प्रकाशितवाक्य 2 - सादरी नवाँ नियम

इफिसुस केर कलीसिया के संदेश

¹ उ मोके एहो कहलक, “इफिसुस शहर केर कलीसिया केर स्वरगदूत के इ संदेश लीख कि मोंय ओहे हेकों जे सात गो तइरगन अपन भतखाइया हाँथ में लेवल अहों आउर सोना केर सात गो दीया रखेक केर खूँटा केर माझे चलोना-फिरोना। मोंय तोके जे कहाथों उके सुन:

² मोंय तोर काम, मेहनइत आउर तोर धीरज के जानोना। मोंय एहो जानोना कि तोंय बुरा आदमीमन के देखेक नी पारिसला। जे खुद के खास चेला कहैना मगर उमन ना लगैं, उमन के तोंय परइख के झूठा पाले।

³ तोंय धीरज धरिसला आउर मोर नाँव लगिन दुःख उठाते-उठाते नी थकिसला।

⁴ मगर मोके तोर बिरोध में इ कहेक अहे कि तोंय अपन पहिला जइसन प्रेम छोइड़ देई हिस।

⁵ से लगिन याइद कर कि तोंय कहाँ से गिर हिस, आउर तोंय पाप करेक छोइड़ दे आउर पहिले नियर काम कर। अगर तोंय पाप करेक नी छोड़बे, तो मोंय तोर ठिना आय के तोर दीया रखेक केर खूँटा के उकर ठाँव से हटाय देमूँ।

⁶ मगर हाँ, तोर में इ गोइठ तो अहे कि तोंय निकोलास केर चेलामन केर काममन से घिरना करिसला, जेमन से मोंय हों घिरना करोना।

⁷ जेमन केर कान अहे उमन धेयान से सुइन लेवा कि पवितर आत्मा कलीसिया केर आदमीमन से का कहेला। जे जीत जाई, उके मोंय उ जिंदगी केर गाँछ में से जे परमेश्‍वर केर स्वरग लोक में अहे, खाएक लगिन फार देमूँ।

स्मुरना केर कलीसिया के संदेश

⁸ स्मुरना शहर केर कलीसिया केर स्वरगदूत के इ संदेश लीख: मोंय ओहे हेकों जे शुरु आउर आखरी हेकों। मोंय मोइर जाय रहों आउर अब मोंय सोउब दिन लगिन जिंदा अहों। मोंय तोर से जे कहाथों उके सुन,

⁹ मोंय तोर दुःख आउर गरीबी के जानोना, मगर हकीकत में तोंय धनी अहिस। आउर जे आदमीमन खुद के यहूदी कहैना आउर ना लगैं, मगर शैतान केर सभा हेकैं, उमन केर निंदा के हों जानोना।

¹⁰ जे दुःख तोके झेलेक होवी, उमन से ना डराव। काले कि देख, शैतान तोहर में से थोरेक आदमीमन के जेहेल घर में साजेक वाला अहे, ताकि तोहरेमन परखल जबा, आउर तोहरेमन के दस दिन तक दुःख उठाएक होवी। प्राण देवेक तक बिसवासी रहा, तो मोंय तोहरे के जिंदगी केर मुकुट देमूँ।

¹¹ जेमन केर कान अहे, उमन धेयान से सुइन लेवा कि पवितर आत्मा कलीसिया केर आदमीमन से का कहेला: जे जीत जाई, उके दूसरा मरण से कोनों हानि नी होवी।

पिरगमुन केर कलीसिया के संदेश

¹² पिरगमुन शहर केर कलीसिया केर स्वरगदूत के इ लीख: मोंय ओहे हेकों जेकर ठिना दुइयो आरा तेज धार वाला तलवाइर अहे। मोंय तोके जे कहोना उके सुन:

¹³ मोंय इ तो जानोना कि तोंय हूवाँ रहिसला जहाँ शैतान केर सिंहासन अहे, आउर तोंय मोर नाँव में स्थिर रहिसला। तोंय मोर उपरे बिसवास करेक से उ दिनमन में हों पिछे नी हटले, जेकर में मोर बिसवास लायक गवाह अन्तिपास, तोहर माझे उ ठाँव में मोराल गेलक जहाँ शैतान रहेला।

¹⁴ मगर मोके तोर बिरोध में थोरेक गोइठमन के कहेक अहे, काले कि तोर हिंयाँ थोरेक आदमीमन एइसन अहैं, जे बिलाम केर शिक्षा के मानैना, जे बालाक के सिखालक कि उ इसराइली आदमीमन के बहकाओक, जेकर से उमन मूर्तिमन लगिन बलि चढ़ाल चीजमन के खाओक आउर ब्यभिचार करोक।

¹⁵ तइसनेहें तोर हिंयाँ थोरेक आदमीमन एइसन अहैं, जे निकोलास केर चेलामन केर शिक्षा के मानैना।

¹⁶ से लगिन पाप करेक छोइड़ दे, निहीं तो मोंय तोर ठिना जल्दी हें आय के, अपन मुँह केर तलवाइर से उमन केर संगे लाड़मूँ।

¹⁷ जेमन केर कान अहे, उमन धेयान से सुइन लेवा कि पवितर आत्मा कलीसिया केर आदमीमन से का कहेला: जे जीत जाई, उके मोंय लुकल मन्ना में से देमूँ, आउर उके एगो चरका पखना हों देमूँ, आउर उ पखना में एगो नाँव लिखल होवी, जेके उके पावेक वालामन केर सिवाय आउर केऊ नी जानी।

थुआतीरा नगर केर कलीसिया के संदेश

¹⁸ थुआतीरा नगर केर कलीसिया केर स्वरगदूत के इ संदेश लीख: मोंय परमेश्‍वर केर बेटा जेकर आँइख आइग केर अंगोर नियर अहे आउर जेकर पाँव बेस पीतल नियर अहे। मोंय तोर से जे कहाथों उके सुन:

¹⁹ मोंय तोर काममन, तोर प्रेम आउर बिसवास आउर सेवा, आउर धीरज के जानोना, आउर एहो जानोना कि तोर पिछला काम पहिले केर काममन से बाइढ़ के अहे।

²⁰ मगर मोके तोर बिरोध में इ कहेक अहे कि तोंय उ जनाना इजेबेल के रहेक देविसला जे खुद के परमेश्‍वर केर संदेश बताएक वाला कहेला, आउर मोर सेवकमन के ब्यभिचार करेक आउर मूर्तिमन लगिन बलि चढ़ाल चीजमन के खाएक लगिन सिखाय के बहकायला।

²¹ मोंय उके पाप करेक छोड़ेक केर मोका देलों, मगर उ अपन ब्यभिचार केर पाप के करेक से छोड़ेक नी चाहेला।

²² देख मोंय उके रोग केर डिसना में सुताय देमूँ आउर जे उकर संगे ब्यभिचार करैना अगर उमन हों उकर जइसन पाप काममन के करेक नी छोड़बैं, तो उमन के मोंय बड़का दुःख देमूँ।

²³ मोंय उकर छउवामन के माइर मोरामूँ, तब सोउब कलीसियामन जाइन लेबैं कि हिरदय आउर मन के परखेक वाला मोंय हें हेकों, आउर मोंय तोहर में से हरेक झन से उकर काममन केर मोताबिक पलटा लेमूँ।

²⁴ मगर तोहरे थुआतीरा नगर केर बचल आदमीमन से जेतनामन इ शिक्षा के नी मानैना, आउर उ गोइठमन के जेके शैतान केर गहरा गोइठमन कहैना नी जानैना, उमन से मोंय इ कहोना कि मोंय तोहर उपरे आउर बोझ नी देमूँ।

²⁵ मगर हाँ, जे तोहर ठिना अहे उके मोर आवेक तक थाइम रहा।

²⁶ जे जीत जाई आउर आखरी तक मोर काममन केर मोताबिक करते रही, तो मोंय उके जाइत-जाइत केर आदमीमन उपरे अधिकार देमूँ।

²⁷ आउर उ राइज करेक वाला लोहा केर लाठी से उमन केर उपरे राइज करी, जे लेखे कुम्हार केर माटी केर बासन चकनाचूर होई जायला: मोंय हों एइसनेहें अधिकार अपन आबा से पाय हों।

²⁸ आउर मोंय उके बड़-बिहान केर तइरगन देमूँ।

²⁹ जेमन केर कान अहे, उमन सुइन लेवा कि पवितर आत्मा कलीसिया केर आदमीमन से का कहेला।