, जेके केऊ बंद करेक नी पारी, तोर शक्ति थोरेसन तो अहे, फिन भी तोंय मोर बचन केर पालन काइर हिस आउर मोर नाँव केर इंकार नी करले।

⁹ देख, मोंय शैतान केर उ सभा केर आदमीमन के तोर वश में काइर देमूँ जे यहूदी बाइन बाइठ हैं, मगर ना लगैं, उमन झूठ कहैना, देख, मोंय एइसन करमूँ कि उमन आय के तोर पाँव में गिरबैं आउर इ जाइन लेबैं कि मोंय तोर से प्रेम करोना।

¹⁰ काले कि तोंय मोर धीरजरूपी आगया केर पालन काइर हिस, से लगिन मोंय हों तोके परीक्षा केर उ बेरा बचाय रखमूँ, जे धरती में रहेक वाला आदमीमन के परखेक लगिन गोटा दुनिया में आवेक वाला अहे।

¹¹ मोंय जल्दी हें आवेक वाला अहों, जे गेयान तोर ठिना अहे, उकर में मजबूत बनल रह ताकि केऊ तोर मुकुट के लुटेक ना पारोक।

¹² जे जीत जाई, उके मोंय अपन परमेश्‍वर केर मंदिर में एगो खंभा बनामूँ आउर उ फिन कहियो बाहरे नी निकली, आउर मोंय अपन परमेश्‍वर केर नाँव आउर अपन परमेश्‍वर केर नगर मतलब नवाँ यरुशलेम केर नाँव, जे मोर परमेश्‍वर ठिना से स्वरग से उतरेक वाला अहे, आउर अपन नवाँ नाँव उकर में लिखमूँ।

¹³ जेमन केर कान अहे, उमन धेयान से सुइन लेवा कि पवितर आत्मा कलीसिया केर आदमीमन से का कहेला।

लौदीकिया केर कलीसिया के संदेश

¹⁴ लौदीकिया शहर केर कलीसिया केर स्वरगदूत के इ संदेश लीख: मोंय ओहे हेकों जे आमीन आउर बिसवास लायक आउर सच्चा गवाह हेके। आउर परमेश्‍वर जे कोनों बनाय हे उकर निचोड़ हेके। मोंय तोके जे कहाथों उके सुन:

¹⁵ मोंय तोर काममन के जानोना कि तोंय ना तो ठंढा हेकिस आउर ना गरम: भला होतक कि तोंय ठंढा या गरम होते।

¹⁶ से, इ लगिन कि तोंय गुनगुना हेकिस, ना ठंढा अहिस आउर ना गरम, मोंय तोके अपन मुँह में से उलगेक वाला अहों।

¹⁷ तोंय कहिसला कि मोंय धनी हेकों, आउर धनवान होई जाय हों आउर मोके कोनों चीज केर घटी नखे, आउर इ नी जानिसला कि तोंय अभागा, तुच्छ, गरीब, अंधरा आउर नंगा अहिस।

¹⁸ से लगिन मोंय तोके सलहा देवोना कि आइग केर भट्ठी में धिपाय के शुद्ध करल सोना मोर से कीन ले कि तोंय धनी होई जाबे, आउर चरका लुगा लेई ले कि पिंध के तोके अपन नंगापन केर लज्जा ना होवोक, आउर अपन आँइखमन में लगाएक लगिन सुरमा ले कि तोंय देखेक पारबे।

¹⁹ मोंय जे-जे आदमीमन से प्रेम रखोना, उ सोउब के डाँटोना आउर दंड हों देवोना, से लगिन उत्साहित हो, आउर पाप करेक छोइड़ दे।

²⁰ देख, मोंय दुरा में ठड़ाल ठोकठोकवना, अगर केऊ मोर शबद सुइन के दुरा खोली, तो मोंय उकर ठिना भीतरे आय के उकर संगे भोजन करमूँ, आउर उ मोर संगे।

²¹ जे जीत जाई, मोंय उके अपन संगे अपन सिंहासन में बइठामूँ, जइसन मोंय हों जीत के अपन आबा केर संगे उकर सिंहासन में बाइठ गेलों।

²² जेमन केर कान अहे, उमन धेयान से सुइन लेवा कि पवितर आत्मा कलीसिया केर आदमीमन से का कहेला।”